1 Goriinto 16 - Bibliyeeda Ghaydit

Gujaweeda jea ghaweat fuga mideawa masaweega

¹ Aba iita gujaweeda jea ghaweat fuga mideawa masaweega ghaydidi, aba gidaghayi earukusiindi ganiisajeega Galatiya, eara agooga asindunu.

² Eaweeda madeeda aba eawooji ispwa aba jeedeang'wa daba siisi adiing'da gil deena gidamideawa, ak ea mooweamsheeni iyaahiidu.

³ Damanda jea dahina, gaydeajeakta fuga jea ageani ghwaat barawajeanda ea haleanjeeda oataydi ak ghwaat gujaweedeang'wa ea ghoahiita Yerusalemu.

⁴ Nea abeeda iidoabiiw gideaba gaydeadeayi aniini, abeeda gaydeadeayi sea saawa.

Badiida Bawlo

⁵ Asi gaydabareaseegwa agooga iing'ata beata ng'eanyiida Makedoniya, aba gideaba geagasayi dasigu jeeda ng'eanyiida Makedoniya,

⁶ ak gwadeepa deabiida heedeang'wa ghana deabiida damanda gooroogeeda, ak abeeda ghoamuuschi aweadaan dalamwajaada aba bareanyeekeasu, aba heeda eagasayi dawa.

⁷ Aba gideaba meagassi dagooneegwa ghamneawa nea ghaang'ati; aba gideaba ghaararji deabiida ng'eang'deang'wa gilinuwaas, iimwas Ng'utamiida.

⁸ Ak gayghanyi deabiida ng'eanyiida Efeso ea ghwahita damanda ghweelmeeda Bentekosti,

⁹ aba gideaba nijaada gidaghuuta muuchi aba gadiyeedeanyu aba hiji, earapeadi saang'a weajoodiga.

¹⁰ Eaweeda hina Dimoteo, goong'ulayi goobiida heedeang'wa nea mabeala, aba gideaba gwasin gadiyeeda Ng'utamiida gawuurji gideasindi aniini.

¹¹ Asi adagafool sih niny. Anung' ghwalamwajaada aba bareanyeakaaschi nea ghabeawa hoyyoo, ak abeeda gabiigu heedeanyu; aba gideaba ghaamuughu niny sea fuga eaduupcheewi.

¹² Iidu aba iita Apoloheeda was orjeediyya, geamuschi muuchi gabareaseegwa sea fuga eaduupcheewi, nea niny iinyas gheata gayghwaan.

Ng'asheega huuydean

¹³ Oang'wearni, nea ghoamiinaadi muuchi aba jeeda masaweegeagwa, adaruusiita nea ghoanyaschi uurda.

¹⁴ Ng'asheegeagwa sean iyoosinyi asina aba bariinyeega.

¹⁵ Asi ghamneawa, fuga eaduupcheewi, agooga ghoanali gideaba ghoah Stefano fuga madeeda gil asheeda gwayamu geat aba ng'eanyiida Akayahi, ak ea niidayda geat aba gadiyeesiinda fuga ghaydidi;

¹⁶ geamuscheegwa asisiina mureeda fuga sunu ea heeda siida wassean sin gadiyeeda ea fuga deawiit.

¹⁷ Ak geahoosanyi aba gideaba nihidu geaba Stefano ea Fotunato ea Akaiko, aba gideaba fiisu nidukuta seawadeeda ang'wearu iimoondani agooga;

¹⁸ aba gideaba ninung' ghahawda guroroodeanyu ea gurooruunatkeagwa. Asi anala muuchi fuga sunu.

¹⁹ Ghoaghadeagwa ganiisajeega mida Asiya. Akila sea Briska, sea ganiiseeda mida jeeda gheanyaawa.

²⁰ Ghoaghadeagwa fuga siduupcheewi sean. Oakghada geat aba samooda ghaydit.

²¹ Aniini Bawlo gil, ak geang'oorneegwa giighadi aba geatindeanyu aniini.

²² Siida wassean mwabwariinya Ng'utamiida, gagasa eamwaashta. Ng'utamiideanya ghwaan!

²³ Dagheerjeanduumeeda Ng'utamiida was Yesu gagasa andeawana.

²⁴ Gagasa andeawana bariinyeegeasu oogasean aba jeeda Gristo Yesu. Amin.