2 Goriinto 12 - Bibliyeeda Ghaydit

Gida siihiimsa Bawlo ea giidaheachta

¹ Asi gaydaghwar geaw; earapeadi manda gichea danyagaadawa, ak gajeahiimnaan nea geatahaach Ng'utamiida.

² Aniini ghaanali siyagi aba jeeda Gristo nea aba jeemba gweanyeew damanang'wan geayaat ea eehita humng'eedeaba samwagu, ada gwandeawa saseeda ghana ea mandeawana saseeda aniini mwaanali, ghwanal ASEETA.

³ Ak ghaanali gideaba siisi geeng'ooysa Nyeamus, ada gwandeawa saseeda ghana ea mandeawana saseeda aniini mwaanali, ghwanal ASEETA–

⁴ ak gwandeawa haleanjeeda mwoamu eergu, biissa ea moamu siida rukunooda.

⁵ Aba badaydeaba siisi gaydaghwar geaw ama duuku badaydeanyu ea mwammuusi daghwara geaw, geaghus aba badayda ng'asheega ng'arng'arandeanyu.

⁶ Aba gideaba inyeeda ghwanyawa geagasayi daghwara geaw, gwachi ea maydawoos dasha, aba gideaba gaydargu ng'asheega huumwa. Iidu ghaang'waanyi geaw, ak abeeda ea manda siida jea ghoapkaat gil aba badaydeanyu ea ghang'al giteaksa heedeanyu ghana gwayiing'sa heedeanyu.

⁷ Ak gooheeleewean ghwaroodeaba geaw aba seang'ayda dagheerjeanduumeeda siitahaach, ak geegoonan aniini halaghweeneeda aba saseeda, giijasoocheanda Shataani, ak goodeawiidan, ak gooheeleewean ghwarjeeda.

⁸ Niba samwagu geamuschi Ng'utamiida aba badaydeaba ng'asheanji, ak abeeda ghang'amwanaan;

⁹ ak gwayeeshiinean niny, “Dagheerjeanduumeedeanyu ghoahiinyi, aba gideaba uurdeanyu iissa gamajeegiit aba jeeda ng'arng'aranda.” Ak gaydahoosan muuchi iyaaghwari geaw ng'arng'arandeanyu, ak abeeda goobiida uurda Gristo badaydeanyu.

¹⁰ Aba badayda Gristo, asi, naahiichi aba ng'arng'aranda, ea giing'weaka, ea sawanaduutka, ea ghabasta, ea habitkwajeega; aba gideaba damanda eawoosi ng'arng'ar, hean geawooschi majeek.

Gadiyeeda Bawlo aba heeda fuga Gorinto

¹¹ Naadashaahiichi! Ak ghoanung' agooga dasinu, ak gahaguuwan gideaba gajagwarsean agooga. Aba gideaba meawoosi mwanang'eawa giijasoodiga suurja hees, earapeadi meawoosi giliin.

¹² Nea gwadeagwajeega giijasoocheanda huumwa sisin aba jeedeang'wa aba milikghteayda sean, aba gwadeagwajeega ea deamdeamanga ea gadiyoojiga hees.

¹³ Iidu ea niishoadeewaneegwa naaha ea eamoowuurjeewani ganiisajeega suurja, geaghus gideaba aniini miidasawaneegwa? Asamsean aba badaydeaba ramaseanji!

¹⁴ Nih ghamneawa deaba samwagu nea geawooschi hidaat aba wunooda heedeang'wa. Ak ghanyea maydoaw sareenda, aba gideaba miidagasa haleanjeedeang'wa, ghaaghuschi gassoodeang'wa agooga; aba gideaba mamiisiina diibiga gideaba gaygoodiiwsheesa ghweaniga nyaawa, ea gheamadiga nyaawa, geaghus goodiiwsheesa ghweaniga ea gheamadiga diibiga nyaawa.

¹⁵ Nea aba gideahoosandi aniini iyeagadiyeati nea geegadiyeetanean, aba badahuuka gurooruunatkeagwa. Asi iyaabwariinyeegwa muuchi, abeeda gajeabwariinyan gil mwanang'i?

¹⁶ Asi eanung'waada gwasunu, aniini miidasawaneegwa, geawooschi milmili, ak gooyeenyi, ghaawaamnyeegwa aba ghasooda.

¹⁷ Neada ea mwaanyagaadawaneegwa aba badahuuka fuga eajeagu?

¹⁸ Ghayi geareekusi Dito nea geayeeshi una, ak geajeagu orjeedida bea giyeanyean sea niny. Neada Dito ea ninyagaadawaneegwa aba gili? Neada aseasa ea meegadiyeatani Gurooroodida? Neada ea mealaabwaadani geeshangiga?

¹⁹ Ghoang'wa apkaada gideaba geefurji geat aba heedeang'wa? Nih aba madeeda ASEETA geebalooli aba jeeda Gristo, nea aba sean geedeegu bariinyeegeagwa, fuga aabwariinyi.

²⁰ Aba gideaba ghaawali dahidu ak ea moowuurjeewani gida eagasiidi dahidu nea goowuurjeewi, ak ea moahiimni nea geewuurjeewi gidida moogassiidaniin; ea gideaba gwadeepa gwanda jaliida, geawunda gheang'da, ea nyarasta, shidoodeaba ghaang', giiheakteayda, soomeanda baloolda, reengaweega ea deakghuyandeeda.

²¹ Aniini ghaawali gideaba gajiidu iyaawunyi gicha gayghwahiing'naan ASEETEANYU aba madeedeang'wa, ak abeeda geagiisanyi aba badahuuka fuga saang'a ghayi sin riing'eeda amwadiin ak ea mii gwaduukuuna munyinda, ea munyinda, ea hiseadayeanduumeeda ghayi sineadayi.