1 Goriinto 7 - Bibliyeeda Ghaydit

Iita geeshooda

¹ Asi aba iita ng'asheegiga ghayi oang'waarjiin. Ghang'wana ng'eedeeda ea mwasada gatmooda.

² Iidu aba simsimda ea ng'asheega mealuuleega, gilinyoo ea ng'eedeeda gil gagasa gwandeawa gatmoadaanyi, nea giliwas gatmu gagasa gwandeawa siyeadaanyi.

³ Ng'eedeeda dandeayeata gatmoadaanyi gitoobiiwsa aba jeeda gheeda, ak gwasunu eara gatmooda aba heeda siyeadaanyi.

⁴ Asi gatmooda meabala saseadaanyi, goobal siyeadaanyi; ak gwasunu eara siyeeda meabala saseadaanyi, goobal gatmoadaanyi.

⁵ Adooheewachi geat inyeesa gooneaji damanda, ak abeeda ghoanyaschi gheata mooshta ASEETA; ak iidu goobiiksiinyi gicha, ak ea mwanyasa Shataani gheata gichea gwasimdaneegwa iimandaneegwa gheadeenda.

⁶ Asi gearugu ng'asheesu nea geagoonyi gheata, nea mii diigheanda gil.

⁷ Nea gidagwachi aabwariiydi aniini gideabali gawuurjeewean buuneesean, amadu gaba siisi nyas gidaghayi miy sajaada adaw ASEETA, siisi geataw gili nea niirja geataw gilinuut.

⁸ Ak geayeeshi fuga mii gageeshi ea masiinung'weega ghang'wana gwandeawa siida geaw gawuurjeewean aniini.

⁹ Amadeepa ghwaraay giing'ooydeaba geat, ea dageeshi. Aba gideaba ghang'wana gageeshi mwasamwa gideaba gayghaghwarda geawunda gheang'da.

¹⁰ Ak gaydarukusa fuga nigeeshi, ak ea mii aniini Ng'utamiida gil, gatmooda adagwaheeli sea siyeadaanyi,

¹¹ (amadeepa gwaheeli, ea deabideada nea gaba geaw, ghana gabiikta gwaneaji sea siyeadaanyi), ea gideaba siyeeda adaghwanung' gatmoadaanyi.

¹² Nea buuneeda suurja gearukusi aniini mii Ng'utamiida gil gideaba iimida orjeeda giyeanya wassean mideawa gatmooda mandeawana masaweega, ak ghamwas gideaba gay gwandeayi sea niny adaghwanung' gatmooni.

¹³ Nea gatmooda mideawa siyeeda mandeawana masaweega, nea ghamwas gideaba gaygwandeawa Gatmooni, ea adagwanung'usa heeda siyeadaanyi.

¹⁴ Aba gideaba ng'eedeedida mandeawana masaweegean gajeamiidu aba badayda gatmoadaanyi, ak eara gatmoodida mandeawana masaweegean gajeamiidu aba badayda siyeadaanyi. Ghwanyawa iimasunu diibigeagwa gajea mii miyaas, amaduuku ghamneawa ea ghaydidi.

¹⁵ Nea fuga nigeenyi mandeawana masaweega iigasa ghwadarda, ea dadarda; aba sareani orjeediyya ea hudiya ea mii radeadi. Aba gideaba ASEETA gaguurneasa aba hoyyoo.

¹⁶ Gatmooda ginaldiin ang'iing'i ea jea lealni siyeadaang'u? Ng'eedeeda gaynaldaan ang'iing'i ea jea lealni gatmoadaang'u?

Abiideata gidaguurdeaydaneey ASEETA

¹⁷ Giduurji sean daba siisi abiideata gidaghayi goondaneey Ng'utamiida giibinda, ea gidaguursiinda ASEETA. Ak nih ea gidearukwiidi aba jeeda ganiisajeega sean gil.

¹⁸ Heapi siida iissa geaghus eeguursa nea siyaat ghasmeahooda? Asi adagageanda giirooraneeda ghasmeahooda. Siida damanda siguursiina mii gawa ghasmeahooda? Asi adagagasa ghasmeahooda.

¹⁹ Beata ghasmeahooda mii gili ak siida meayaada ghasmeahooda ea mii gili, geaghus ging'ooyda diigheanda ASEETA.

²⁰ Daba siisi abiideata gidaghayi bea mwadi siguursiinda.

²¹ Ang'iing'i ghayi geeguurneey nea guwoosi giing'oonyaneeda? Adiduubayi. Asi iimuusi gideaba gajabala geaw, ada abeeda ghwahit.

