2 Goriinto 6 - Bibliyeeda Ghaydit

¹ Nea aseasa iisisinyi gadiyeeda sea niny, hean geemuscheegwa gideaba adiidu ghoanyaschi dagheerjeanduumeeda ASEETA mwadaagha.

² Aba gideaba gwayi, “Damanda simwas gealeyyseey iit, ak ghaaweacheeyi eaweeda lealeanooda.” Ng'ula, ghamneawa damanda simwasi; ng'ula ghamneawa eaweeda lealeanooda

³ Meagasi eayiina naweemba siida wassean gichea gwaruusa, ak abeeda ea meedeaksiina gadiyeedeanya munyinda,

⁴ nea iisiwuurjeewi soomjooga ASEETA abeeda geaghwarji geat aba naweadinga sean, aba naweedida haw bea milikghteaydean, aba sawanaduutka, hang'ooynacheeka habitkwajeega,

⁵ bayiiga, ghealooniga, giiduumduumda, gadiyoojiga, giing'weernooda, jalooda;

⁶ ea aba alooheeda, ea fughareeda, ea giihang'ooyda, ea inyeanda jeeda, ea aba Guroorooda Ghaydit, ea bariinyeega huumwa,

⁷ aba ng'asheanda huumwa, ea aba uurda ASEETA; ea badita doabiiw bea ng'ucheeda mida geatinda dugwa ea geatinda ghaadaam;

⁸ aba mureeda ea nyoota mureeda, iisisimaneasa ng'asheega munyas ghana eesimaneasa ng'asheega miyaas. Ak geenung' eahuuwa fuga reengani buuneeda nea geeruku huumeanda;

⁹ ak geewuurjeewi fuga meanala, nea geanaleasa muuchi; ak geewuurjeewi fuga meewa nea ging'ulayi geewooschi majeekcheewi; ak geewuurjeewi fuga siyaaga ghoorjooda, ak ea meenuusa;

¹⁰ geewuurjeewi fuga giisan, nea ghana geehoosanyi galeagasean; nea geewuurjeewi fuga barbari, nea ghana geeparuurji fuga saang'a; geewuurjeewi fuga mandeawana gil, nea ghana geendeawi haleanjeeda sean.

¹¹ Ghuusigaasa sijaachi aba heedeang'wa, ea fuga Gorinto; nea gurooruunatkaasa ea nibareahiidi.

¹² Aseasa meakghumeegwa, agooga ghoaghuumeegwa haleanjeedida oabwariinyiin.

¹³ Aba yamiteaba geaw geabalooldi gili eabalooli diibiga, oapwargiida gurooruunatkeagwa.

Reekusiinda seareeda fuga mandeawana masaweega

¹⁴ Adiidu ghoang'waanyi geat sea fuga mandeawana masaweega. Aba naweeda mwadoabiiwa, aba gideaba gwanda duupcheemba naaha mida dageascheeda doobiiwnata ea heeheeweega? Nuut gicha gwanda rooroocheemba naaha mida dageascheeda weeshinda ea misaneeda?

¹⁵ Gwanda giiyang'deayeemba naaha dageascheeda Gristo sea Gidamuy? Ghana siida mideawa masaweega neada gaygwandeayeesa naaha sea siida mandeawana masaweega?

¹⁶ Neada gwanda neajeemba naaha dageascheeda gheeda sibata ASEETA sea sanaamu? Aba gideaba aseasa geewooschi gheeda sibata ASEETA majeek; ak gawuurji ginyaashta ASEETA nea gwayi, “Gaydeabiida jeenyaawa, nea gaydaneayeewa jeenyaawa, ak gaydoaw aniini ASEETA nyaawa, nea ghoah saawa fugeasu.

¹⁷ Asi arinana jeenyaawa, ak gooheeleewi geat saawa gwarugu Ng'utamiida, ak ea adoang'waanyi gida mideawa ririnnyeanda; ak abeeda gaydaadeagwa ghoah.

¹⁸ Gaydoaw Bwaabwa aba heedeang'wa, ak gajahuuwa agooga orjoogeasu ea haweegeasu, gwarugu Ng'utamiida mideawa uurda.”