1 Dimotteo 3 - Bibliyeeda Ghaydit

Fuga hees bea Ganiisa

¹ Ng'asheanji huumwa gil gideaba siida jea ghoah siida haw jea ghoahaaghwa fuga ganiisa gagasa gadiyeeda miy.

² Siida haw bea ganiisa gammiisa gideaba ea meerukuna gidamuy aba badaydaanyi ng'eedeeda mideawa gatmoanagi, mideawa gheadeenda biisa gwandeawa weaghuumeeda, siida arootooschi haleanjeeda, deepiida buuneeda, nal goonealshi,

³ Mii siida boogidi gil, mii siida bara buuneeda, ak ea garbabu, mii siida sheang'nyachi gil, ak ea mii siida bwariiy lapiya,

⁴ ak ea siida ammu goobal gheanyi muuchi nea ghwanung' gaba diibigaaschi mureeda;

⁵ (aba gideaba siida mwaamu goombal gheanyi gay ghoamuustaan ghoahaaghwa Ganiiseeda ASEETA?)

⁶ Ak ea adaghoah siida duu ghwalaalaan askwearjoojisu neekiin, ak ghaghwar geaw ak goobeedeaysa jeeda girgweaksiinda gawuurji gidasihinda Shataani.

⁷ Ak gammiisa gideaba gamuuwuuna badaydaanyi fuga manda jeeda Ganiisa ng'asheega miyaas, aba gideaba adeergu ng'asheega munyas aba badaydaanyi ak ghoabita jeeda gadageeda Shataani.

Weedanga jeeda Ganiisa

⁸ Weedanga fuga Ganiisa eara saawa gammiisa gideaba ea fuga miyaasiin searooji ak ea mii fuga yamiisachi ng'asha, ak ea mii fuga leeha difaayeeda ak ea fuga bwariiy lapiyeeda leabu naweeda mwadoabiiwa gil.

⁹ Ak saawa gammiisa gideaba goomajeek masaweega aba jeeda miy.

¹⁰ Fiisu gidamadeeda ghang'wana ghanyi eadaa ea jea ghoamu gadiyeani ii manda gilisidaah muy abeeda geenung' gwasin gadiyeani bea weedangean.

¹¹ Eara gadeemga nyaawa gammiisa ea fuga miyaas searooji gil, mii fuga napiisa buuneeda ng'uyeega, ak gammiisa ea fuga mideawa gheadeenda gil, nea doobiiweadi aba haleanjeeda sean.

¹² Weedanga Ganiisa gammiisa gideaba gaygaba ng'eedeeni bea gatmoanagi, nea ghoanaal muuchi diibiga nyaawa naweeda miy, ak ghoomu goobal gealga nyaawa.

¹³ Aba gideaba fuga sin muuchi gadiyeeda weedanga Ganiisa gajeewal gheang'da, ak gay gooleeysiit buuneeda ak ea may ghoawal gil aba masaweega nyaawa mida jeeda Gristo Yesu.

Makcheameeda haw

¹⁴ Geang'oorneey barawajeanji nea geabaday hinnooda headaang'u eawoojisu duwaawiin.

¹⁵ Ama deepa dashing'da ginali gidamiisa giibinda fuga gheeda ASEETA was Ganiiseeda ASEETA majeek, was sindeeta ea Lagheaneeda akar gheeda bea huumwa.

¹⁶ Ak ea huumwa gil gideaba makcheameeda badita ASEETA aahaw. ASEETA geetaajiit aba saseeda Ak doobiiwnataanyi ghoahiimu Guroorooda Ak ghwadaah giijasoocheanda humng'eeda Ak geerukwiida iitaanyi aba jeeda eemoojiga, Ak geamwas aba jeeda ng'eanyiida, Ak geeyaat humng'eeda heeda ghaambiidaat.