1 Yohaana 1 - Bibliyeeda Ghaydit

¹ Gidida ghayi ng'eat aba mwadi ghayi siyiinyi, ak geadaayi aba gheanyangaasa, ak geedaayi nea geang'waanyi aba geatingaasa, was ng'asheanda eaweegean–

² nea eaweega geanung' ghwadaajiit, ak geadaayi, ak geemuuwu, ak geerukuneegwa eaweega manda muudeanooda mida heeda Bwaabwa ak geanung' ghwadaajiit aba heedeanya–

³ gidida ghayi sidaayi ak geayiinyiin geerukuneegwa eara agooga ak abeeda goobareanyi sea aseasa; nea bareanyeedeanya gwanda heeda Bwaabwa ea heeda Orjeedaanyi was Yesu Gristo.

⁴ Ak geeng'oorneegwa ng'asheesu ak abeeda ghwahit hooseaneagaasa.

⁵ Nih ng'asheanda ghayi siyiing'si headaanyi gil ak geerukuneegwa, gideaba ASEETA weeshinda gil ak jeadaanyi ea manda misaneeda earahay.

⁶ Iisiyeenyi geebareanyeewi niny nea geeneayeewi jeeda misaneeda, geenapchi ng'uyeega nea meepiidani naweeda huumeanda;

⁷ nea iisineayeewi jeeda weeshinda, gawuurji gidamideata niny jeeda weeshinda abeeda ea sibareanyi aseasa, ak foojeanda Yesuheeda was Orjeedaanyi gaygoohuun riing'eegaasa sean.

⁸ Iisiyeeshi geat meendeawani riing'eeda, geereenganayi geat, nea ea manda huumeanda jeedeanya.

⁹ Nea iisiduukuuni riing'eegaasa, niny awaam nea doabiiwaat, ak gaygwasamsa riing'eegaasa, ak goohuuneasa aba haleanjeeda sean mwadoabiiwa.

¹⁰ Iisiyeeshi geat miyeesina riing'eeda, geanung' gaba niny ng'uya, nea ng'asheandaanyi ea manda jeedeanya.