1 Yohaana 4 - Bibliyeeda Ghaydit

Guroorooda huumwa ea dea ng'uyeega

¹ Fuga aabwariinyi, adoamwaschi giliwas guroorooda, iissa ghoonyo asima gurooruunatsu ak ghoadaayi ea gaba ASEETA; aba gideaba nihidu jeeda ng'eanyiida sibanga saang'a bea ng'uyeega.

² Aba nih abeeda gajanala Guroorooda ASEETA: guroorooda mwas gideaba Yesu Gristo nuwu nea ghoana saseeda gaba ASEETA,

³ nea guroorooda wassean mamwasa Yesu maba ASEETA. Nih guroorooda heawa Gristohi, was deaghayi oayiinyi gideaba gayghwahidu, ak ghamneawa ea nigeawiit ghwahidu jeeda ng'eanyiida.

⁴ Diibiga manang'i, agooga goobeayi ASEETA, ak ea noajoarji saawa; aba gideaba dea mida jeedeang'wa ea haweewa dea mida jeeda ng'eanyiida.

⁵ Suh gaba ng'eanyiida, ak gabaloola ng'asheega ng'eanyiida, ak gooleeysiit ng'eanyiida saawa.

⁶ Aseasa geebeayi ASEETA. Siida nal ASEETA gaygooleeyseasa iit, nea dea maba ASEETA ea maygooleeyseasa iit. Ak aba seareani gajeanala guroorooda huumwa ea guroorooda ramaseanda.

ASEETA bariinyeega gil

⁷ Orjoogeasu aabwariinyi, eabwariinya geat aba gideaba bariinyeega gwaleabu heeda ASEETA, ak giliwas sih mideawa bariinyeega gwajiilu ASEETA, ak ghwanal ASEETA.

⁸ Nea siida mandeawana bariinyeega ea miighwanal ASEETA aba gideaba ASEETA bariinyeega gil.

⁹ Aba seareani bariinyeega ASEETA geataajiit aba jeedeanya, gideaba ASEETA goojeagu Orjeedaanyi was haghasheeda badayda ng'eanyiida, ak abeeda geanyaschi eaweega aba badaydaanyi.

¹⁰ Nea nih ea bariinyeega, mii gideaba geabwariinyi aseasa ASEETA ghabwariinyeasa niny ak goojeagu Orjeedaanyi ghoah dea adayda leadeeda riing'eegaasa.

¹¹ Fuga aabwariinyi, iinukwa ghabwariiyduneasa ASEETA, gammiisa gideaba gajeebariinya geat.

¹² Manda siida nidaah ASEETA; iisibwariinyayi geat, abeeda ASEETA goobiida jeedeanya, ak bariinyeagaaschi ea majeek aba jeedeanya.

¹³ Aba seareani geanali gideaba geepiidi jeadaanyi, ak eara niny gwanda jeedeanya, aba gideaba nigooneasa Gurooroadaanyi.

¹⁴ Ak aseasa ea sidaayi nea simuuwu gideaba Bwaabwa niijeagu Orjeedaanyi ghoah lealnoocheanda ng'eanyiida.

¹⁵ Giliwas sih mwas gideaba Yesu Orjeeda ASEETA gil, abeeda ASEETA goobiida jeadaanyi nea goobiida niny jeeda ASEETA.

¹⁶ Aseasa geanali ak geamwaschi ASEETA aba badahuukaasa. ASEETA bariinyeega, nea siida abiida jeeda bariinyeega, goobiida jeeda ASEETA, ak goobiida ASEETA jeadaanyi.

¹⁷ Aba jeedeaba bariinyeesu simajeegiichi aba heedeanya, ak geamwaschi aba eaweeda girgweageeda, aba gideaba giduurji niny ea gisiwuurjeewi gil aba badaydeaba ng'eanyiini.

¹⁸ Aba jeeda bariinyeega manda muuwda, ak bariinyeega huumwa gaygageanda muuwda. Aba gideaba muuwda gwandeawa ghoorjooda, ak siida mideawa muuwda ea mii hidaat aba bariinyeega.

¹⁹ Aseasa geabwariinyi, aba gideaba goosheeda niny ghabwariinyeasa.

²⁰ Siida iyayi, “Ghaabwariinyi ASEETA,” nea ghwasit orjeeda ghaamwat, abeeda siisi gabang'uya; aba gideaba siida mwabwariinya orjeeda ghaamwat nidaah, moamu ghabwariiy ASEETA miighwadaah.

²¹ Ak diigheanji gagooneasa niny gideaba siida bwariiy ASEETA, dabwariinya eara orjeeda ghaamwat.