1 SAMWELI 24 - Bibliyeeda GhayditDawdi ghoaghu eaweega Sawli 1 Iidu nea gabiikna Sawli eadita geeshta fuga Filisti, geeyeesha, “Ng'ula, Dawdi gwanda jeeda dareapcheeda Engedi.” 2 Hit gageanu Sawli fih sagalamnyooji samwagu siloat aba jeeda buuneesean bea Israeli, ak gaweay gagasa Dawdi ea fugaaschi aba iheenga lagheanga abiita nooga jarooda. 3 Ng'ata ghwahidu heeda gwaleeda neekeewa hilgweanda gisilga mida ghuuta naweeda; ak gawa Sawli jeeda ghwariishta. Nea abeeda gwanda Dawdi ea fugaaschi hoowa nea goobiitpiit aba jeeda gwaleeda. 4 Ghwalamda fuga Dawdi ak gwayeesha niny, “Nih eaweeda ghayi rukuneey NG'UTAMIIDA gil, ‘Ng'ula, gaydayiin weajoodigaagu geatingaagu, ak gaysimana niny gididaahi gideaba ghwahit aba headaang'u.’” Ak ghang'eat Dawdi nea ghoahuudaada ak ghwalach weeleeda hang'da ashuup geaw Sawli. 5 Iidu gwasawana jeeda Dawdi, aba gideaba ghwalach hang'da ashuup geaw Sawli. 6 Ghwalamda ak gwayeesha fugaaschi, “Gagasa ghwanung' NG'UTAMIIDA ea measimani ng'asheanji ng'utamiideanyu, was dea ghayi amwaar NG'UTAMIIDA, ak geaheaksi geatindeanyu niny aba gideaba niny siida amwaar NG'UTAMIIDA.” 7 Ak goobaloola Dawdi fugaaschi ng'asheesu ak ea mwanung' ghabwar Sawli. Hean ghang'eat Sawli ak ghabeawa jeeda gwaleeda, ak gawa heechea gawa. 8 Ng'ata ghang'eat eara Dawdi, ak gwariteawa jeeda gwaleeda, ak gaguurda nea ghwaat geeshta Sawli, “Ng'utamiideanyu was sugoocheanda!” Hean nea goong'weersa Sawli bwadaw, gwatkuy Dawdi ea ghang'uda gheamamdaanyi ng'eanyi, ak gwasissa mureeda. 9 Ak ghwalamda Dawdi ak gwayeesha Sawli, “Ghwasaan inyas giileeysiit ng'asheega fuga ayi, ‘Ng'ula, Dawdi gagasa ghabwarnyi’? 10 Heapi ng'ula nidaahi gheanyangaagu gidiindaneey NG'UTAMIIDA geatindeanyu aba jeeda gwaleeda; ak gwayeeshiinean fugeasu mwaatkwa gideaba bwara, ak ghaanung'waadaneey. Ak geayi, ‘Aniini maydeaheaksa geatingeasu ng'utamiideanyu; aba gideaba niny nimwaar NG'UTAMIIDA.’ 11 Daaha bwaabwa, daaha weasta hang'daang'u iishuubayi geaw gwanda geatindeanyu; gwachi gajea naabwarjeey amadu ghaalaji weeleeda hang'daang'u, nea geagasayi nala gideaba manda gidamuy ghana washta geatingeasu. Aniini meandeawani riing'eeda aba badaydaang'u, earapeadi igasayi bwaraaniin. 12 Gagasa gawa NG'UTAMIIDA dageascheedeanyu ea daang'u, gagasa ghawalda NG'UTAMIIDA mureandooda aba badaydeanyu; amaduuku geatindeanyu ea maydasawanyi. 13 Gawuurji gidanyaashta ghwasiildeangeaba garayi gideaba, ‘Aba jeeda munyinda gaygwarina munyinda’; amaduuku geatindeanyu ea mayghoan badaydaang'u. 14 Ama sugoocheanda Israeli gwardu nea gamaseaw ng'eaha? Gimwaali ng'eaha? Gimwaali gudeeda nimi ghana habeergweanda. 15 Gagasa ghoah NG'UTAMIIDA siida jea ghwalach girgweageeda, ak ghwalach girgweageeda aba dageascheedeanyu ea daang'u, ak ghwadaah nea gabassa ng'asheega ghuuteanyu, ak gwalealnanean geatindaang'u.” 16 Iidu nea niihiit Dawdi rukusiindeaba ng'asheesu Sawli, ghwalamda Sawli ak gwayeesha, “Nih ghuutaang'u orjeedeanyu was Dawdi?” Ak ghwajaat ghuut Sawli ak gooyeawda. 17 Hean gwayeesha Dawdi, “Ang'iing'i guwoosi doabiiwaat ea ng'alaan aniini; ang'iing'i nuwoosi miy aba heedeanyu, nea aniini ea neasineey ng'asheega munyas. 18 Nea askweareani ea niihiimu gidisami aba heedeanyu, aba gideaba mudu bwaraan damanda iinanaan NG'UTAMIIDA geatingaagu. 19 Aba gideaba siida inyas weajoocheandaanyi, gayghwanung'waada gawa nea gaba seayu? Asi gidabal gagoonyi NG'UTAMIIDA ng'asheega miyaasiin aba ng'asheega isinnean askweareani. 20 Ak ghamneawa, ging'ulayi, aniini ghaanali gideaba aba huumwa gayhuuwa sugoocheanda, ea gideaba ng'eanyiida Israeli gaygamnyeen aba geatingaagu. 21 Asi aksean habeawooda aba badayda NG'UTAMIIDA gideaba mayduulni jeacheenga jea gamaseawnean, ea gideaba mayhuta gheawungeasu aba ghaheanya.” 22 Ng'ata gweaksa Dawdi habeawooda Sawli. Ng'ata gawa Sawli ghoah, nea Dawdi sea fugaaschi gaweay heeda ghayi fuysa geat. |
The Bible in Datooga © Bible Society of Tanzania, 2015.
Bible Society of Tanzania