1 Yohaana 5 - Bibliyeeda Ghaydit

Jooriischoodeanya aba badayda ng'eanyiida

¹ Siida wassean mwas gideaba Yesu niny Gristo gil siisi baleanda ASEETA, siida wassean bwariiy ghwaan ea ghaamwat ghabwariiy baleanda.

² Aba seareani geanali gideaba geabwariinyi diibiga ASEETA, iisibwariinyi ASEETA nea geang'waanyi diigheanyeekaaschi.

³ Aba gideaba nih bariinyeega ASEETA, nea gideaba geesisi mureeda diigheanyeekaaschi. Nea diigheanyeekaaschi ea miidurumani.

⁴ Aba gideaba gisijiila ASEETA iissa ghwajoar ng'eanyiida; nea nih ea jooriischooda joar ng'eanyiida gil, nea masaweagaasa.

⁵ Aneeda dea joar ng'eanyiida ea ng'eaha meakghusa dea mwas gideaba Yesu Orjeeda ASEETA?

⁶ Nih deaghayi wuna beega gil ea foojeanda, Yesu Gristo, ak ea meakghusa beega ak ghwahit ghoana beega ea foojeanda.

⁷ Ak Guroorooda ea dea muuwu gil, aba gideaba Guroorooda huumeanda.

⁸ Gwanda muushoodi samwagu, Guroorooda gil, ea beega ea foojeanda; asuh asamwaguun ghamwas geat.

⁹ Iisimwaschi muuwuunooda buuneeda, abeeda muuwuunooda ASEETA aahaw muuchi; aba gideaba nih muuwuunooda ASEETA gil gideaba nimuuwu iita Orjeedaanyi.

¹⁰ Siida mwas Orjeeda ASEETA gwandeawa muuwuunoadaanyi aba jeadaanyi. Nea dea mamwasa ASEETA ghwanung' gaba ng'uya, aba gideaba mamwasa muuwuunooda ASEETA aba badayda Orjeedaanyi.

¹¹ Ak nih ea muuwuunooda gil, gideaba, ASEETA gagoaneasa eaweega manda muudeanooda, ak eaweesu gwanda jeeda Orjeedaanyi.

¹² Siida mideawa Orjeeda gwandeawa eaweega; nea dea mandeawana Orjeeda ASEETA ea mandeawana eaweega.

Eaweega manda muudeanooda

¹³ Geang'oorneegwa ng'asheesu agoogeeni mwas gheawunga Orjeeda ASEETEAN, ak abeeda ghoanali gideaba goondeawi eaweega manda muudeanooda.

¹⁴ Nea nih ea gidaararji gil aba headaanyi, gideaba iisimuschi gil aba gidagasiida niny gayghwayiinyeasa.

¹⁵ Ak iisinali gideaba gayghwayiinyeasa aba giliwas sean simwaashchi, geanali gideaba gajeanyasa haleanjeedida sigasayiin.

¹⁶ Siida wassean iidaah orjeeda ghaamwat nea gwasin riing'eeda maba miyeeda, abeeda damwaasha ghawooda, ak gayghoadaw ASEETA eaweega aba badahuukeaba suh sina riing'eega maba miyeedean. Gwanda riing'eeda was dea miyeeda; meayeeni gayghamwaash ASEETA aba badaydeaba nih.

¹⁷ Gida wasean mwadoabiiwa riing'eeda gil, ak gwanda riing'eeda mawoosa dea miyeeda.

¹⁸ Geanali gideaba giliwas Orjeeda ASEETA maygwasin riing'eeda, ak Orjeeda ASEETA gaygafurgeaw, ak eara diita muyiin ea mayghwasat.

¹⁹ Aseasa geanali gideaba geebeayi ASEETA, ak ng'eanyiisean goombal diita muyiin.

²⁰ Ak aseasa geanali gideaba Orjeeda ASEETA goola ghwahidu, ak gagoaneasa fughareeda eanala ninyeeda was huumwa; ak aseasa geendi jeadaanyi ninyeeda was huumwa, aba jeeda Orjeedaanyi was Yesu Gristo. Nih dea was ASEETA huumwa gil, ea eaweega manda muudeanooda.

²¹ Diibiga manang'i, afura geat aba haleanjeeda sinung' ghoah aseecheeka.