2 Goriinto 2 - Bibliyeeda Ghaydit

¹ Asi geateemsheesi geaw aba fughareedeanyu ak ea meaneegwa wunoodeanyu jea dabareeseegwa sawanadeeda.

² Aba gideaba iyaang'udaneegwa giiseaneega, abeeda gajea ng'eaha siida jea goohoosanan aniini ii mii siidida anung' gagiisaniini?

³ Ak ghaang'waarji gawuurji gideasindi, ak abeeda iyaawunyi ea measawanani aba heedeaba fugiga ghwanyawa jea ghwanung' dahoosaniin. Aba gideaba ghaadaayi aba huumwa aba jeedeang'wa oogasean, gideaba hooseaneegeasu gajea hooseaneegeagwa gil oogasean.

⁴ Aba gideaba geang'oorneegwa ng'asheesu nea geandeawi sawanadeeda haw ea hang'weaniidooda aba jeeda guroorooda nea geabeayi dabeaka saang'a, nea mii gideaba geagasayi asawanana gili, geagasayi anala bariinyeegeasu eandeawi aba badahuukeagwa giteena aba hawunda.

Samsiinda siida adiiy

⁵ Ama deepa ea ninung' sih ghwanyas nuut sawanadeeda, ea meagealna heedeanyu aniini, nea aba haleanjeeda mwaatkwa siiteeniida ea adinung' ghang'waaniit aba heedeang'wa oogasean.

⁶ Siida sunu ghoahiit ghoorjooda ghayi adaw fuga saang'a;

⁷ hean ghang'wana giyami geaw ak gisamsi nea gigeandeawi salgheang'da, ghana gajiidu ghwajoar giiseaneega ng'waan muuchi.

⁸ Ak geamuscheegwa gideaba oohiimsiina nea goomajeekchi bariinyeegeagwa aba headaanyi.

⁹ Nih gideang'oorsi barawajeanji gil, gideaba geagasayi dasin danal ea goosisi mureeda ng'asheega sean.

¹⁰ Siida wassean oosamsi, eara aniini gaydasamsa. Gidaneasamsi, ama deepa ea neasamsi gida wassean, nih gweagu badahuukeagwa aba madeeda Gristo,

¹¹ adaghwanyas Shataani gheata jea ghwanyagaadawa aba badahuukaasa; aba gideaba meewoosi dasheahi aba gidida gasean.

Hirbabanda Bawlo aba Drowa

¹² Hean nea ghaahiti Drowa darukwiida giijasta miy bea Gristo, ghwajaada gidaghuuta aba heedeanyu aba heeda Ng'utamiida;

¹³ ak ghanyea moapta ng'eanyi fughareedeanyu aba gideaba mwaadaahi orjeediyya was Dito aba hoowa. Ng'ata geegasayi fuufta aba badahuuka nyaawa ak geawi ng'eanyiida Makedoniya.

Joriischooda aba naweeda Gristo

¹⁴ Asi badiischeesiinda gammiisa ASEETA, nea ghoadoabiiweasa aba naweeda Gristo aba hooseaneega, ak aba aseasa ghwadarda shearooda ng'andit bea fughareadaanyi aba hiji wassean.

¹⁵ Aba gideaba aseasa geewooschi shearooda ng'andit bea Gristo aba madeeda ASEETA, aba heeda fuga laalaan ea heeda fuga nirooda,

¹⁶ aba hichpa sih shearooda ng'andit gil ng'eada miyeeda ea ghwahita miyeeda, aba hichpa sih nuut ea shearooda ng'andit ng'eada eaweega ea ghwahita eaweega. Siida nilang'uuda ng'asheesu ng'eaha?

¹⁷ Aba gideaba aseasa meewuurjeewani buuneeda suurja saang'a, fuga sheahiida ng'asheanda ASEETA; gagasa eewuurjeewana fuga mideawa doobiiwnata, was fuga adaw ASEETA gadiyeeda, aba madeeda ASEETA iissa geebalooli aba badayda Gristo.