2 Dimoteo 3 - Bibliyeeda Ghaydit

Eawoojiga huuydean

¹ Ak ginali ng'asheanji gideaba eawoojiga huuydean gay gwanda washta.

² Aba gideaba buuneeda gaygaba nih bwariiy geaw, ak gaygaba siisi bwariiy lapiya, gaba nih ghwargeaw ea gea weashweashta ea gea giing'weaka ea fuga mamwasa ng'asheega jiilnoodiga nyaawa, ea gea mandeawana badiischooda, ea gea mii miyaas,

³ fuga magasa fuga gheanyaawa, ea gea magasa giiduupcheeda, ea gea naba ng'uyeega, ea gea moamu ghwadeal geat, ea gea ng'weani, ea gea mabwariinya ng'asheega miyaas,

⁴ ea gea leapa geat bwadaw ea fuga hang'oonyi iheeni, ea gea gwara geat, ea gea bwariiy mitagheasta muunda ng'eanyiida nea mwasamwa ghabwariiy ASEETA.

⁵ Inyeessa gawuurji gili bada ASEETA ak ghaheawa uurdaanyi ang'aamwana geaw fiisu.

⁶ Aba gideaba aba jeedeaba suh gwanda headiga ama inyeessa gaweay jeesinga gealga buuneeda ak gageanda nea ghwasareanda gadeemga dasheahi mideawa sareenda riing'eeda nea gagis mitagheasta muunda ng'eanyiida.

⁷ Gadeemsu inyeessa gagasa nalooda ng'asheega galeagasean ak ea moamu earahay nalooda huumeanda.

⁸ Nih gawuurji gidaghayi heawaata geaba Yane ea Yambure ng'asheega Musa ak eara fiisu ghaheawa huumeandida ak suh ea fuga nidatasa fughareenga nyaawa gil, ak ea siheawa aba ng'asheega masaweega.

⁹ Ak ea mayghang'ata mwadi muuchi aba gideaba leendeenyaawa gayghwadaajiiti aba heeda buuneesean, gawuurji gitaajiita leendeedeaba fiisu.

Ng'asheega huuydean

¹⁰ Ak ang'iing'i ea niyaadi geeshta giinealshoodeanyu ea gideabadiiniidi ea gideagasiidi ea masaweega ea milikghteayda,

¹¹ ea bariinyeega ea milikghteayda ea sawanaduutkeasu bea ng'asheega ghayi aanyaschi aba ng'eanyiida Antiyokiya nea Ikoniyo ea Listra, bea haleanjoojiga sawanaduutka ea milikghteaysi ak gwalealneani Ng'utamiida aba suh seaniin.

¹² Huumwa gil siida wassean iigasa giibinda ea badita Gristo Yesu gayghwanyas sawanadeeda.

¹³ Ak fuga munyas searooji ea gea ng'uyeega gayghang'ata mwadi ak ghwaraanya buuneeda nea eara saawa geereengani.

¹⁴ Asi ang'iing'i abiidana jeeda ng'asheega ghayi sinaalnyi nea geesikteawean aba gideaba ginali gideaba geabeang'a gil gea ghayi anaalnyi.

¹⁵ Aba gideaba ghang'eada jeepcheanduumeeda ninali ng'ooruutka ghaydidi jea ghwanung' nyasa weaghuumeeda ea nyasa lealeanooda aba naweeda Gristo Yesu aba masaweega.

¹⁶ Giliwas ng'oorda mideawa Jeameeda ASEETA ghwahit aba giinealshooda ea reekusiinda buuneeda aba giidiinyeanyeeka nyaawa ea giidoobiiwda nea ghwanyas ghoorjooda doabiiwaat.

¹⁷ Abeeda ea hidaat siida gadiyeeda ASEETA nea sinung' ghwahit ak gwasin giliwas gadiyeeda miy.