1 SAMWELI 1 - Bibliyeeda Ghaydit

Elikana sea fugeaba gheanyi aba Shilo

¹ Ghayi gwanda siyagi bea mujiineeda Rama bea eemeeda Sofimu mida ng'eanyiida heayeeda Efraimu, siguura gheawungaaschi Elikana orjeeda Yerohamu, Yerohamu gaba Elihu, Elihu gaba Dohu, Dohu gaba Sufu bea eemeeda Efraimu.

² Abeeda gwandeawa gadeem iyeenya nea dea madeeda geeguura Hana, nea niirja geeguura Benina. Ak gwandeawa Benina diibiga, nea Hana ea mandeawana diibiga.

³ Iissa gwascheeng'iida siisi gilakweay nea gabeewa mujiineadaanyi gawa ghadooweeda nea ghoadaw lukghumeeda NG'UTAMIIDA bea lugweega aba Shilo, nea abeeda orju iyeenya bea Eli, was Hofni ea Finehasi ea ashoohoodiga NG'UTAMIIDA.

⁴ Nea eaweeda adaydaawa Elikana lukghumeeda, ghoadayda saruuta gatmoadaanyi ea orjoagaaschi sean ea haweagaaschi;

⁵ ak earapeadi bwariiy Hanahiin, gayghoadaw Hana saruudagi ak ghwahit, aba gideaba nirat NG'UTAMIIDA jeataanyi.

⁶ Hean iissa ghoanyareas gatmooda niirja muuchi, nea ghaminighis, aba gideaba nirat NG'UTAMIIDA jeataanyi.

⁷ Ak gwasiniidunu giliwas gweay; damanda siyeeng'iideawa gatmooda gabadiini gheeda NG'UTAMIIDA, iissa ghoanyareas gatmooda niirja. Ak iissa gooyeawda Hana ea ghwaraay agiischooda.

⁸ Ng'ata gwayeesha siyeadaanyi was Elikana, “Hana, ghwasaan anda giiyeawdi? Ak ghwasaan anda miyeagiischeeni? Ak ghwasaan anda gurooroadaang'u gagiisan? Neada aniini aba headaang'u ea mwaang'ali orju damanamughuush?”

Hana ea Eli

⁹ Iing'ata agiischooda ea leeshooda aba Shilo, ghang'eat Hana. Abeeda Eliheeda was ashoohoocheanda goopteada aba hoorgeeda mida murdeeda ghamarjeanda gidaghuuta gheeda sibata ASEETA was NG'UTAMIIDA.

¹⁰ Hean gwasawana muuchi ak ghamwaash NG'UTAMIIDA, nea gooyeawda muuchi.

¹¹ Ak ghwaak habeawooda nea gwayi, “Ea NG'UTAMIIDA bea lugweega, inyeeda aba huumwa gayng'ula sawanadeeda hudaang'u bea gadiyeeda, ak giipkaachaan aniini, ak ea adagwarooseey hudaang'u bea gadiyeeda, ak giidawi hudaang'u bea gadiyeeda baleanda, ak abeeda gaydaadaw niny NG'UTAMIIDA aba jeeda eaweagaaschi sean, ak ea manda janaweeda jea eareaghwa uhuudaanyi.”

¹² Damanda mwaasha ghawooda aba madeeda NG'UTAMIIDA, gang'ula Eli ghuutaanyi.

¹³ Abeeda Hana gameang'shi; ak geaghus gideaba ghang'was muuchka ghuutaanyi, nea meayiinya ginyah; ak ghwanung' Eli ghoah gili gatmooda niboogit.

¹⁴ Ak ghwalamda Eli ak gwayeesha niny, “Ang'iing'i gayboogida ea ghoah eeju?”

¹⁵ Hean ghwasha Hana nea gwayeesha, “Manda, ng'utamiideanyu, aniini geawooschi gatmooda giisaneat; aniini moang'wa dali difaayi ghana gidaboogidi fih, aniini ghayiinyi gurooroodeanyu madeeda NG'UTAMIIDA.

¹⁶ Adiidu ginung' ghoah hudaang'u bea gadiyeeda gatmooda marachi gil, aba gideaba damani seaniin geabalooli iita sawanadeedeanyu haw ea miyeedeanyu.”

¹⁷ Ng'ata ghwasha Eli nea gwayeesha, “Una nea gibeahi hoyyoo, ak gagasa gagoonyi ASEETA Israeli gidida ing'ali ninyiin.”

¹⁸ Ak ghwasha nea gwayeesha, “Gagasa ghwanyas hudaang'u bea gadiyeeda alooheeda aba madeadaang'u.” Ng'ata gawa gatmooda heechea gawa ak gweagiischi, ak ghabeawa giiseaneega.

Jeata Samweli ea giing'eeta gadiyeeda

¹⁹ Muchu ghang'eat ng'eat sakteayda duw ak ghamwaash NG'UTAMIIDA; amang'ata ghwayam geat gabiikta gheanyaawa mida Rama. Ak gwandeayi Elikana sea gatmoadaanyi was Hana, ak ghoapkaat NG'UTAMIIDA niny;

²⁰ ng'ata damwan gagweayiit Hana ak gwaji baleanda, ak gaguura gheawungaaschi Samweli, aba gideaba gwayi, “Nih ghaang'ali NG'UTAMIIDA.”

²¹ Iimuchu ghang'eat siida siguura Elikana sea fugeaba gheanyi sean ak ghwascheang'da gaweay heeda NG'UTAMIIDA ghoadayda lukghumeeda, nea ghoadayda eara aba badayda habeawooda ghayi ak.

²² Iidu ea mawa Hana, aba gideaba gwayeesha siyeadaanyi, “Geaghus eeyi bwak ea ghwashukghu baleanda, abeeda gaydaat niny, madeeda NG'UTAMIIDA, ak goobiida hoowa damanda manda muudeanooda.”

²³ Ghwalamda siyeadaanyi was Elikana ak gwayeesha niny, “Sina gididaahi gideaba ghwadoabiiw aba headaang'u, ameasa ea ashuukghuuni baleanda; ea ghoahiit NG'UTAMIIDA ng'asheandaanyi.” Hean goopteada gatmooda ak gooreer orjeedaanyi, ea ghoashuukghu.

²⁴ Iimuchu nea nishukghu baleanda, hean ghwascheang'da nea goodeayi sea niny, nea gweaduudayi heeyda gweanyeeka asamwagu, ea dearanga nyiit sooscheanda, ea shearooda difaayi; ak ghwaat baleanda gheeda NG'UTAMIIDA mida Shilo nea abeeda baleanda aamwanang'.

²⁵ Hean geenuus heeyda, ak geayaat baleanda heeda Eli.

²⁶ Ak gwayeesha, “Ea NG'UTAMIIDEANYU! Gidiibiideati, ng'utamiideanyu, aniini geawooschi gatmooda ghayi miinaada aba hiji bea madeadaang'uun, nea ghaamwaashchi NG'UTAMIIDA.

²⁷ Aniini ghayi ghaamwaashchi ASEETA aba badaydeaba jeebi; ak ea nigoonan NG'UTAMIIDA gideamusch niny.

²⁸ Ak ghamneawa ghaadawji NG'UTAMIIDA; nea aba gidayang'da eaweagaaschi ghaadawji, gaygaba NG'UTAMIIDA.” Ak ghamwaash NG'UTAMIIDA aba hoowa.