1 Dimotteo 4 - Bibliyeeda Ghaydit

Giinealshoodiga ng'uyeega

¹ Asi ng'asheanji gabean gwarugu Guroorooda Ghaydit nea ghwadaajiit bea gideaba damanda huuydean gwanda fuga jea gooheeli geat masaweega, ak gooleeysiit fuga ng'uyeega ea giinealshooda Shataani.

² Aba ng'uyeega fuga amiitu geat, hean ghaghwarda jeesinga nyaawa saawa nea gaba geat.

³ Inyeessa ghoadeal buuneeda geeshooda, ea agita hamichoojiga nea hamichoojusu ghayi ghabwat ASEETA ak ghwanung' ghwadeaptaawa badiischooda fuga mideawa masaweega nal huumeanji.

⁴ Aba gideaba haleanjeeda sean sin ASEETA aamiyaas, nea manda dea jea eeheawa, dea jea eeheawa, gammiisa gideaba gajeedeaptaawa badiischooda.

⁵ Aba gideaba haleanjeeni simiina ng'asheanda ASEETA ea mooshta ghawooda.

Siida gadiyeeda miy bea Yesu Gristo

⁶ Apkeasiina orjoogiga ng'asheesu, ak gaywoosa siida gadiyeeda miy bea Gristo Yesu, nal ng'asheega masaweega, ea giinealshooda miy ghayi iyaadi geeshta.

⁷ Asi heawana deanghoochka munyas bea gweargwa mwaloada giliin. Ak ang'iing'i giinaali geaw badita ASEETA.

⁸ Aba gideaba deangheeda nung' ghwanyas saseeda uurda ghwahit gilimwanang', ak badita ASEETA ghwahit aba haleanjeeda sean, aba gideaba gindeawi heeleeda eaweegeaba ghamneawa ea diita iidu jea ghwahiduun.

⁹ Ng'asheanji huumwa gil ak gammiisa gideaba gajeamwas.

¹⁰ Aba gideaba ghoah gidaghamneawa adeawiideasa ea gidasigadiyeati muuchi aba badaydeaba gili, aba gideaba aseasa geeghuschi ASEETA majeek was lealnoocheanda buuneesean, ghwaraanya gea mwas niny.

¹¹ Ng'asheesu rukuta nea giinaali.

¹² Adiidu gafool sih gheareemaneanduumeadaang'u, ak guwoosi siida jea eegala aba heeda fuga mideawa masaweega, aba jeeda baloolda ea giibinda sea bariinyeega ea masaweega ea alooheeda.

¹³ Damani jea doonaan, milmiliida aba giisoomanda nea gireekusi buuneeda nea giinaali.

¹⁴ Adinung'waadi gadiyeedida iimuusi mida jeadaang'uuni, sigoonyi aba ramooraneedean, ak ghwayiin gweargwa geatinga nyaawa uhuudaang'u.

¹⁵ Ateemsheesiina ng'asheesu muuchi, ak giibiidi jeeda nea giing'ooysi aba gideaba gay ghwadaajiit giibindaang'u aba heeda buuneesean.

¹⁶ Ghamwada saseadaang'u ea giinealshoadaang'u. Abiidana jeedeaba ng'asheesu aba gideaba iisini ng'asheanji gajaghuuha geaw ea fugiga aleeyseey iidiin.