2 Goriinto 11 - Bibliyeeda Ghaydit

Bawlo ea giijasoodiga ng'uyyeega

¹ Gideabali ghwanyawa ghoamilikghti leendeedeanyu gilimwanang'. Amilikghta sea aniini!

² Aba gideaba aniini geashiseegwa ghaang' aba shidoodeaba ghaang' bea ASEETA, aba gideaba neanyeariiseegwa Gristo ak ghaadaydaneegwa awuurjeewana sibeeda miy weesa ng'eedeanagi.

³ Iidu ghaabeali, gawuurji gidaghayi reenganiida ichibooda Hawa aba milmilandaanyi, gajeehuteawi fughareengeagwa ak ghoanung'waadi doobiiwnata ea alooheeda Gristo.

⁴ Aba gideaba iihidu siinuut ak gwarukuneegwa Yesu nuut nyooh ea mii dea ghayi sirukuneegwa, ghana oang'waanya guroorooda nuut mawoosa dea oang'waanyi, ghana iyoamwaschi giijasta miy nuut mawoosa dea ghayi oamwaschiiin, abeeda goosisi mureeda gidida.

⁵ Aba gideaba ghaaghanyi manda gidashoadeawanaan aba gidamideawa giijasoodiga hees.

⁶ Earapeadi aniini eawooschi siida moamu gabalooliin, nih mii gideawuurjeewi aba fughareeda gil; naweadinga sean sinung'unyi ghwadaajiit ng'asheesu aba heedeang'wa aba haleanjeeda sean.

⁷ Heapi aniini neasinyi riing'eeda iyaayaachi geaw ng'eanyi ak abeeda geakghaambiideegwa, aba gideaba ghayi gearukuneegwa giijasta miy bea ASEETA nea moataydani gili?

⁸ Naareachi ganiisajeega suuk haleanjeeda nyaawa goonan saawa ak abeeda ghaaweacheegwa.

⁹ Nea aniini damanda sindeayeewi nea geegasayi weetean, ghanyea mii dasawan siida wassean, aba gideaba haleanjeeda eagasayi gagoonan fuga eaduupcheewi leabu Makedoniya. Ak geaheeleewi geaw haleanjeeda sean ak ea measawaneegwa aba gida wassean.

¹⁰ Ak gawuurji gidabiideata huumeanda Gristo jeedeanyu, ghanyea manda siida jea gwadukuta ghuuteanyu aba ghwaroani bea geawiin aba darooraka ng'eanyiida Akaya.

¹¹ Aba naaha? Gweagu gideaba mabwariinyeagwa agooga? Ghwanal ASEETA gideaba ghaabwariinyeegwa!

¹² Nea gideagasayi dasin gaydasin, ak abeeda ghabwaanyi ng'asheegeaba fugiga gasa aba jeeda gadiyoojiga nyaawa bea ghwarjeedean gwasinda gadiyeeda gidasisindi aseasa.

¹³ Aba gideaba fuga uurji suh giijasoodiga ng'uyyeenya, nea iissa gwasin gadiyeeda aba reengaweega, fuga iissa ghwayam geat ak gwasin geat giijasoodiga Gristo.

¹⁴ Ak ea mayghaham fih ng'eanyi, aba gideaba eara Shataani iissa ghwayamyam geaw gawuurji malaykajeanda weeshinda.

¹⁵ Ada abeeda ea mii ng'asheanda haw gil gideaba eara soomjoagaaschi earaga iissa ghwayam geat ak gawuurji soomjooga doobiiwnata. Huuydeanda nyaawa gaygawuurji sea gadiyoojiga nyaawa.

Sawanadeeda Bawloheeda was giijasoocheanda

¹⁶ Asi gearugu gicha gideaba, adaghwanung' siida doaw gili eawooschi dasha; earapeadi oanung' dasinuun, amwastanaan siitasha, ak abeeda eara aniini ghaaghwarji geaw gilimwanang'.

