Taytùs 2 - Ŋwàʼlè ə̀ Fèzhə̀ Mkâyn Mə̂ Fèm

Ə ghɛ əchûŋ ghɛ ə kyi sə̂ zaʼle

¹ Pîza sê ghò ə Taytùs, ò kyi sə̂ zaʼlə kə èghɛ zɛ ə ze nyi səmɔʼ.

² Zaʼle sê ndômnè ə ndumnə ghe nə, ghənə ke se kyiə sengɨŋ sə ghənə̂sè, kwənə̂ kə ə fo èkɔʼsê se ghənə, nə̂ ə̀ghɛ ètɔf eghaʼâzè. Ghənə kyi sə̂ tɛ ə ghənə ekyî epomə̂zè, kyi sə ngə̂sê kyi èkɔ̂ŋ, è təm ə kolə.

³ Kèpî famə endom, zaʼle zəyn ə ndumnə nə ghənə kyi se ndam endam zɛ ə ze fo ngɨmnêzè sê Zhə̀fè, piə va ghɛ ə pighe kûmə̀ ə̀ghɨ mɔ̀ʼɔ, mɨə tsɛ̂sə̀ va lɨ̀m. Ghənə pɨl kyi sə̂ zaʼlə̂ ə̀ghɨ èghɛ zɛ ə ze nyi achûŋ,

⁴ kə ghənə nyi kàʼa zaʼle zəyn ghɛ ə ghe kwuʼtè malə nə ghənə ə kɔ̂ŋə̀ ə̀ ndom ə ghənə̂ghè è ghɔ ghənə̂ghè,

⁵ nə ghənə ə kyîə sengɨŋ sə ghənə̂sè, nyi ezoze ə ghənə ə tekwàʼtè, fɨ̂aʼà ə ghənə ə sendɛ, nə̂ èghɛ zɛ ə ze nyi achûŋ, tsosə̂ sèngɨŋ sə ghənə̂sè əchi se ndom ə ghənə̂ghè, kə ghənə tə tàʼa pə̀yn èghomə̂zè sê tom ə̀ Fèzhə̀.

⁶ Kèpî èghɨ famə endom, zaʼle kwuŋ tɛ ə te kwûʼtè malə nə ghənə ə kyîə sèngɨŋ sə ghənə̂sè.

⁷ Nâʼàpî eghɛ èkè zɛ ə ò nə̀, ò kyi sə̂ nə̂ endom echûŋvè kə ghɨ əmɔ̀ʼɔghe kaʼa ə ghe səyne sê ghò. Ə nâʼàpî èghɛ èkè zɛ ə ò nə̀, ə ze ə tyə̂nə̀ nə ghɛ zɛ ə ò zaʼlə nyîə kyi èkɔʼnê, ə̀ nyi èghɛ mə ə̀ vachi èshî.

⁸ Ò zaʼlə kə èghɛ zɛ ə ze nyi səmɔʼ kə wùə ə vayn kàʼa è wamne pi kûmə̀ zəynze. Ə ò nə̀yn nyî, ə pàyn sɛse ghomə kûmə̀ nə ghənə nə fɨyn kyi va ghɛe se pi kûmə̀ ghâsènì.

⁹ Zaʼle kɔ̂svè nə ghənə tso ngɨŋ sə ghənə̂sè əchi, ə zɨə sê pɛ̀ efɨ̀aʼ ə ghənə̂ghè, ə ghənə mɔmse se nə̀yn nə ghənə ə saŋnə̂, kyi va sə̂ fɨysə̀ èghɛ ə ghənə echo,

¹⁰ è kɨsè nə ghənə kyi va se chɔŋ sê pɛ̀ efɨ̀aʼ ə ghənə̂ghè. Ghənə kyi sə̂ pɨlə tyə̂nə̀ sê pɛ̀ efɨ̀aʼ ə ghənə nə ghənə nyi ə ghɨfɨaʼə chûŋə̀ mə pɛ̀ efɨ̀aʼ kàʼa e samse. Nyiəmə, ə tendom tèkɨ̂m, ə ghənə nəyn ə ghɨghe fe nə zaʼlêzè kûmə̀ Fezhə̀ sɔ̀zà ə̀ ghâsènì nyîə tsɔ̂fə̀.

¹¹ E kyi sə̂ nyi nyî kûmə̀ nə fùʼ ə Fezhə̀ kɛ ə ke pə̂ esɔzaze nyi mə ke ə pə̀yn se ghɨghe əkɨ̂m.

¹² Ə̀ nyi afùʼ ə Fèzhə̀ nə kɨ̂yn ə ke zaʼlə ghâsènì nə ə maʼa ndam zɛ ə ndamə mə ə ke va Zhə̀fè chûmtə̀ èfɨa ə mbive. Ghâsènì kyi se ndam famə ə mbi èpi nyi ètɔf eghaʼâzè, nyi chichi, nə̂ èghɛ zɛ ə Zhə̀fè kyiŋə

¹³ kə ghâsènì lɨmtə è kwâʼtè elɨmtəze tuʼ fe kayntəfe kə pomsê ə Fezhə̀ fə ghâsènì fe ghaʼâfè è sɔ̀zà Njisə̀s Klâys tə pə̂.

¹⁴ È və tə fo ngɨŋ ə vəyn se sɔ̀sè ghâsènì ə sepi sekɨ̂m, se fɨnə nə̀yn nə ghâsènì zo kwəyne sə̂ nyi ə̀ghɨ vəyn ghə ngɨŋghe, mə ə fo ngɨŋ sə ghənə̂sè sə̂ nə̂ èfɨaʼ echûŋzè.

¹⁵ Ò zaʼlə̂ ə̀ghɛ nə ghɨ̂yn sê ghɨ ə poməghe, fo ə̀təm sê ghənə nə ghənə ə nə̂ ghəynghe. Ò nyi ə̀ kyi àtyaʼ se zɔ̀ ə ghənə nâʼàpî ashìŋə̀ àkè ezhoghɛ ə ghənə nə̂yn pofse, mə ò kyi va se zà nə wùə sê ghənə chiyne ghô.