1 SAMWELI 15 - Bibliyeeda Ghaydit

Ng'ucheeda sea fuga Amaleki

¹ Ng'ata gwayeesha Samweli Sawli, “Aniini goojeaknean NG'UTAMIIDA damwaarnyi huwa sugoocheanda jea goombal fugaaschi was Israeli; asi ghamneawa iinya ng'asheega NG'UTAMIIDA.

² Asi gwayi NG'UTAMIIDA bea lugweega, ‘Gaydalas fuga Amaleki aba gisima fuga Israeli aba gidaghuumda saawa aba naweeda, damanda rinna ng'eanyiida Misri.

³ Asi una ak gibwari fuga Amaleki, ak gilasi uhuuda haleanjeeda sean mideawa; adoapuuchi sih, abwara sean ng'eedeeda ea gatmooda, gheareemaneeda ea diibiga reer, dugwa ea gisilga, ngamiya ea digeeniga.’”

⁴ Iidu gaguursa Sawli buuneeda, ak gwayiida aba Delaimu, fih sagalamnyooji bughalaji iyeenya beawa geeshanga, ea fih sagalamnyooji damanamughuush bea Yuda.

⁵ Ak ghwaan Sawli mujiineeda Amaleki, ak ghwaradaan buuneeda aba moangoachi.

⁶ Gwayeesha Sawli fuga Geni, “Aweayeena, ang'amwana hiji, ararang'aada ooheeleewana geat fuga Amaleki, gajiidu ghaalaschi uhuudeang'wa sea saawa; aba gideaba ghoahiimu alooheeda aba heeda fuga Israeli damanda siyeeng'na aba ng'eanyiida Misri.” Ak gaweay fuga Geni ghang'amwa jeeda fuga Amaleki.

⁷ Ak ghwajoar Sawli fuga Amaleki, ghang'eada Hafila ea ghwahita Shuri, mida gayeewda Misri.

⁸ Ak gageanda Agagiheeda was sugoocheanda Amaleki nea majeek, ak ghwajoar muuchi buuneesean aba ghuuta ng'uta.

⁹ Ghoaghu Sawli sea buuneeda Agagi, ea gisilga miyaasiin ea gea dugwa ea haleanjeeda riisheadi, ea dayeega gisilga, ea haleanjeeda sean miyaas, ak ea manuuseada; haleanjeeda sean sifool ea haleanjeeda marachi gil gealas uhuuda.

Sawli geaheawa ea mudu ghoah sugoocheanda

¹⁰ Ak ghwahidu ng'asheanda NG'UTAMIIDA heeda Samweli:

¹¹ “Aniini neagiisanyi aba gideaba naanung' ghoah Sawli sugoocheanda; aba gideaba nifuurnean badayda ak ea meana geeshteanyu, ak ea moang'waanya diigheanyeekeasu.” Hean ghwanyareas Samweli; ak gooyeawusa NG'UTAMIIDA eaweesean.

¹² Muchu ghang'eat Samweli gwaroonyi sea Sawli sakteayda; ak geeyeesha Samweli, “Sawli nihita Garmeli, ak ging'ulayi, ak ea nimiinda daraneeda lagheanga sissa geaw ak ghwayam geaw, ak ghang'ata, ak ghwararang'aada gawa Gilgali.”

¹³ Ak ghwaan Samweli heeda Sawli, ak gwayeesha Sawli niny, “Gagasa gagoonyi NG'UTAMIIDA ghawooda; neasinyi diigheanda NG'UTAMIIDA.”

¹⁴ Ak gwayi Samweli, “Shooksu bea gisilga aayiinyi aba iidigeasuun naaha, ea ghuusisu bea dugwa aayiinyi aba iidigeasuun naaha?”

¹⁵ Gwayi Sawli, “Siyeana saawa heeda fuga Amaleki; aba gideaba buuneeda ghwanung'waada gisilga miyaasiin ea dugwa, ak ghwanung' ghoah lukghumeeda NG'UTAMIIDA was ASEETEANG'WA; nea suurja gealas uhuuda goosha.”

¹⁶ Hean gwayeesha Samweli Sawli, “Ameasa! Gaydarukuneey gidarukuneani NG'UTAMIIDA eaweani.” Ak gwayeeshean, “Rukunean.”

¹⁷ Gwayeesha Samweli, “Earapeadi uwoosi mwanang' aba madeeda gheanyangaaguun, neada ang'iing'i ea muwoosi siida haw aba jeeda eemeeda Israeli? Ang'iing'i ghoamwaarnyi NG'UTAMIIDA huwa sugoocheanda jea goombal Israeli.

