Taytùs 1 - Ŋwàʼlè ə̀ Fèzhə̀ Mkâyn Mə̂ Fèm

Etɔŋtê mə ze ndo pə̂yn se Pɔ̂l

¹ Ə̀ nyaʼ mi Pɔ̂l ŋwàʼlè zɨ̀yn. M nyi wufɨ̀aʼa ə Fèzhə̀, fɨyn nyi wùətom ə̀ Njisə̀s Klâys. Ə tè chɔʼ tom mi nə m tsamte se nə̀yn nə kyî epomə̂ əghɨ̀ ə Fezhə̀ ghɛ ə fe chɔʼte ə tɛ, se fɨnə nə̀yn nə ghənə ə ke səmɔʼ zɛ ə è nyi tsàmtè ə ghənə se nə̀yn nə ghənə ke Zhə̀fè.

² Səmɔʼ nə zɨ̂yn nə̀ nə ghənə ə ke səmɔʼ nə ghənə nyîə kyi èndam mə ze tə mîə va, mə nyi endam zɛ ə Zhə̀ fɛ ə fe wamə va tè tsɨ̀ne sê ghənə tsɔ̀fə kə pom mbi.

³ Zhə̀fè ə tə nə̀yn nə ghɨghe ke tom ə̀ vəyn kè ashìŋə̀ kɛ ə Fe tè kyiŋə. Zhə̀fè Sɔ̀zà ə̀ ghâsènì ə tè tsɛ̀sè lâŋkè nə ə fo tom ə̀təyn sè mi ə mə ndaʼà.

⁴ M nyâʼà sê ghò ə Taytùs. Ò nyi ke nâʼà kə kàyntə̀ vayn vɨ̂mvè kûmə̀ nə ghasè ghò kyi ke èkyî epomə̂zè emɔ̀ʼ. Ə Zhə̀fè Pɨ̀a, è Klâys Njisə̀s sɔ̀zà ə̀ ghâsènì fo ghô fùʼkè è pɔ̂ynè.

Efɨaʼ zɛ ə Taytùs kyi sə̂ nə̂ endaʼ ə Kilitzè

⁵ M tè zà ghô ə klìlit nə ò chise ghɛ ghɛ ə ghe tè nduə va achûŋ fumə, ə ò chɔʼte kepî sèchəʼ ə se ndɛ̂ sə Fezhə̀sè nâʼà pi ə tɔ̂ŋ èkè, kè endom vɛ ə m tè pì sê ghò.

⁶ Chəʼ kyi sə̂ nyi wùə mə è kyi va ləʼke; è kyi sə̂ kyi ke zhwi emɔ̀ʼ, ghɔ vəynghe e kyi sə nyi ə̀ghɨ epoməghe, mə ə ke va ghənə kə ghɔyn ghɛ ə ghe tsəfə, tɛ ètuke.

⁷ Kè kə chəʼ nyi wùə vɛ ə è tɔ̀ʼnə̀ è ndɛ ə̀ Fezhə̀, è kyi sə̂ nyi mə è kyi va ləʼke, kyi va sə̂ kyi ècho epize, è kɨsè sə̂ zâŋsə̀ nyɔ̂ʼsə̀ ètɔŋ, è kyi va sə̂ ngəsə̂ mɨə m̀lɨ, è kyi va sə̂ nô, kyi va sə̂ kyiŋə se kyî ekɛ è paʼà fɨ̂aʼ vəynve.

⁸ È kyi sə̂ nyi wùə, tