1 Desaloniikke 4 - Bibliyeeda Ghaydit

Eaweega bwariiy ASEETA

¹ Aba huuydeanda, fuga eaduupcheewi, geemuscheegwa nea geamiinyi gheang'deang'wa aba jeeda Ng'utamiida was Yesu, ak gawuurji gissiinaaldaneegwa aba heedeanya gidanisindaneegwa oopiideata nea goohoosanyi ASEETA, ak gawuurji gidoosindi agooga, ak gagasa agooga asina muuchi ea ghwanaawa.

² Nea ghoanali gideaba ana ng'asha gil ghayi sigoonyeegwa leabu heeda Ng'utamiida was Yesu.

³ Aba gideaba ng'asheesu gea bwariiy ASEETA gil was giimiinoodeang'wa, ak gooheeleewi geat hiseadayeanduumeeda;

⁴ ak ea daba siisi nal gichea ghagheanda niny gatmooda aba ghaydidanda ea mureeda,

⁵ nea mii aba geawunda gheang'da muy, ak goowuurjeewi fuga Eemoojiga mwanala ASEETA;

⁶ ak ea manda siida adiiy, ghana goodiiysa orjeeda ghaamwat aba ng'asheanji, aba gideaba Ng'utamiida dea jea ghawalda mureandoodeaba haleanjeeni seaniini, gawuurji gissibean eamiinda gheang'deang'wa aba mureeda.

⁷ Aba gideaba ASEETA maguurneasa eepiidana jeeda ririnnyeanda was ng'asheega munyas, gagasa eepiidana jeeda ghaydidanda.

⁸ Nea siida heawa ng'asheesu, ea mwaheawa siida ghaheawa ASEETA, gooneegwa agooga Gurooroadaanyi Ghaydit.

⁹ Aba iita bariinyeega orjooga giyeanya moogassi gideaba gaygang'oorneegwa sih, aba gideaba agooga ninaleagwa ASEETA bariinyeegeaba geat;

¹⁰ ak aba huumwa ghoabwariinyi orjooga giyeanya sean mida ng'eanyiida Makedoniya. Asi geamuscheegwa fuga eaduupcheewi, gideaba asina ea ghwanaawa nih muuchi,

¹¹ nea geagasayi goobiitpiit nea ghwasiinda, ak gang'ula ng'asheegeagwa, ak googadiiyi aba geatingeagwa, gawuurji gissirukuteaydi;

¹² ak abeeda gajanyasa mureeda aba heeda fuga eemoojiga, ak ea adooghuschi buuneeda aba haleanjeeda.

Hinooda Ng'utamiida

¹³ Fuga eaduupcheewi asi aseasa meegasi ea moanali gil, aba iiteaba fugiga nimeewean, ak abeeda ea moogiisandani fuga mandeawana rarooda.

¹⁴ Ghang'eada dea simwaseawi gideaba Yesu ghami ak gwaduudu gicha, eara gwasa, aba naweeda Yesu, gaygweadu ASEETA sea niny fugiga nililiin.

¹⁵ Aba nih geerukuneegwa aba ng'asheanda Ng'utamiida, bea gideaba aseaseeda siwooschi majeekcheewi, sinung'waneasa heeda ea ghwahidu damanda jea ghwahina Ng'utamiidean, majeesheedeawana fugiga ghayi nilil aba jeeda miyeedean.

¹⁶ Aba gideaba Ng'utamiida gaygwashuubean niny nea gwaleabu humng'eeda ea shookcheanda haw mideawa diigheanda, ea nyeashta malaykajeanda haw, sea nyeashta durumbeateeda ASEETA. Ak abeeda fugiga ghayi meewiisa jeeda Gristohiin gajeesheeda eetuutu;

¹⁷ hean abeeda aseaseeda siwooschi majeekcheewiin, sihuuydeanyiin, gajeesealdaneasa sea saawa aba jeeda shamooghuutka, ak geadeapti Ng'utamiida aba heetiyeada; ak abeeda gajeendeawana Ng'utamiida galeagasean.

¹⁸ Asi ageandeawana geat salgheang'da aba ng'asheesu.