2 SAMWELI 1 - Bibliyeeda Ghaydit

Dawdi ghwanyas iita miyeeda Sawli

¹ Iimuchu nea ning'ata miyeeda Sawli, nea damanda biikna Dawdi aba bayiiga fuga Amaleki, goobiida Dawdi askwearjooji iyeenya mujiineeda Siklagi;

² hean eaweeteaba samwagu, ng'ula, ghwahidu siida leabu museasooda Sawli, nea gwanda uhuuda hang'weaka beareadi, nea gwanda uhuudaanyi birjeanda. Hean nea ghwahidu heeda Dawdi, gwatkuy aba ng'eanyi ak ghaghadoawan.

³ Ak gwayeesha Dawdi niny, “Ang'iing'i gileabu yeenu?” Ghwalamda siidida ak gwayeesha niny, “Aniini geamang'awni museasooda Israeli.”

⁴ Ghwalamda Dawdi ak gwayeesha siidida, “Neada gwahiseegwaani eaniyean rukunean?” Ng'ata gwayeesha siidida, “Buuneeda nimng'aw aba ng'ucheeda, ak ea sibwar fugaasa saang'a; nea Sawli ea orjeedeanyu siguura Yonatan eara saawa ea sibwar gameewa.”

⁵ Ng'ata gwayeesha Dawdi siidida rukusa ng'asheegean, “Neada ginaldiin ang'iing'i gideaba nimi Sawli sea orjeedaanyi?”

⁶ Gwayeesha siidida rukusa niny ng'asheesuun, “Aba ASEETA abeeda geandi uhuuda Giijeeda Gilbowa; nea abeeda Sawli gwadiiwa geaw ng'utaanyi; ak ging'ulayi, gwaneekiisa niny mutukwajeega lugooda sea fuga ding'da faraasajeega.

⁷ Iidu nea gwasachsa ghaat bwadaw, ghwadaahan, ak gaguurnean. Ak ghaashaayi ghuuta ak geayeeshi, ‘Aniini geandi hiji.’

⁸ Ak gwayeeshiinean, ‘Guwoosi ng'eaha?’ Geayeeshi niny, ‘Aniini geawooschi siida Amaleki.’

⁹ Ak gwayeeshiinean, ‘Miinaada aba murdeedeanyu ak ginuuschean; aba gideaba neasawani, ak ea niriikghta dami.’

¹⁰ Hean ghaamiinaadi aba murdeadaanyi, ak geanuuschi niny, aba gideaba ghaadaayi mayghahaap; ak geageandi ngoofajeanda mida uhuudaanyi ea mulmulaneeda mida geatindaanyi, ak ea neayeadu heeda ng'utamiideanyu.”

¹¹ Ng'ata ghoang'waay Dawdi hang'weakaaschi, ak ghabwaashaada; ak gwasindunu eara buuneesean mideayi sea niny;

¹² ak gagiisan nea gooyeawda nea gooluulda geat ea ghwahita shing'ada aba badayda Sawli ea orjeedaanyi was Yonatan ea aba badahuuka fuga NG'UTAMIIDA ea aba badayda gheeh Israeli, aba gideaba sibwar fuga saang'a aba ng'uta.

¹³ Hean ghwalamda Dawdi ak gwayeesha fugiga rukusa niny ng'asheegean, “Agooga gooleabu yeenu?” Ak ghwasha nea gwayeesha, “Aniini geawooschi orjeeda rabascheanda, was siida Amaleki.”

¹⁴ Gwayeesha Dawdi niny, “Ang'iing'i gibadaksiindiin gideaba gaybwara siida simwaar bea NG'UTAMIIDA?”

¹⁵ Ng'ata gaguursa Dawdi siyagi aba jeeda buuneeda ak gwayeesha, “Una ak giibeedeaysi niny.” Ak ghabwar ea ghami.

¹⁶ Ghwalamda Dawdi ak gwayeesha niny, “Gagasa goobiida foojeandaang'u uhuudaang'u; aba gideaba nirugu ghuutaang'u ng'asheega badaydaang'u, nea gwayi, ‘Aniini naabwarji siida simwaar bea NG'UTAMIIDA.’”

Dawdi gagutu heareega Sawli ea Yonatan

¹⁷ Ak gagutu Dawdi heareega nea gagutiideaydunu aba badayda Sawli ea dea orjeedaanyi was Yonatan,

¹⁸ ak gwayeesha oanaala fuga Yuda; ng'ula geeng'oorsa jeeda gitaabooda Yashari. Ak gagutiideaydunu heareega:

¹⁹ “Giigheambiitaang'u, Ea Israeli, sinuuseada aba headaang'u diyeadaawaat! Gida abeadaayda fuga daruusi!

²⁰ Adoorukwiidi ng'asheesu aba Gati, Adootearsi naweadinga Ashkeloni; Adagahoosan haweega Filisti, adiidu geenung' ghwaak badahuukaasa haweega doondooyga.

²¹ “Agooga giijeega Gilbowa, Gagasa ea manda heedeang'wa Rahooda ghana roopta, nea gagajeamiidi madameega nyaawa galeagasean! Aba gideaba nih gisijakteayda igeambooniga daruuschi aba baspaseega, igeambooda Sawli, meamwaarana nagheeda.

²² “Aba foojeanda fuga sibwar gameewa, aba ghashneeda fuga daruusi, ghuweang'da Yonatan ea mabiikta bwadaw, nea ng'uta Sawli ea mabiikna mwadaagha.

²³ “Sawli ea Yonatan, geabwariiy nea miyaas! Aba eaweega ea aba miyeeda ghanyea mwadarda; ak ea ng'weeni ea ghoadaraam rabearda, ak ea majeekcheewi ea ghang'al ng'anyeeka.

²⁴ “Ea haweega Israeli, ooyeawda Sawli, akwealseegwa hang'weaka areeri miyaas, nea gwanapsa hang'weakeagwa haleanjeeda suulga meeng'meeng'i.

²⁵ “Gida abeadaayda fuga daruusi aba bugusta ng'ucheeda! Yonatan sibwar aba headaang'u diyeadaawaat.

²⁶ Aniini geagiisanyi aba badaydaang'u, Yonatan orjeediya ang'iing'i gibwariinyaan muuchi; bariinyeagaagu aba heedeanyu aahaw, ghang'al bariinyeega gatmooda.

²⁷ “Aba gida abeadaayda fuga daruusi, ea gidashealda dabita ng'ucheeda!”