1 SAMWELI 18 - Bibliyeeda Ghaydit

¹ Iidu nea ghoahiit Dawdi giibaloolda Sawli, ghwanoas geat guroorooda Yonatan sea guroorooda Dawdi, ak ghabwariiyda Yonatan gidabwariiyda gurooroadaanyi.

² Ak gageanda Sawli eaweedida, ak ea mwanung' gabiikta gheanyaawa.

³ Hean gwasin Yonatan neajeeda sea Dawdi, aba gideaba ghabwariiyda niny gidabwariiyda gurooroadaanyi.

⁴ Ng'ata gafagu hang'da mida badayda hang'weaka suurja, ak ghoadaw Dawdi, ea hang'weakaaschi bea ng'ucheeda, eara ng'utaanyi ea ghuweang'daanyi ea ghealoadaanyi bea mananda.

⁵ Ak gawa Dawdi ak ghwanyagaada aba heeda ajeakta Sawli niny; bwak ea ghwanung' Sawli ghoah siida haweewa fuga ng'ucheeda. Ak ghabwariiy buuneesean ng'asheanji ea aba madeeda fuga gadiyeeda bea Sawli.

Sawli gwashissa ghaang' Dawdi

⁶ Damanda hina ghoah, nea gwaleabu Dawdi bayiiga fuga Filisti, gwarina gadeemga mujiinajeega sean bea Israeli, nea gwasarman nea ghang'was nea ghapka roonyeeda sugoocheanda was Sawli, nea gwandeawa gidoondoorajeega, nea gwasarman duumjeenga hooseaneega, nea gwandeawa haleanjeeda sisarmaniida.

⁷ Hean gwasarman gadeemga nea gooriipisiinyi damanda sarmana. “Sawli nibwar sagalamnyoojigaaschi, nea Dawdi ghabwar sagalamnyoojiga niba damanamughuush ikaaschi.”

⁸ Muchu ghwanyareas Sawli muuchi, ak ghwanung' ng'asheesu ghwanyareas niny; ak gwayi, “Gwarukuna badayda Dawdi fih sagalamnyoojiga niba damanamughuush, nea gwarukuna badaydeanyu sagalamnyoojiga; gudughwasheadaani nuut jea ghwanyas, mii sighus sugoocheanduumeeda?”

⁹ Hean gabiisa gwashissa ghaang' Sawli Dawdi ghang'eada eaweedida.

¹⁰ Iimuchu ghwahidu guroorooda muy leabu heeda ASEETA ak gawa heeda Sawli, ak ghwaramoar aba jeedeaba gheanyi, nea abeeda ghabwar Dawdi gidoondooriida, gawuurji gidasiniida aba galeaga sean. Abeeda Sawli gwandeawa ng'uta aba geatindaanyi;

¹¹ ak gwajakta Sawli ng'uta, aba gideaba gwayi, “Gaydang'usa Dawdi ghamarda.” Ak gamulsa Dawdi nibiyeenya.

¹² Hean ghoawal Sawli Dawdi, aba gideaba gwandeawa NG'UTAMIIDA sea niny ak gooheeli geaw sea Sawli.

¹³ Ng'ata ghoang'aamwa Sawli madeadaanyi, ak ghwanung' ghoah shirikarajeanda ambal fih sagalama; ak gwarita ak goosheedeawa buuneeda.

¹⁴ Ak ghwanyagaada Dawdi aba ng'asheega sean nyooh gwasin; aba gideaba niny gwandeawa NG'UTAMIIDA.

¹⁵ Iidu nea ghwadaah Sawli gideaba ghwanyagaada muuchi, hean ghamiinaada nea niiwal.

¹⁶ Ak ghabwariiy fuga sean bea Israeli ea fuga Yuda Dawdi; aba gideaba goosheedeawa ak gwayamu geaw nea nijooriischi.

