1 SAMWELI 29 - Bibliyeeda Ghaydit

Fuga Filisti gafool Dawdi

¹ Iimuchu ghabwada geat fuga Filisti lugweega nyaawa aba Afeki; nea nisin fuga Israeli museasooda aba gheanyanga eeniga mida Yesreeli.

² Damanda ng'ataawa fuga hees bea Filisti nea gabeewa bughalajeega ea sagalamnyoojiga gamaseaw Dawdi ea fugaaschi ak ghang'ata nea gahuuydean niny ea Akishi,

³ ak gwayi shirikareeda hees bea fuga Filisti, “Gwasin naaha fiisu bea Ebraniyahiin aba hiji?” Ak gwayeesha Akishi shirikareeda hees bea Filisti, “Neada siisi ea mii Dawdihi, was siida gadiyeeda Saulihi was sugoocheanda Israeli, eandeaydooscheewi eawooji ea gweanyeeka, damanda nung'usiinanean heeda ak ea mii daadaw munyinda ea ghoah askweareani.”

⁴ Iidu gwanyareeksa shirikareeda hees bea Filisti niny, ak gwayeesha shirikareeda hees bea Filisti niny, “Adealda siida gabiikta heeda igasayi goobiida niny, majeeteayeewana ng'ucheeda, aba gideaba gajiidu ghoah washteanya. Neada siisi gaygooduupcheataan geaw sea ng'utamiidaanyi? Neada ea maygwasin aba iheengeaba fiisu?

⁵ Neada ea mii Dawdeeda ghayi sarmana buuneeda badaydaanyi nea ghang'wasi, ‘Sawli nibwar sagalamnyoojiga, Nea Dawdi ghabwar sagalamnyoojiga niba damanamughuush’?”

⁶ Ng'ata gaguursa Akishi Dawdi ak gwayeesha, “Aba gidabiideata NG'UTAMIIDA, ang'iing'i guwoosi doabiiwaat, ak ghaadaayi aniini gideaba ghwahit gideaba gajuna nea gibiigu sea aniini aba ng'ucheeda; aba gideaba mii dadaah gidamuy aba headaang'u ghang'eada damanda aadaahaneey nea gihidu heedeanyu ea ghoah askweareani. Duuku fuga hees ea magasseey.

⁷ Asi ghamneawa biikta; ak guwi nea gibeahi hoyyoo, ak ea adisini gichea ghoanyareas fuga hees bea Filisti.”

⁸ Hean ghwalamda Dawdi ak gwayeesha Akishi, “Neada ea neasinyi naaha? Neada ea nidaahi naaha aba heeda siidaang'u bea gadiyeeda ghang'eada damanda aawuni gadiyeadaang'u ea ghoah ghamneawa, ea ea meawani ng'ucheeda dang'uchi sea weajoodiga ng'utamiideanyu was sugoocheanda?”

⁹ Ak ghwasha Akishi ghuuta Dawdi ak gwayeesha, “Aniini ghaanali gideaba guwoosi doabiiwaat aba madeedeanyu nea guwuurjeewi malaykajeanda ASEETA; ak geabwada gwayi shirikareeda hees bea Filisti, ‘siisi majeeteayeewana ng'ucheeda.’

¹⁰ Asi bay ng'eada sakteayda sea fuga gadiyeeda bea ng'utamiidaang'u iideani; ak goobay ang'eada, nea gudea beashata, ak gooweayi iyoadaayi nea niweeshiit.”

¹¹ Hean ghang'eat Dawdi beashata sea fugaaschi, ak gabiikta ng'eanyiida Filisti. Nea ghwascheang'da fuga Filisti gaweay Yesreeli.