¹⁸ Ak goojeaktaneey NG'UTAMIIDA una bareanyeeka, nea gwayi, ‘Una, ak gilasi uhuuda fuga riing'eega, was fuga Amaleki, ak ging'ucheewi ea bwara goosha.’

¹⁹ Abeeda ghwasaan inyas mimwasi ghuuta NG'UTAMIIDA? Ghwasaan anda ging'eesi geandeayda haleanjeeda siyaas, ak gisini gidamuy aba madeeda NG'UTAMIIDA?”

²⁰ Ng'ata gwayeesha Sawli Samweli, “Aniini naayiinyi ghuuta NG'UTAMIIDA, ak ea neawi bareanyeeka ajeaktanean NG'UTAMIIDA, ak geayeadu Agagi sugoocheanda Amaleki, ak ea naalaschi uhuuda fuga Amaleki.

²¹ Hean ghwaas buuneeda haleanjeeda, gisilga, ea dugwa miyaasiin aba jeeda haleanjeeda sisach jea ghoah lukghumeeda aba heeda NG'UTAMIIDA was ASEETEANG'WA aba Gilgali.”

²² Ak gwayi Samweli, “Neada NG'UTAMIIDA ghabwariiy muuchi haleanjeeda ghadooweeda sighwarda, gawuurji gheawalmeeda ghuuta NG'UTAMIIDA? Ng'ula, mureeda ghang'al lukghumeeda, nea iing'da ghang'al nagheeda lagweendiga.

²³ Aba gideaba heeheeweega gawuurji sea riing'eeda beeneetkweanduumeeda, nea hang'ooynata uhuuda gawuurji ghwarjeeda ea badooda sanaamu. Aba gideaba niheawi ng'asheanda NG'UTAMIIDA, ak eara niny ea niheawa ea muwoosi sugoocheanda.”

²⁴ Ak gwayeesha Sawli Samweli, “Aniini neasinyi riing'eeda; aba gideaba naanung'waadi diigheanda NG'UTAMIIDA ea ng'asheagaagu, aba gideaba ghaawali buuneeda ak ghaang'waanyi ng'asheega ghuusiga nyaawa.

²⁵ Asi ghamneawa, geamuscheey, samsiina riing'eedeanyu, ak geebiikti sea ang'iing'i, ak ghaabwachi NG'UTAMIIDA.”

²⁶ Iidu gwayeesha Samweli Sawli, “Aniini maydabiikta sea ang'iing'i; aba gideaba niheawi ng'asheanda NG'UTAMIIDA, ak ea niheawaneey NG'UTAMIIDA ea muhuuwi sugoocheanda Israeli.”

²⁷ Ghwayam geaw Samweli ak gawa, ak ghoang'waay Sawli gheata hang'daanyi, ak ghabwaasha.

²⁸ Gwayeesha Samweli niny, “Nibwaash NG'UTAMIIDA sugoocheanduumeeda Israeli ak gooheeleeweey askweareani, ak ghoadaw giischeewdaang'u, was siida miy ng'alnyi.

²⁹ Nea siida was uurda Israeli ea maygwanaba ng'uyeega ghana gwaduukuuna; aba gideaba niny mii siida gil, ea gwaduukuuna.”

³⁰ Hit gwayi, “Aniini neasinyi riing'eeda; ak gisinnean mureeda aba madeeda gweargwa buuneedeanyu ea madeeda Israeli, ak giyami geaw sea aniini, ak abeeda ghaabwachi NG'UTAMIIDA was ASEATAANG'U.”

³¹ Ghwayam geaw Samweli gamaseaw Sawli; ak ghamwaash Sawli NG'UTAMIIDA.

³² Ng'ata gwayi Samweli, “Eani hiji Agagi sugoocheanda Amaleki.” Hean ghwaan Agagi nea ghaboadan. Gwayi Agagi, “Aba huumwa ng'weaninda miyeeda ning'ata.”

³³ Ak gwayi Samweli, “Gawuurji ng'utaang'u ninung' ea mwanyasa gadeemga diibiga, ak eara geamadu ea mayghwanyas baleanda aba jeeda gadeemga.” Ak ghwalajaada Samweli Agagi ea goomaneanyi aba madeeda NG'UTAMIIDA aba Gilgali.

³⁴ Muchu gawa Samweli ng'eanyiida Rama; nea ghwascheang'da Sawli gawa gheanyi mida Gibeya.

³⁵ Ak ea mudu gabiikta Samweli ghwadaah Sawli ea ghwahita eaweeda miyeadaanyi, ak gagiisan Samweli aba badayda Sawli. Ak gwaduukuuna NG'UTAMIIDA aba gideaba ninung' ghoah Sawli sugoocheanda ambal Israeli.