2 Dimoteo 2 - Bibliyeeda Ghaydit

Shirikarajeanda doabiiwaat bea Yesu Gristo

¹ Asi ang'iing'i orjeedeanyu, daruusiida aba jeeda dagheerjeanduumeeda mida jeeda Gristo Yesu.

² Ak ng'asheega ghayi iyiing'si heedeanyu aba madeeda muushoodiga saang'a iina ng'asheega geatinga fuga doobiiweadi jea ghoamu ghwanal suurja.

³ Eepareanyeena sawanadeeda sea aniini, gawuurji shirikarajeanda doabiiwaat bea Gristo Yesu.

⁴ Shirikarajeanda mida jeeda ng'ucheeda maygwadeawiit aba haleanjeeda muunda ng'eanyiida aba gideaba gaygoohoosan shirikarajeandaanyi haw.

⁵ Eara siida iigaleada aba jeeda deangheeda mwajeataw shiipka iimagaleada muuchi.

⁶ Siida barooda Sin gadiyeeda hang'waay gammiisa gideaba gayghwanyas haghweega madeeda.

⁷ Ateemsheesiina muuchi ng'asheesu sean earguun, aba gideaba gaygagoonyi Ng'utamiida fughareeda aba badayda ng'asheega sean.

⁸ Apkaada Yesu Gristo, dea ghayi duuna miyeeda, bea dooshta Dawdi, gawuurji gidanyaashta Giijasteanyu.

⁹ Aniini geesawanan aba badaydeaba Giijasi miyiin, ea eeyaadan ghealooniga dawuurji siida Sin ng'asheega munyas, ak ng'asheega ASEETA ea mwajearat.

¹⁰ Ak aba sareani geamilikteaysi ng'asheega sean aba badayda fuga loat ASEETA, gideaba eara saawa ghwanyas lealeanooda mida jeeda Gristo Yesu ea giigheambiita ea eaweega manda muudeanooda.

¹¹ Ng'asheanji gammiisa masaweega. Gideaba Aba gideaba iisimeewuday sea niny gajeepiidana sea niny.

¹² Nea iisimilikghiti, gajeembaliischeena sea niny, Nea iisiheawi niny, niny earada gay ghaheawaneasa.

¹³ Nea aseasa iimeawasi doobiiweadi, niny doobiiwnataanyi ea maygoosha– aba gideaba niny mayghaheawa geaw.

Siida gadiyeeda mwas ASEETA

¹⁴ Apkeasiina fugaagu ng'asheesu nea gireekusi aba madeeda ASEETA gideaba ghoabuut ng'asheega ng'alealeeda mwaloada gil nung' gwarooda fuga aleeysiit.

¹⁵ Milmiliida eadaanyi gideaba nimwasnyi ASEETA, siida gadiyeeda mabwaspwasa aba gadiyeadaanyi, ak giinaali ng'asheanda huumwa aba gidamiisiinda.

¹⁶ Ang'aamwana geaw ng'asheega mwaloada gil, mawoosa gea diiniin giika mamwasa fuga ASEETEAN, aba gideaba fuga sunu gayghoabita jeeda ng'asheega munyas.

¹⁷ Ak ng'asheanda nyaawa gaygageawiit iita ea gawuurji udamusuura. Aba jeedeaba suuk gwanda geaba Himenayo ea Fileto.

¹⁸ Nea saawa ea ninung'waada naweedida bea huumeandean nea geebaloola gideaba duunooda goola ghwahidu, ea ghwayam masaweega buuneeda mwaatkwa.

¹⁹ Ak sindeeta ghayi iin ASEETA ea nimiinaada nea majeek, nea uhuudaanyi geengoorsa ng'asheesu, “Ng'utamiida ghwanal gea was gaaschi.” Ak gicha “Gilinyoo gwaruku gheawunga Ng'utamiida ea danung'waada ng'asheega munyas.”

²⁰ Aba jeeda gheeda haw manda dabita gharinga meeng'meeng'i ea dabita gharinga ak ea mabeachi suh, gwanda eara gea geediga ea gea sigeeda suuk gwanda gea mureeda suuk ea mandeawana.

²¹ Ak siida iyaamiidu geaw ak gooheeli geaw ng'asheesu munyasiin niny abeeda gayghoah dabicheanda siihuun ak ghwanyas mureeda haguuwsa Ng'utamiida ak sinoadaanyi geebaysiina gwasin gadiyoojiga sean miyaas.

²² Asi mang'wana ng'asheega munyas bea gheareemaneanduumeeda was geawunda gheang'da, aada geeshta ng'asheega doabiiw ea masaweega ea bariinyeega ea hoyyoo sea fuga sean guuriisa Ng'utamiida aba jeeda miy.

²³ Asi heawana sheang'nyeeda leendeeda manda jeeda fughareeda, ak ginali gideaba sheang'nyeeni gaygwaji jaliida.

²⁴ Ak ea mamiisiina siida gadiyeeda Ng'utamiida gaba jaliida, gammiisa gideaba gajea garbabu aba heeda buuneesean, biissa nala goonealshi ak gamilikiida ng'asheega.

²⁵ Aba damandida reekusiina fuga mamwasa ng'asheagaaschiin, gammiisa ea garbabu aba gideaba iideepa gwasa gwadeepa ghoadaw ASEETA fiisu duukuunooda ak ghwanal huumeanda.

²⁶ Ak gabiiksa fughareenga nyaawa, ak gwariteawa jeeda gadageeda Shataani ghayi ang'waay saawa ak gwasin gidagasiida Shataani.