1 Yohaana 3 - Bibliyeeda Ghaydit

Diibiga ASEETA

¹ Ang'ula nih bariinyeega uurjiin gil gooneasa Ghweanda, bea gideaba eeguureewaneasa diibiga ASEETA, ak ea gidasiwuurjeewi gil. Ak abeeda ghoah gidamwanalaneasa ng'eanyiida ak ea mwanala niny.

² Orjooga aabwariinyi, asi ghamneawa siwooschi diibiga ASEETA; ak ea miighwadaajiit gichea eewuurjeewana, ak geanali gideaba iihidu gajeewuurjeewana niny, aba gideaba gajeadaaha giduurji.

³ Nea giliwas sih rar niny iissa ghoamiidu geaw gawuurji gidamiyda niny.

⁴ Siida wassean sina riing'eeda gwandeawa ramaseanda aba deaweeda; aba gideaba riing'eeda ramaseanda deaweeda gil.

⁵ Nea ghoanali gideaba niny ghwaan gageanda riing'eega, nea niny jeadaanyi ea manda riing'eeda.

⁶ Manda siida mida jeadaanyi ak gwasin riing'eeda; ak ea manda siida sina riing'eeda jea ea nidaah niny ghana ghwanal niny.

⁷ Diibiga manang'i, adagwareenganeegwa sih; siida sina ng'asheega doobiiweadi gwandeawa doobiiwnata, gawuurji gidadoabiiwaata niny.

⁸ Siida sina riing'eeda gaba meang'nyeandeenda; aba gideaba meang'nyeandeenda ghayi gabean gwasina riing'eeda. Gissibaysiina wunooda Orjeeda ASEETA geataajiit ghwadatas gadiyeeda meang'nyeandeenda.

⁹ Manda siida jiilu ASEETA ak gwasina riing'eeda; aba gideaba seareeda ASEETA gwanda jeadaanyi, ak ea maygwasin riing'eeda aba gideaba gwajiilu ASEETA.

¹⁰ Aba nih abeeda gajeadaah gideaba diibiga ASEETA akeega gil, ak ea akeega gil diibiga meang'nyeandeenda, aba gideaba dea masina ng'asheega doobiiweadi maba ASEETA, ghana dea mwabwariinya orjeeda ghaamwat.

¹¹ Aba gideaba nih giijasta ghayi oobean ayiinya aba mwadi gil, gideaba abwariinya geat,

¹² ak ea adoowuurjeewi Gayni ghayi was siida muy ak gwanuus orjeeda ghaamwat. Ak ghwasaan inyas gwanuus? Gweagu searoojigaaschi munyas nea orjeeda ghaamwat ea doabiiwaat.

¹³ Orjoogiyya, adaghahameagwa ng'eanyi, aba gideaba ghwasteagwa ng'eanyiida.

¹⁴ Aseasa geanali gideaba sisuuchi miyeeda ak geeweayi jeeda eaweega, aba gideaba geabwariinyi fuga siduupcheewi. Nea dea mandeawana bariinyeega goobiida jeeda miyeeda.

¹⁵ Giliwas sih nyooh ghwasit orjeeda ghaamwat abeeda gwanuusa buuneeda, ak agooga ghoanali gideaba siida nuusa buuneeda mandeawana eaweega manda muudeanooda aba jeadaanyi.

¹⁶ Aba nih sinali bariinyeega, aba gideaba niny gabeagu eaweagaaschi aba badahuukaasa; asi gamiiseasa eara aseasa eebeakna eaweagaasa aba badahuuka orjooka.

¹⁷ Nea siida iimideawa haleanjeeda ng'eanyiida ak ghwadaah orjeeda ghaamwat nea gwanda gidagasa, ak ghaweada gida aba jeadaanyi, abeeda bariinyeega ASEETA gwandeataan jeadaanyi?

¹⁸ Diibiga manang'i, adeabwariinyi aba ng'asheanda ghana baloolda gagasa eabwariinya aba sinooda ea huumeanda.

¹⁹ Aba nih gajeanala gideaba geebeayi huumeanda, ak geesikteawi aba jeesingaasa aba madeadaanyi

²⁰ iyargweakseasa gurooruunatkaasa; aba gideaba ASEETA ea haweewa gurooruunatkaasa, ak ghwanal haleanjeeda sean.

²¹ Fuga aabwariinyi, iimeargweakseasa gurooruunatkaasa, abeeda geandeawi gidasirarji aba madeeda ASEETA;

²² ak iissa geenyaschi gidasimuschi, aba gideaba geang'waanyi diigheanyeekaaschi nea geesinyi gidabwariiy niny.

²³ Nea nih ea diigheandaanyi gil, gideaba ea mwasa gheawunga Baleandaanyi was Yesu Gristo nea geebariinyayi geat, gawuurji gidagoondaneasa.

²⁴ Buuneesean ang'waay diigheanyeekaaschi goobiita jeadaanyi, nea goobiida niny jeenyaawa. Aba sareani abeeda geanali gideaba goobiida jeedeanya, aba Guroorooda ghayi gooneasa.