1 SAMWELI 23 - Bibliyeeda Ghaydit

Ghoaghu Dawdi mujiineeda Geila

¹ Hean gwayeesha saawa Dawdi, “Ng'ula, fuga Filisti gang'uchi ea fuga mujiineeda Geila, ak ghoareat booga mida bugharjeanda.”

² Ng'ata ghoanyaash Dawdi NG'UTAMIIDA, “Gaydawa dang'uchi fiisu bea Filistiin?” Gwayeesha NG'UTAMIIDA Dawdi, “Una ak ging'ucheewi fuga Filisti ak giighuuhi mujiineeda Geila.”

³ Ghwalamda fuga Dawdi ak gwayeesha niny, “Ng'ula, aseasa geewooschi bealaat aba jeeda ng'eanyiida Yuda; abeeda ea mayghwaraanya muuchi iisiweayi Geila ak geeng'ucheewi lugooda Filisti?”

⁴ Ng'ata gabiikta Dawdi ghoanyaash NG'UTAMIIDA. Ak ghwasha NG'UTAMIIDA ghuutaanyi nea gwayeesha, “Ng'eada, ng'ucheewana fuga Geila; aba gideaba gaydayiin fuga Filisti geatingaagu.”

⁵ Hean gaweay Dawdi sea fugaaschi Geila, ak gang'uchi sea fuga Filisti, ak ghwaat dugwa nyaawa, ak ghabwar fuga saang'a aba jeenyaawa. Hean ghaweat Dawdi fuga mida mujiineeda Geila.

⁶ Damanda mang'awa Abiyatari was orjeeda Ahimeleki gawa heeda Dawdi aba Geila, ghwaan nea gweana geadi hang'da siikwealiisa hamarjoojiga ashoohoocheanda.

⁷ Ak geerukusa Sawli gideaba Dawdi nuwa Geila. Ak gwayi Sawli, “Niyiin ASEETA geatingeasu; aba gideaba nighas geaw aba beata jeeda mujiineeda mideawa gidaghuudajeega gharinga.”

⁸ Hean gaguursa Sawli buuneesean gaweay ng'ucheeda, ghwararang'aada gaweay mujiineeda Geila, eaghas Dawdi sea fugaaschi.

⁹ Hean gwajeeng'u Dawdi gideaba Sawli gabada ng'asheega munyas aba badaydaanyi; ng'ata gwayeesha Abiyatari was ashoohoocheanda, “Eani hiji hang'da siratiisa hamarjoojiga ashoohoocheanda.”

¹⁰ Ghwalamda Dawdi ak gwayeesha, “Ea NG'UTAMIIDA, ASEETA Israeli, aba huumwa niyiiy siidaang'u bea gadiyeeda gideaba Sawli gagasa ghwaan Geila, ak ghabwar mujiini aba badaydeanyu.

¹¹ Neada fuga Geila gayghwayiinan geatingaaschi? Neada Sawli gayghwararang'aanda gida iing'da siidaang'u bea gadiyeeda? Ea NG'UTAMIIDA, ASEETA Israeli, geamuscheey, rukusiina siidaang'u bea gadiyeeda.” Ak gwayi NG'UTAMIIDA, “Gayghoan.”

¹² Hean gwayi Dawdi, “Fuga Geila gayghoadaydanaan aniini ea fugeasu ak ghwayiineasa geatinga Sawli?” Ghwalamda NG'UTAMIIDA ak gwayeesha, “Gayghoadaydaneey.”

¹³ Iidu ghang'eat Dawdi sea fugaaschi hita bughalaji lah, ak ghabeawa Geila, ak gaweay heeda gasa wassean. Hean iidu nea geerukusa Sawli gideaba niwaapta Dawdi aba Geila, ghwanung'waada gida gwachi gasa gwasin.

