1 SAMWELI 22 - Bibliyeeda Ghaydit

Nuusta ashoohoodiga

¹ Ghang'eat Dawdi ak ghabeawa hoowa ak gamng'awsa gwaleeda Adulamu; iimuchu nea ghwayiiy orjooga ghaamwat ea gheanyaawa sean ng'asheesu, gaweay headaanyi.

² Nea giliwas sih mideawa sawanadeeda, ea giliwas sih mideawa siileeda, ea buuneesean sawana gurooruunatka nyaawa, gabassa geat headaanyi; ak ghoah shirikarajeanda haw ambal saawa. Nea fuga mideayi sea niny ghwahita fih bughalaji ang'wan.

³ Ng'ata ghabeawa Dawdi hoowa ak gawa Mispayda Moabu; ak gwayeesha sugoocheanda Moabu, “Geamuscheey goobiida bwaabwa ea iyya headaang'u, bwak ea danal gida jea gwasinnean ASEETA.”

⁴ Ak gwanung'usiinyi saawa sea sugoocheanda Moabu, ak gwandeayi sea niny damanda sean mideewa jeeda gwaleeda.

⁵ Ng'ata ghwalamda sibaneeda siguura Gadi ak gwayeesha Dawdi, “Adiibiidi jeeda gwaleeda; ng'eada ak guwi jeeda ng'eanyiida Yuda.” Hean ghang'eat Dawdi ak gawa, jeeda dareabeeta Hereti.

⁶ Deagheata ghwayiiy Sawli gideaba sinyas Dawdi sea fuga mideawa. Abeeda Sawli gwanda Gibeya, aba guumda ghuyeanda mida uhuuda heayeeda, nea gwanda geatindaanyi ng'uta, nea ghamiinaada fugaaschi sean aba murdeadaanyi.

⁷ Ghwalamda Sawli ak gwayeesha fugaaschi bea gadiyeeda miinaada aba murdeadaanyi, “Asi ghamneawa oaleaydiit, agoogeeda was fuga Benjamini, neada orjeeda Yese gayghoadaw giliwas sih madamnyeanda ea madameega sabiibu, gayghwanung' ahuwa oagasean shirikareeda hees ambal fuga nyiit sagalamnyoojiga ea gea bughalajeega,

⁸ ea eeyi bwak ea agasa oogasean gideaba gajalaabwan bwadawi? Manda siida nirukunean gideaba orjeedeanyu niduupchi geaw sea orjeeda Yese, ak ea manda siida wassean nigiisan aba badaydeanyu ghana gwarugu gideaba orjeedeanyu nifoolan fugeasu bea gadiyeeda ghwastan, nea ghwaradaanan gawuurji gideaba ghamneawa.”

⁹ Ak ghwasha Doegi was siida Edomu, miinaada aba murdeeda fuga gadiyeeda Sawli, ak gwayeesha, “Aniini naadaayi orjeeda Yese nea ghwaan Nobu heeda Ahimeleki orjeeda Ahitubu,

¹⁰ ak gamus NG'UTAMIIDA aba badaydaanyi, ak ghoadaw hamichoojiga, ak ghoadaw ng'uta Goliyati was siida Filisti.”

¹¹ Ak goojeakta sugoocheanda siida gaguursa Ahimeleki was ashoohoocheanda, was orjeeda Ahitubu, sea fuga gheanyaawa, was ashoohoodiga mida Nobu; ak ghapka fugiga seaniin heeda sugoocheanda.

¹² Ak gwayeesha Sawli, “Aleaydiit ghamneawa, orjeeda Ahitubu.” Ak ghwasha nea gwayeesha, “Aniini geandi hiji, ng'utamiideanyu.”

¹³ Ghwalamda Sawli ak gwayeesha niny, “Ghwasaan ang'iing'i inyas giilaapchaan bwadaw ang'iing'i sea orjeeda Yese, ak giidawi niny mukaate ea ng'uta, ak goomuschi ASEETA aba badaydaanyi, ak ea niyamsean geaw, ak ghwaradaanan ea ghoah ghamneawa nea gagasa nuusteanyu?”

¹⁴ Hean ghwasha Ahimeleki ghuuta sugoocheanda ak gwayeesha, “Ak gajea ng'eaha aba jeeda fugaagu sean bea gadiyeeda dea doabiiwaat ea gawuurji Dawdi, was orjeeda agweaji sugoocheanda, ak ea shirikarajeanda haw ambal siidaang'u furnyi, ak geawal gheang'da aba jeedeaba gheang'u?

¹⁵ Ak ghamneawa ea eaweeda madeeda eamuschi ASEETA aba badaydaanyi? Manda! Gidabal ea marukunana sugoocheanda gida wassean badayda siidaanyi bea gadiyeeda ghana heeda fuga ghaheanya; aba gideaba siidaang'u bea gadiyeeda manda gida nal aba ng'asheesu seaniin, aasaang'a ghana ea ng'ay.”

¹⁶ Ghwalamda sugoocheanda ak gwayeesha, “Aba huumwa gaymeawa, Ahimeleki, ang'iing'i sea fugeaba gheang'u.”

¹⁷ Gwayeesha sugoocheanda furiischoocheanda miinaada aba murdeadaanyi, “Yamwa geaw ak gibwari ashoohoodiga NG'UTAMIIDA; aba gideaba niguuyi geatinga sea Dawdi, nea ghwanal gideaba nimng'aw, ak ea marukunean.” Iidu fuga gadiyeeda sugoocheanda ea mwayiina geatinga nyaawa ghabwar ashoohoodiga NG'UTAMIIDA.

¹⁸ Ng'ata gwayeesha sugoocheanda Doegi, “Asi yamwa geaw ak gibwari ashoohoodiga.” Hean ghang'eat Doegi bea eemeeda Edomu ak ghabwar ashoohoodiga, ak ghabwar eaweedida fih seedam ea muut rassa hamarjoojiga nyaawa hang'weaka bumbuni.

¹⁹ Ak ghabwar Nobu mujiineeda ashoohoodiga aba ng'uta; headiga sean ea gadeemga ea diibiga ea gea reer ea heewga, ea digeeniga ea gisilga ak ghabwar aba ng'uta.

²⁰ Iidu gamng'aw orjeanagi bea Ahimeleki was orjeeda Ahitubu, siguura Abiyatari ak gamaseaw Dawdi.

²¹ Ak gwarukusa Abiyatari Dawdi gideaba nibwar Sawli ashoohoodiga NG'UTAMIIDA.

²² Ghwalamda Dawdi ak gwayeesha Abiyatari, “Aniini ghaanali gideaba Doegiheeda eemeeda Edomu gwanda hoowa eaweedida, ak aba huumwa gaygwarukusa Sawli. Gideaba naanung' ghwanyas fuga ghaheang'wa miyeeda.

²³ Asi apteada eendeayeena, adibeali; aba gideaba siida gasa eaweegeasu gagasa eaweagaagu; iisindeayi gaybeaha seayu.”