Biblia Todo Logo
Bìoball air-loidhne

- Sanasan -

1 Desaloniikke 3 - Bibliyeeda Ghaydit

1 Asi aba damanda mudeamuuseewana eamilikghta gicha, geadaayi ghwahit geanung'waneasa bwadaw ng'eanyiida Atene nea geabea geat.

2 Ng'ata geecheagu orjeediyya was Dimoteo, was soomjeanda ASEETA bea Giijasta miy bea Gristo, goodiing'u masaweegeagwa ak goomajeegeegwa,

3 ak siida ea adagwahirbaban aba sawanaduutsu, aba gideaba agooga ghoanali beadi sigooneasa ng'asheanji.

4 Nea aba damanda sindeayeewi sea agooga geebay eerukuneegwa gideaba gajeanyasa sawanadeeda; ak gawuurji gidahitaayda, ak ghoanali.

5 Gwasunu eara aniini aba damanda mutaamuuseewa gicha milikghteayda, geajeagu siida danal masaweegeagwa, ea mwahina siidida jea gwasimeegwean ak gwasimeegwa, amadu gaba gadiyeedeanyu mwadaagha.

6 Hean ghamneawa nea ghwahidu heedeanyu Dimoteoheeda leabu heedeang'wa, ak gweaneasa giijasta miy bea masaweegeagwa ea bariinyeegeagwa ak gwarugu gideaba ghoapkaacheasa galeagasean, nea googasayi deakteanya, gawuurji gissigassiidi aseasa deakteang'wa agooga–

7 fuga eaduupcheewi, aba seareani earapeadi sindi jeeda sawanadeedeanya sean ea giiseaneega sihawdi iisinyaschi iiteang'wa aba naweeda masaweegeagwa;

8 Aba gideaba ghamneawa geandeawi eaweega, aba iyoamiinaadi nea goomajeekcheewiidayi aba heeda Ng'utamiida.

9 Aba gideaba gajeamuusa eatawdaan ASEETA badiischooda aba badahuukeagwa, aba hooseaneegiga sean sindeawiin, aba badahuukeagwa aba madeeda ASEETEANYA.

10 Nea ghoamwaashchi ASEETA muuchi eawa ea askweari ak abeeda geadaayi gheanyangeagwa nea geesissinyi ng'asheega ashoay bea masaweegeagwa.

11 Asi ASEETEANYA was Ghweandeanya sea Ng'utamiideanya was Yesu gagasa ghoadoabiiw naweedeanya ea eahina heedeang'wa;

12 gagasa ghwanung' Ng'utamiida oahaadana nea goopiidi jeeda bariinyeegeaba geat, aba heeda buuneesean, ak gawuurji gissisindi aba heedeang'wa,

13 ak goomajeek gurooruunatkeagwa ea meeyeateeweegwa ghuusi aba ghaydidanda aba madeeda ASEETEANYA was Ghweanda, aba damanda jea ghwahina Ng'utamiideanya was Yesu sea fugaaschi sean ghaydidi.

The Bible in Datooga © Bible Society of Tanzania, 2015.

Bible Society of Tanzania
Lean sinn:



Sanasan