1 Goriinto 13 - Bibliyeeda Ghaydit

Bariinyeega

¹ Eara dabaloola ghuusiga fuga muunda ng'eanyiida ea dea malaykajeega, nea meandeawani bariinyeega, abeeda ea naahuuyi gharinyeanda ajuuri ea deebajeanda was moongeanda.

² Nea eara dandeawa uurda sibaneanduumeeda, ak ghaanali makcheamuutka sean bea fughareeda, ak geandeawi masaweega sean, ammu goobaleak giijeega, ak ea meandeawani bariinyeega, meawoosi gil.

³ Iyaadaydi haleanjeedeanyu sean eandeawi, ama aadaydi saseedeanyu eaghwarda, ak ea meandeawani bariinyeega, ea meanyasi gil.

⁴ Bariinyeega iissa ghamilikghta nea inya jih; bariinyeega mandeawana lachng'eanyiida ghana ghwarjeeda;

⁵ ak ea maba ghunduufka ghana ghwarjeeda. Bariinyeega ea masiga naweadaanyi nea gaba geaw; ak ea mii asas nyaras ghana gwandeawa sicheeda;

⁶ ak ea mahoosaniisiina ng'asheega munyas, iissa gahoosasa ng'asheega doobiiweadi.

⁷ Bariinyeega iissa ghamilikghta ng'asheega sean, ak ghamwas ng'asheega sean, ak ghwarar ng'asheega sean ak ghwarjeang'da aba ng'asheega sean.

⁸ Bariinyeega manda muudeanooda; nea iimida ramooranga gayghang'ata; gwasunu eara iita eemoojiga, gaygamuudean, ama mida fughareeda gayghang'ata.

⁹ Aba gideaba fughareangaasa iissa ea mwahita nea eara ramoorangaasa ea mwahita;

¹⁰ Iimuchu nea ghwahidu gidida hidaadiin, abeeda gayghang'ata gidida mii hidaadiin.

¹¹ Ghayi nea gutawoos baleanda, iissa geabalooldi baleanda, ak geateemsheati baleanda, ak gwadeena fughareedeanyu dea baleanda; hean nea geeheedu doaw ng'eedeeda, ghaanung'waadi ng'asheega jeepcheanduumeeda.

¹² Aba gideaba ghamneawa geeng'uli geat giyoo aba jeeda misaneeda, nea damandida gaygwaroonyi gheanyangaasa. Asi ghamneawa ghaanali aba meatkweenagi; damandida gaydanal muuchi, aba gideaba ASEETA ghwanalan muuchi.

¹³ Asi masaweega ea ghusooda ea bariinyeega, ng'asheesu asamwaguun, aba jeedeaba ng'asheesu daahaw muuchi bariinyeega gil.