²² Aba gideaba siida siguursa aba jeeda Ng'utamiida nea giing'oonyaneeda gil, siisi goobal geaw aba heeda Ng'utamiida. Gwasunu eara siida siguursa nea goobal geaw niny giing'oonyaneeda Gristo.

²³ Agooga geashaaheagwa aba sheayeeda haw; adoahuuyi giing'oonyaneemba sih.

²⁴ Asi fuga eaduupcheewi, damanda wassean siguursiina siida, gagasa gwandeayi sea ASEETA.

Iita fuga mii gageeshi ea masinung'weega

²⁵ Asi ghamneawa aba fuga miigageeshi, meandeawani diigheanda Ng'utamiida, gearugu aba fughareedeanyu aniineeda nibwaydanaan Ng'utamiida aba gideaba geawooschi doabiiwaat.

²⁶ Ghaaghanyi iyeang'ulayi aba sawanadeeni bea ghamneawean ghwahit gideaba siida gaygoobiideata giduurji bea ghamneawa.

²⁷ Heapi nirateey geeshooda? Adigasayi gideaba gajabala geaw. Ang'iing'i giibali geaw mii geesheena? Adiidu gigasayi geeshooda.

²⁸ Asi iigeeshi, ea misini riing'eeda, nea eara huda iisighi ea masina riing'eeda. Nea fugiga geeshiin gayghwanyas sawanaduutka ng'eanyiida, ak gaydaweadaneegwa gili.

²⁹ Geayi fugeasu eaduupcheewi, damanda sigasa nineekiit muuchi; ghang'eada ghamneawa ak gagal mwadi fugiga mideawa gadeemgean gidabal goobiideata fuga mandeawana,

³⁰ nea fuga giisan ea dawuurji gili magiisana, nea fuga hoosana ea dawuurji fuga mahoosana, nea fuga shaah haleanjeeda ea dawuurji fuga mandeawana haleanjeeda,

³¹ nea fugiga mideawa gadiyeeda aba jeeda ng'eanyiidean ea dawuurji fuga masina gil. Aba gideaba haleanjeeda muunda ng'eanyiida gay ghang'ata.

³² Geagasayi oopala geat aba deawiitmeeda. Siida mii gageeshi iissa gwadeawiisa ng'asheega Ng'utamiida, gida jea goohoosanda Ng'utamiida;

³³ nea siida nigeeshi iissa gwadeawiit aba ng'asheega muunda ng'eanyiida, was gichea goohoosanda gatmoadaanyi,

³⁴ nea gidagasa ea nibearshi. Nea gatmooda meegeena ghana huda iissa gwadeawiit aba badayda Ng'utamiida, gichea ghoawaata siida ghaydit aba saseeda ea guroorooda; nea gatmooda sigeena iissa gwadeawiit aba badayda haleanjeeda ng'eanyiida, gichea goohoosanda siyeadaanyi.

³⁵ Gearugu ng'asheanji ak abeeda ghoanyagaadi, ak ea mii gideaba ghaaghuumnyeegwa agooga, geagasayi gideaba gajoopiidana jeeda doobiiwnata ea naweeda miy ak ghaghu mooshteang'wa mabwaasha aba heeda Ng'utamiida.

³⁶ Asi siida iidaah gideaba masisiina huda jea ghaghi gidahaguuw, nea geawundaanyi bea gheang'da gwandeawa uurda, ak ea mayghwashiy gidagasa, gidabal gwasin gidida gasean: ghang'wana gageenyi, masina riing'eeda.

³⁷ Nea siida wassean hang'waanyiit aba jeeda gurooroadaanyi, ak ghanyea meediing'siina nea ghoamu ghoadeal gidida gasean, ak ea nimanya aba jeeda gurooroadaanyi, gideaba gaygwandeawa ghoah gatmoadaanyi, abeeda ghoadoabiiw.

³⁸ Nea eara siida adayda hudaanyi ghoadoabiiw; nea dea meaghi ghoadoabiiw muuchi.

³⁹ Gatmooda aaradaat iiduugwanda siyeadaanyi. Amadu nea nimi siyeadaanyi, ea niibal geaw ak ghoamu ghaghi siida gasa niny, ak geaghus fuga mida jeeda Ng'utamiida.

⁴⁰ Nea aba girgweageedeanyu gaygahoosan ak ghang'wana muuchi inyeeda goobideada ea meaghi. Aba gideaba eara aniini iyeang'ulayi geandeawi Guroorooda ASEETA.