1 Goriinto 1 - Bibliyeeda Ghaydit

¹ Bawlo, ghayi siguursa aba gidagassiida ASEETA ghoah giijasoocheanda Gristo Yesu, ea orjeediyya was Sostene,

² Heeda ganiiseeda ASEETA mida Gorinto was fuga ghayi siimiidu aba jeeda Gristo Yesu, ghayi siguursa ghoah fuga ghaydidi, sea fuga sean guuriisa gheawunga Ng'utamiideanya was Yesu Gristo aba heeda wassean. Niny Ng'utamiida nyaawa gil, ea deanya.

³ Gagasa andeawana dagheerjeanduumeeda ea hoyyoo leabu heeda ASEETA was Ghweandeanya ea heeda Ng'utamiida was Yesu Gristo.

Ghawooda aba heeda Gristo

⁴ Geabadiischeesi ASEETA galeagasean aba badahuukeagwa aba badayda dagheerjeanduumeeda ASEETA ghayi sigooneegwa aba jeeda Gristo Yesu,

⁵ ak aba naweadinga sean geeparuureegwa aba jeedeaba niny aba weaghuumeeda ea fughareeda sean–

⁶ ak abeeda gawuurji muuwuunooda Gristo gidamajeekta aba jeedeang'wa–

⁷ ak abeeda ea mwashoadeewaneegwa haleanjeeda sigu bea guroorooda, nea ghoamuughu giidaheachta Ng'utamiideanya was Yesu Gristo;

⁸ niny gaygoomajeegeegwa ea ghwahita muudeanooda, nea manda ramaseanda aba eaweeda Ng'utamiideanya was Yesu Gristo.

⁹ ASEETA ea doabiiwaat, was deaghayi guurneegwa ak abeeda goobareanyeewi Orjeedaanyi was Yesu Gristo was Ng'utamiideanya.

Dardeayda aba jeeda fuga ganiisa

¹⁰ Geamuscheegwa fuga eaduupcheewi aba gheawunga Ng'utamiida was Yesu Gristo, gideaba abaloolda gilagi oogasean, nea adagwanda dageascheedeang'wa furjeeda, ak gidabal googuuyi aba fughareanagi ea girgweageanagi.

¹¹ Aba gideaba nirukunean fuga Gloe gideaba gwanda jeedeang'wa jaliida, fuga eaduupcheewi.

¹² Asi gideargu nih gil gideaba giliwas sih aba heedeang'wa iissa gwayi, “Aniini geabeayi Bawlo,” ghana, “Aniini geabeayi Apolo,” ghana, “Aniini geabeayi Gefa,” ghana, “Aniini geabeayi Gristo.”

¹³ Heapi neada Gristo gabearshi? Heapi Bawlo ghayi geengoor aba badahuukeagwa? Ghana heapi geepaatiisaneegwa aba gheawunga Bawlohi?

¹⁴ Geabadiischeesi ASEETA aba gideaba mii deabaatiisan siida aba ng'eang'deang'wa geaghus Grispo ea Gayo;

¹⁵ adiidu gwayi sih ghayi geepaatiisan aba gheawungeasu.

¹⁶ (Hean geabaatiisanyi eara fuga gheeh Stefano. Iing'ata suh ea mwaapkaadi ea neabaatiisanyi sih nuut wassean.)

¹⁷ Aba gideaba Gristo ghayi meajeaknean deabaatiisan, goojeaknean darukwiida giijasta miy nea meakna bareaynata weaghuumeeda, ak abeeda ea moawa beehiida Gristo gidamwadaagha.

Gristo uurda gil ea weaghuumeeda ASEETA

¹⁸ Aba gideaba ng'asheanda beehiida aba heeda fuga roodeadi leendeeda gil, nea aba heedeanya aseaseeda silealu ea uurda ASEETA.

¹⁹ Aba gideaba geang'waar, “Gaydanyarja weaghuumeeda fuga weaghoodi, nea fughareenga fuga mideawa fughareeda gaydaheawa.”

²⁰ Gwandeenu siida was weaghoocheanda? Gwandeenu ng'oorshoocheanda? Gwandeenu siida argweaji bea damani? Neada ASEETA ea mii ghwanung' ghoah leendeeda weaghuumeeda ng'eanyiida?

²¹ Nea, aba weaghuumeeda ASEETA, ghanyea mwanala ng'eanyiida ASEETA aba naweeda weaghuumeeda, goohoosan ASEETA aba naweeda leendeedida bea ng'asheega sirukwiidiin ak abeeda geelealu fugiga nimwasiin.

²² Aba gideaba fuga Yahudi gagaseadayi gwadeagwajeega, nea fuga Yunani gagaseadayi weaghuumeeda,

²³ amaduuku aseasa geerukwiidi Gristoyda ghayi singoor, aba heeda fuga Yahudi gwaruusa fih nea aba heeda fuga Eemoojiga ea leendeeda gil,

²⁴ nea aba heeda fuga siguura, sean Yahudi ea Yunani, Gristo ea uurda ASEETA ea weaghuumeeda ASEETA.

²⁵ Aba gideaba dasheaynata ASEETA gaburdeawa muuchi fughareeda buuneeda, nea ng'arng'aranda ASEETA gwandeawa uurda muuchi ea ghoadaraam buuneeda.

²⁶ Asi asikteawana guurnoodeang'wa, fuga eaduupcheewi; aba jeedeang'wa mii weaghoodi fuga saang'a aba iing'uleegwa buuneeda, mii saang'a gea mideawa uurjeenga, ak ea mii saang'a fuga sijiilsa gealga hees;

²⁷ iidu ghwaloat ASEETA ng'asheegiga sifool bea jeeda ng'eanyiidean ak ghoabwaaspwaas fuga mideawa fughareenga, ghwaloat ASEETA haleanjeeda ng'arng'ari mida ng'eanyiida ak ghoabwaaspwaas gea mideawa uurjeenga,

²⁸ ASEETA ghwaloat haleanjeeda ng'arng'ari sifool aba jeeda ng'eanyiida, ea haleanjeeda mandana, ak ghwanung' ghoah haleanjeeda mwadaagha gea mida,

²⁹ ak ea manda siida jea ghoamu ghaghwar geaw aba madeeda ASEETA.

³⁰ Niny gumdooda eaweegeagwa gil aba jeeda Gristo Yesu, ghayi nung' ASEETA ghoah weaghuumeedeanya, ea doobiiwnateanya ea giimiinnooda, ea lealeanooda;

³¹ asi gawuurji gidaghayi sing'waarda, “Siida ammu ghaghwar geaw, daghwara geaw aba badayda Ng'utamiida.”