Dawdi aba ng'eanyiida heayeeniga

¹⁴ Ng'ata goobiida Dawdi heeda funyaat aba dareapcheeda aba ng'eanyiida heayeeniga mida dareapcheeda Sifu. Ak gagaseadayi Sawli galeagasean, ak ea mwayiina ASEETA geatingaaschi.

¹⁵ Ak ghabeal Dawdi aba gideaba nuwu Sawli nea gagasa ghabwar. Abeeda Dawdi gwanda jeeda dareapcheeda Sifu aba Horeshi.

¹⁶ Ghang'eat Yonatan was orjeeda Sawli, ak gaweesa Dawdi aba Horeshi, ak gwarukusa gideaba ghoahaaghwaneey ASEETA.

¹⁷ Ak gwayeesha niny, “Adibeali; aba gideaba mayghwanyasnyi geatinda bwaabwa; ang'iing'i gayhuuwa sugoocheanda Israeli, jea goombal Israeli, ak gaydoaw aniini siida geashtaang'u; eara bwaabeeda was Sawli ghwanal ng'asheanji.”

¹⁸ Ak gwasin fiisu duwaawiin neajeeda aba madeeda NG'UTAMIIDA; ak goobiida Dawdi Horeshi, nea gawa Yonatan ghoah.

¹⁹ Iimuchu gaweay fuga Sifu heeda Sawli aba Gibeya, nea gwayeesha, “Neada Dawdi ea mwafunya geaw aba jeedeanya aba Horeshi, aba iheenga heayeeniga Hakila, mida wiilooda ng'eanyiida biyeara bea ng'eanyiida Yeshimoni?

²⁰ Asi rarang'aana, Ea sugoocheanda, aba gidagasiida muuchi gurooroadaang'u giing'ooydaanyi; asi beeni ng'eang'deanya ak gajeanung' ang'waanya.”

²¹ Ak gwayi Sawli, “Gagasa gagooneegwa NG'UTAMIIDA ghawooda; aba gideaba noosamsean.

²² Una, ak gibiikti sikteawana muuchi; ak ginyasi muuchi heeda mida ea siida nidaah aba hoowa aba gideaba naayiinyi gideaba niny ea milmili muuchi.

²³ Asi, agasa ak ghoanyaschi heeda funyiisa geaw, ak gooyeanean iita majeek. Ak abeeda gajeeteayeena; amabeeda duugwanda jeedeaba ng'eang'i, abeeda gaydagasa aba jeeda ng'eanyiisean bea Yuda.”

²⁴ Hean ghang'eatng'eat, ak gaweay Sifu goosheedeawa Sawli. Nea abeeda Dawdi ea fugaaschi gwanda heeda dareapcheeda Maoni, aba Araba duukusa wiilooda ng'eanyiida biyeara mida Yeshimoni.

²⁵ Hean gawa Sawli sea fugaaschi gagasa niny. Ak geerukusa Dawdi; ama ng'ata gawa jeeda lagheaneeda haw mida dareapcheeda Maoni. Iidu nea ghwanyas iita, ghwaat geeshta Dawdi aba jeeda dareapcheeda Maoni.

²⁶ Ghwala Sawli meatkweenagi bea giijeeda, nea ghwala Dawdi sea fugaaschi meatkweeda niirja bea giijeeda; ak ghwalamwajaada Dawdi ghang'amwa heeda Sawli, nea Sawli ea fugaaschi gwaneekiisa Dawdi sea fugaaschi nea gagasa ghoang'waay,

²⁷ hean ghwahidu giijasoocheanda heeda Sawli ak gwayeesha, “Lamwajaana beeni; aba gideaba fuga Filisti nighas ng'eanyiida.”

²⁸ Gabiigu Sawli aba maseawda Dawdi, ak gawa gang'uchi sea fuga Filisti; ak gaguura hoowa Lagheaneeda simng'awiisa.

²⁹ Ak ghabeawa Dawdi hoowa, ak goobiida ng'eanyiida Engedi was heeda funyaat.