Dawdi ghaghi hudeaba Sawli

¹⁷ Ng'ata gwayeesha Sawli Dawdi, “Nukwa hudeanyu haw siguura Merabu; gaydagoonyi ghoah gatmoadaang'u; ak geaghus woosa daruus ak ging'uchi aba badayda NG'UTAMIIDA.” Aba gideaba gwayi Sawli, “Maygudu dang'uta geadi nung'waada ghabwar Dawdi fuga Filisti.”

¹⁸ Hean ghwalamda Dawdi ak gwayeesha Sawli, “Neada aniini geawooschi ng'eaha, ak ea geabeang'a fuga ghaheanya aba jeeda fuga Israeli, jea deaw siida jea googweaji sugoocheandean?”

¹⁹ Nea iihita damanda jea eatawa Dawdi Merabu was hudeaba Sawli, geataw Adrieli bea eemeeda Meholati ghoah gatmoadaanyi.

²⁰ Iidu ghabwariiy Mikali was hudeaba Sawli Dawdi; ak geerukusa Sawli, ak goohoosan ng'asheanji niny.

²¹ Ak gooteemshi Sawli ak gwayi, “Nung'waada daadaw huda niny, ak abeeda gayghoah ghaseeda aba headaanyi, ak abeeda gaygoobisa niny geatinga fuga Filisti.” Ng'ata gwayeesha Sawli Dawdi deaba iyeenya, Asi ghamneawa gayhuuwa orjeeda eagweajeewi.”

²² Hean goobalool Sawli fugaaschi bea gadiyeeda nea gwayeesha, “Oopaloola Dawdi nea gabageaw ak gooyeeshi, ‘Ng'ula, ang'iing'i ghaabwariinyi sugoocheanda, sea fugaaschi sean bea gadiyeeda, asi huwa orjeeda jea googweaji sugoocheanda.’”

²³ Ng'ata gwarukusa fuga gadiyeeda Sawli ng'asheesu iidiga Dawdi. Ak gwayi Dawdi, “Ng'asheanji iyoong'ulayi ea ng'asheanda mwanang' gideaba gayghoah siida dea jea googweaji sugoocheanda, aba gideaba aniini neada geawooschi siida bwarbwar biissa ea meawala gheang'da?”

²⁴ Ghwalamda fuga gadiyeeda Sawli ak gwarukusa niny, “Ng'asheega rugu Dawdi.”

²⁵ Ng'ata gwayi Sawli, “Asi gajayeeshiina Dawdi, ‘Sugoocheanda magasa haleanjeeda gheenda geagasayi dimbaji bughala bea fuga Filisti ghoah waldeayda mureandooda aba heeda weajoodiga sugoocheanda.’” Nih gidagasiida Sawli gil gideaba gayghabwar Dawdi fuga Filisti.

²⁶ Iidu nea gwarukusa fugaaschi bea gadiyeeda ng'asheesu Dawdi, goohoosan Dawdi muuchi gideaba gayghoah orjeeda jea googweaji sugoocheanda. Nea abeeda ea miighwahidu damanda geeshooda,

²⁷ ghang'eat Dawdi ak gawa nea goodeayi sea fugaaschi, ak ghabwar fih bughalaji iyeenya bea Filisti; ak gweadu Dawdi dimbajeega nyaawa, ak geeyiitiisa sean sugoocheanda, ak abeeda ghoah orjeeda jea googweaji sugoocheanda. Ak ghoadaw Sawli niny hudaanyi siguura Mikali ghoah gatmoadaanyi.

²⁸ Hean nea gwajeeng'u Sawli gideaba NG'UTAMIIDA gwandeayi sea Dawdi, ea gideaba ghabwariiy buuneesean bea Israeli niny,

²⁹ ghoawal Sawli muuchi Dawdi. Ak ghoah Sawli weajoocheanda Dawdi aba jeeda eaweagaaschi.

³⁰ Ng'ata ghapka fuga hees bea Filisti ng'ucheeda, ak eara iissa ibuwa ng'ucheeda iissa gwajooriischi Dawdi muuchi ea ghang'al fuga sean bea gadiyeeda Sawli, ak gageawiit iitaanyi muuchi.