2 Goriinto 4 - Bibliyeeda Ghaydit

Maghasta Guroorooda aba jeeda dahuundiga sigeeda

¹ Asi aba sareani, iinukwa geandeawi gadiyeeni aba baydeayda ASEETA, ghanyea meabealbeali.

² Siheawi ng'asheega baspaseega, ea naweadinga ng'uyyeenya; ak geaheawi gideaba gajeesna milmilanda ghana eeyamujeena sea ng'asheanda ASEETA, geaghus aba ng'asheega huumeanda sirugu aba eeshpwara ak geaghwarji geat aba giliwas fughareemba sih aba madeeda ASEETA.

³ Ama deepa giijasteanya miy ea funyaat, ada abeeda geaghus ea funyaat aba heedeaba fugiga roodeadiin.

⁴ Aba sareani aseeteaba ng'eanyiini ninung' gang'oowiidi fughareenga fuga mandeawana masaweega, ak ghaweada deakta weeshinda giijasta miy mideawa giigheambiita Gristo, nea niny gawuurji sea ASEETA.

⁵ Aba gideaba meerukuuni ng'asheega badahuukaasa aseasa geeruku gideaba Gristo Yesu Ng'utamiida, ea gideaba aseasa geewooschi soomjoogeagwa aba badayda Yesu.

⁶ Ak ea ASEETA gil dea ayi, “Nung'waada weeshinda ghoabwaay jeeda misaneeda,” nea niny ghoabwaay jeesinga gurooruunatkaasa ak ghoadaw weeshinda fughareeda giigheambiita ASEETA aba gheamamda Gristo.

⁷ Asi aseasa geendeawi gheaseeda aba jeeda haleanjeeda sigeeda, ak ghoahiimu gideaba Uri hawiin gwaleabu heeda ASEETA nea maleapna heedeanya aseasa.

⁸ Geesawaneasa aba naweadinga sean, ak ea mwasuunya uurjeengaasa; iissa geehirbabanyi, ak ghanyea meanyeahani;

⁹ geesawaneasa, ak ea meenung'useasa heeda; iissa geefuteeweasa ng'eanyi, ak ea meeshealani;

¹⁰ galeagasean geesareeni badahuukaasa miyeeda Yesu, ak abeeda geatahaach eaweega Yesu aba sasanuukaasa.

¹¹ Aba gideaba aseaseeni sindiin iissa geetaydaneasa eenuuseasa galeagasean aba badayda Yesu, ak abeeda geatahaach eaweega Yesu aba sasanuukaasa jea gameewa.

¹² Abeeda gagadiiy miyeeda aba sasanuukaasa, nea gagadiiy eaweega aba sasanuukeagwa.

¹³ Amadu iinukwa geendeawi gurooroodida bea masaweegean geang'waar gideaba, “Ghaamwaschi, ak ghoah gideabalooli,” eara aseasa simwaschi, ak ghoah gisibalooli,

¹⁴ nea abeeda geanali gideaba siida ghayi adiidu Ng'utamiida was Yesu, gaygooduuneasa eara aseasa sea Yesu ak ghwayiineasa madeadaanyi sea agooga.

¹⁵ Aba gideaba ng'asheega sean gaba badahuukeagwa nea gidahaadaata dagheerjeanduumeeda muuchi, ghoahaada badiischeesiinda aba heeda fuga saang'a, aba giigheambiita ASEETA.

Giibinda aba masaweega

¹⁶ Asi majeabealbeala. Earapeadi iissa gawoosiidi sasanuukaasa, iidu gurooruunatkaasa iissa geeweeshiit giliwas eaweecha.

¹⁷ Aba gideaba sawanadeedeanya sinyaschi gaba gheadi nuwaas ak gwasinneasa giigheambiita haw manda gichea eegala,

¹⁸ aba gideaba meeng'uli haleanjeeda sidaah geaghus haleanjeedida meadaahaan. Aba gideaba haleanjeeda sidaah ghang'ata, nea haleanjeedida meadaahaan gwandeawa eaweega mamuudeana.