1 Dimotteo 6 - Bibliyeeda Ghaydit

¹ Soomjooga sean gammiisa gideaba gay ghoadaw meanang'oodiga nyaawa mureeda aba gideaba meang'eawa gheawunga ASEETA ea giinealshoodeanya.

² Ak soomjoogiga was meanang'oodiga nyaawa fuga masaweegean adagafool aba gideaba orjooga geenyaawa ghang'wana gagadiiyeesa muuchi aba gideaba suh weat soomjooga aba gadiyeeda nyaawaan niiw fuga masaweega ak ghabwariiy. Ng'asheesu anaala nea gireekusi.

Giinealshooda ng'uyeega ea meanang'oocheanduumeeda huumwa

³ Siida wassean iyanaal fughara nuut nea mamwasa ng'asheega mideawa eaweega Ng'utamiideanya was Yesu Gristo, ghana giinealshooda samgeat sea badita ASEETA,

⁴ nih ning'ut ghwarjeeda ak ea manda gil nal, ak gaba geeska giiteemshooda badayda giinyaashteayda ng'asheega ea galeadayda ng'asheega nea aba jeedeaba suh gwarina ng'ulooda siida aba gheang'da muy, jaliida ea giing'weaka ea meanyooda muy bea siida,

⁵ ea sheang'nyeeda fuga nidatasa fughareenga nyaawa nea mandeawana huumeanda ak ghaghay gili meanang'oocheanduumeeda gil.

⁶ Nea badita ASEETA ea rearnata ea meanang'oocheanduumeeda haw gil.

⁷ Aba geaba geepkaanyi badayda ng'eanyiida nea meeyeani gil, ak gajeebiikta nea meayaadi gil.

⁸ Ak iisindeawi gichea eayaaga ea hang'weaka gajeerearniita.

⁹ Ak fugiga gasa meanang'oocheanduumeedean gay ghwahita jeeda simsimda ea jeeda gadageeda ea jeeda ng'asheega munyas maba gil bea leendeeda nung' ghwahita buuneeda jeeda roodaweega.

¹⁰ Aba gideaba gumdooda ng'asheega munyas sean gweadu bariinyeega lapiya, ak buuneeda mwaatkwa ea ninung'waada masaweega aba bariinyeesu bea lapiyaan ea gwasawan jeesinga nyaawa.

Dimoteo geerukusa ng'asheega jea gwasin

¹¹ Asi ang'iing'i siida ASEETA, ang'aamwana geaw ng'asheesu ak giyaadi geeshta doobiiwnata, ea badita ASEETA ea masaweega ea bariinyeega milikghteayda ea garbabanda.

¹² Ng'ucheena muuchi ng'ucheedida bea masaweegean, ang'waanya eaweegiga manda muudeanooda ghayi siguurnaneeyiin, ak gimuuwu muuwuunooda miy aba madeeda muushoodiga saang'a.

¹³ Ng'asheanji gearukuneey aba madeeda ASEETA diita adaw haleanjeeda sean eaweegean, ea madeeda Gristo Yesuheeda ghayi muuwu muuwuunoadaanyi miy aba madeeda Bontio Bilato,

¹⁴ bea gideaba ang'waanya diigheanji aba doobiiwnata nea manda habearga, ea ghwahidu hinnooda Ng'utamiideanya was Yesu Gristo.

¹⁵ Aba gideaba iihita damandaanyi gay ghwadaajiinyi ASEETA niny geekghaambiit ak goombaliischi nea gabwageaw sugoocheanda sugoodiga Ng'utamiida ng'utamoojiga,

¹⁶ niny nea gaba geaw mayghami ak gwanda jeeda weeshinda majeeneekiisa ak ea manda siida nidaah ak ea manda siida ammu ghwadaa. Mureeda ea uurda daanyi gil ea ghoah eaweega manda muudeanooda! Amin.

¹⁷ Fuga ghamneawa was meanang'oodiga aba badayda ng'eanyiida rukusiina gideaba adagagwara geat nea ghaghus meanang'oocheanduumeani jea gooshean, gagasa ghaghus ASEETA goona haleanjeeda sean saang'a, ak geegadiyeati aba hooseaneega.

¹⁸ Dasina ng'asheega miyaasiin ak ghoaw meanang'oodiga aba sinooda gea miyaas, ak ghoadayda haleanjeeda nyaawa nea gabareanyi sea buuneesuurja aba jeeda miy,

¹⁹ nea goodiiwsa geat haleanjeeda ghoah sindeeta miy aba damanda jea ghoan ak ghwanyas eaweega was gea huumwa.

²⁰ Ea Dimoteo, fura muuchi diita ghayi siiteaganeeyiin ak ang'aamwana geaw ng'asheega mwaloada gil, mawoosa gea diiniin ea sheang'nyeeda fughareeda siguura, Fughareeda ng'uyeega.

²¹ Ak gwanda fuga suuk aba muuwuunoodeaba ng'asheesu ea niramwas masaweega. Gagasa anyasa dagheerjeanduumeeda!