2 Goriinto 5 - Bibliyeeda Ghaydit

¹ Aba gideaba geanali beadi udahabeascheanji iteanya bea hiji bea muunda ng'eanyiidean eaweeda sinyarjeawa, geandeawi gheeda leabu heeda ASEETA, gheeda meesinana geatinga, ghaydit manda muudeanooda mida humng'eeda.

² Aba huumwa aba hiji iissa geamnyaanyi nea geegasayi muuchi eeshuubeesa giibindida bea humng'eedean,

³ nea abeeda iisishuubeesa gajeedaaheasa nea meewoosi dawiiri.

⁴ Nea damani duu eendana jeedeaba gheawiin, iissa geesiimi aba sawanadeeda; nea meakna gideaba majeekwealeasa gil, gweagu gideaba gajeekwealeasa muuchi, ak abeeda gidida iissa ghamiin abeeda gayghwanukghuta eaweega.

⁵ Nea siida ghayi sinneasa aba badaydeaba ng'asheanji ea ASEETA gil, amadu gagoaneasa Guroorooda uurji raduutka.

⁶ Asi geawooschi daruuschi galeagasean; ak geanali gideaba damani duwea majeekcheewi sasanuukaasaan geewooschi sheageewa Ng'utamiida,

⁷ aba gideaba geebeawi masaweega, nea meebeawi deakta.

⁸ Asi eedaruusiita, ak abeeda ghang'wana geesheagiidi saseeda ak geepiidi ghoah sea Ng'utamiida.

⁹ Ada eendana ghoah ghana ea meendani, geesinyi gissiipuurbuurji ak abeeda geehoosanyi niny.

¹⁰ Aba gideaba gajeahita eesa sean madeeda hoorgeeda girgweageeda Gristo, ak abeeda gaba siisi nyas gidamiy ghanea gidamuyi, gawuurji gidida ghayi sin aba saseedean.

Duupcheeda sea ASEETA aba naweeda Gristo

¹¹ Asi, geanali gissiwaldi gheang'da Ng'utamiida, iissa geaghurghurji buuneeda; nea gidasiwuurjeewi ghwanal ASEETA, ak ghaararji gideaba ea nalaat eara aba jeesinga fughareengeagwa.

¹² Ak aseasa ea meegwarseegwa geat gicha geegasayi gideaba gajaghwara geat agooga aba badahuukaasa, ak abeeda ghoamuuschi ashaaha ng'asheegeaba fugiga gwara geat aba madeeda buuneedean nea mii aba jeeda gurooroadaanyi.

¹³ Aba gideaba iining'uleasa geeska, gweagu badayda ASEETA; ama sindeawi fughareangaasa, gweagu badahuukeagwa.

¹⁴ Aba gideaba bariinyeega Gristo iissa gwasinneasa uurda aba gideaba aseasa simwaschi gideaba siyagi ghayi ghami aba badahuuka buuneesean; asi abeeda ea nimeewa sean.

¹⁵ Ak ghami aba badahuuka buuneesean, ak abeeda fugiga majeekcheewiin ea meabiideewana badahuuka nyaawa abeeda goobiideewa dea meah aba badahuuka nyaawa amadu geetuudu.

¹⁶ Ghang'eada ghamneawa, asi aseasa meesissiini siida wassean mureeda aba ng'asheega saseeda; earapeadi aseasa sinali Gristo gideaba siida gil, amadu ghamneawa ea mudea gissinaldi.

¹⁷ Nea siida iimida jeeda Gristo, ea niiw siideesh; haleanjeedeaba garayi ning'ata, ng'ula, nihidu haleanjeeda eeshish.

¹⁸ Amadu haleanjeeda sean gwaleabu heeda ASEETA, ghayi aduupchaneasa aseasa sea niny aba naweeda Gristo, amang'ata gagoaneasa gadiyeeda giiduupcheeda;

¹⁹ nea aba jeeda Gristo gooduupchi geaw ASEETA ng'eanyiida, ak ea mang'ula giidiinyeanyeeka mida badahuuka nyaawaan ak gagoaneasa giijasta giiduupcheeda.

²⁰ Asi geewooschi fuga siicheakta bea Gristo, hean gamusiischooweasa ASEETA. Geemearmearaneegwa aba badayda Gristo, ootuupcheewana geat ASEETA.

²¹ Aba badahuukaasa geanung' ghoah niny riing'eeda nea niny ea mwanala riing'eeda, ak abeeda aba niny geahuuyi doobiiwnata ASEETA.