¹⁷ (Ng'asheega eargu mearukuni aba gheambalmeeda Ng'utamiida geawuurjeewi siida dasha, aba jeedeaba ghwaroani bea geaw aararji;

¹⁸ nea fuga saang'a iissa ghaghwara geat haleanjeeda ng'eanyiida, ak eara aniini gaydaghwar geaw.)

¹⁹ Aba gideaba hooseaneegeagwa ghamilikghta fuga dasheahi, nea agooga goowooschi weaghoodi!

²⁰ Aba gideaba iissa ghoamilikghti eara siida nung' ahuwa giing'oonyanga ghana ghwanukghutaneegwa, ghana ghwanyagaadawaneegwa, ghana ghwayiineegwa heetiyeada, ghana ghwalas gheamamuunatkeagwa.

²¹ Aba baspaseegeasu, gaydayi, aseasa geewooschi ng'arng'ari aba ng'asheanji! Nea gida wassean ghwara geaw siida gaydaamu eara aniini gaydaghwara geaw, geabalooldi siitasha, eara aniini gaydaamu daghwara geaw gidida.

²² Saawa ea fuga Ebraniyahi? Eara aniini geawooschi. Saawa fuga Israeli? Eara aniini geawooschi. Saawa jeata Abrahamu? Eara aniini geawooschi.

²³ Saawa soomjooga Gristohi? Ghaaraanyi aniini, geabalooldi siida geeska, biissa gaba gadiyeeda haw, ghaaraanyi muuchi aba ghealooniga, bea bayiiga mwoamu eeyiida, nea ghaariikghti aba miyeeda galeagasean.

²⁴ Aba heeda fuga Yahudi naanyaschi bayiiga niba muut naanyaschi bayi haradam shoada akaleala.

²⁵ Sibwaranaan fuga Rumi ng'aritka niba samwagu; ak ea sifuteewean lagheanga nibwagi. Ak ea ninyar maleambooda niba samwagu; ak geabiidi jeeda basooda eawa ea askweari;

²⁶ aba bareanyeekeasu bea galeagasean, iissa gwaramaknean guldeayda ghealooniga iissa geashageadi aba fuga areedi buuneeda haleanjeeda, ak geashageadi aba eemeedeanya, ak geashageadi aba Eemoojiga, ak geashageadi aba mujiini, ak geashageadi aba dareapcheeda, ak geashageadi aba jeeda basooda, ak geashageadi aba fuga eaduupcheewi bea ng'uyyeenya,

²⁷ aba sawanadeeda ea deawiitmeeda, ea giing'weernooda galeagasean bea eawa, aba jalooda ea muwooshta, iissa ea hoaghuut ea meandeawani hamita, aba jeameeda ea ng'ayinda hang'weaka.

²⁸ Ea mabeachi ng'asheesu, gwanda eara ng'asha suuk aba badaydeanyu bea galeagasean, nea machmajooda ng'ulooda ganiisajeega seani.

²⁹ Ak ea ng'eaha gil siida ng'arng'ar, ak ea mwaang'arng'ariidi aniini? Ak ea ng'eaha siida sinung' ghoabeada, ak ea mwaanyareasi aniini?

³⁰ Iimiisean ghwaroodeaba geaw, gaydaghwara geaw haleanjeeda ahiimu ng'arng'arandeanyu.

³¹ ASEETA was Bwaabeeda Ng'utamiideanya was Yesu, ninyeeda ghayi sibadiischeesa ea ghoah damanda manda muudeanooda, ghwanal gideaba mearukuni ng'uyyeenya.

³² Abeeda aba hoowa bea Dameskiin sugoocheanda mida hing'eadayda sugoocheanda haw bea ng'eanyiida Areta abeeda gafur mujiineeda Dameski ak abeeda ghoang'waanyan,

³³ ak geeraraang'daawaan sooscheanda ak geesiigan seawadeeda ghamarda, ak ghaadaraamnyi geatingaaschi.