Taytùs 3 - Ŋwàʼlè ə̀ Fèzhə̀ Mkâyn Mə̂ Fèm

Endam zɛ ə ghɨə poməghe kyi sə̂ ndamə

¹ Ò pɨ̂əytə̀ ə̀ghɨ poməghe nə ghənə tsose ngɨŋsə ghənə̂sè əchi ə zɨə sê ngômnàyn, è ghɨə ngômnàynghe. Ghənə kyi va sə̂ tɛ è tuve, nyi è pɨaʼtêzè shîŋə̀ tekɨ̂m se nə̀yn eghɛ zɛ ə ze nyi achûŋ.

² Tsàyn sê ghənə nə kə ghənə ə wâmnə̀ ə̀ghɛ ə pighe kûmə̀ wùə vîvè, pîza nə ghənə ə ndamə è ndam ə pɔ̂ynèzè, nyi èsoynve sê ghɨghe, tsosə̂ sèngɨŋ sə ghənə̂sè əchi sê nâʼàpî ndè.

³ Ə̀ tè nyì sə shi, ghâsènì tè nyîə ngô kəpi, tɛ ètuve, nə̂ pofsə̂ kəpi ə̀ghɛ. Ə tə chwìtè pofsê ghâsènì, ze ə nə̀ ghâsènì e nyi èkɔ̂s se ghɛ ə tsɨə ghɛ ə ghâsènì tè kyiŋə, è kyì əghɛghe əkɨ̂m ghɛ ə wiyn ə ghasènìve tè tyə̀nə nə ve nyîə tsɔ̂fə̀. Ndam ə ghasènìze tè nyîə kyi pi setsɨ̀, ghâsènì e kyiŋə sə̂ kyi èfɨa vɛ ə ghɨə mɔ̀ʼɔghe kyi, fɨnə pânə̀ sèngɨŋ sə ghasènìse.

⁴ Pîza, shîŋə̀ kɛ ə Zhə̀fè mə ə̀ za nyi Sɔ̀zà tè tyəyn tɔʼnè ə vəynze, è kɔ̂ŋ ə Vəynze,

⁵ ə sɔ̀zâ ghâsènì, ə̀ va chi kûmə̀ èghɛ echûŋ zhize kə ghâsènì tè nəyn, pîza ə̀ tè nyì ke kûmə̀ èkosê esəyn ə Vəynze. È və tə shù tsɨsè pisə ghasènìse, ə nə̀ nə tɔynə̂ ə Sezuʼ se Ŋwaʼase, ə ghâsènì kyi ndam efeze kə ghɨ ghɛ ə piə pə̂yn ke ndô ghənə.

⁶ Zhə̀fè ə tə fo Zuʼse ŋwaʼase sê ghâsènì se tsɨ̂ə kə nyi tɔynə̂ Njisə̀s sɔ̀zà ə̀ ghâsènì.

⁷ Kûmə̀ àfùʼ Zhə̀fè ə tə nə̀yn nə ghâsènì ə nyi chichi, è kɨsè nə ghâsènì ke səmɔʼ nə ə tə kyîə èndam zɛ ə ze tə mîə va.

⁸ Ghɛ zɨnə m nyi mə mə wàmnè nyì səmɔʼ. M kyiŋə nə ò tɛ faŋ ke famə ezaʼlê, kə nâʼà ə̀ghɨ ə̀kɨ̂m ghɛ ə ghe nyi mə ə pomə sè Zhə̀fè, fo ngɨŋ sə ghənə̂sè sə̂ nə̀ chùŋ. Zaʼlê nə tɨ̂nə̀ nyi achûŋ tsâmtə̀ nâʼàpî ndè.

⁹ Kə ghàyn ə njiə ə tesaʼnê tə angôte, kûmə̀ m̀ghâŋghàŋə̀ mɛ m̀ ndò pə̂ sê pɨ̀a ə ghasènìghe, pî sə̂ saʼnə̂, nô kûmə̀ àlâŋ. Ghɛ ghɨ̀nə kyi va nâʼà eghɛ zhîze se nə̀yn, ə̀ nyi ke ezhwi ashìŋə̀zè.

¹⁰ Ə wùə pə̀yn è chyâsèzè ə ghàyn ə fètəyn, o fo fɨ̀as ə̀shi sê vəyn, ə ndù ke eshike se nə̀yn zamə, o fo kwəynsə̂ fɨ̀as. Epàmə̂ ə̀təyn ə è ndù ke eshike, kə ghàyn fɨyn kyî èghɛ zhîze se nə̀yn è vəyn.

¹¹ Ghàyn nyîə ke nə kyì əghɨ̀ nə ghɨ̂yn nyi əghɨ ghɛ ə ghe nyi mə ghə kə̀mnè epàmə̂ səmɔʼ, pisə ghənə̂sè e nyi mə se ə tyə̀yn nə ghənə ə nə̀yn pofsê.

Ətetəftê tə ekwuŋsəte

¹² M nyiə nə̂ èpɨaʼtê se tomə pə Atemàs, ə̀ puzâ, m tom pəyn Tìkikùs. Kè kə wùə se ghənə nə̀ pə̂yn zaʼâ, ghàyn ə mɔ̀msə̀ nâʼà sə atyaʼ se pə fe mi ə Nìkopolis, kûmə̀ nə mə chɔʼnê se ndu faŋ fu ashìŋə̀ kɛ ə fofke nyi tsɛ̂sè.

¹³ Ghàyn mɔmse nâʼà sə ŋaŋ se tsàmtə Zenàs, wùə ə̀ sèsaʼ, è Àpolòs ə ghənə e kwì, ghàyn fe nə ghənə kyi ndô nâʼà pîghè vɛ ə ghənə kyiŋə.

¹⁴ Ghɨ ə ghasènìghe kyi se zaʼlê sə̂ nə̂ ə̀ghɛ əchûŋə̀, mə ghənə tsâmtə̀ ə̀ghɨ fo èfɨa vɛ ə ghənə ndɨŋə lâʼà. Ə ghənə nə̂ nyî, ə ghənə kyi ndam zɛ ə ze muə twɔmve.

¹⁵ Ghɨ ghɛ ə ghâsè ghə̀ ghənə nyi əmɔʼ nâʼà ə̀kɨ̂m pi nə m tɔŋte sê ghò. Tɔŋte ghɨ epomə̂ ghɛ ə ghe nyi fɛ sê ghàs; ə̀ghɨ əkɨ̂m ghɛ ə ghe kɔ̂ŋə̀ ghàs. Ə fùʼ ə Fezhə̀kè ə nyi sê ghàyn əkɨ̂m.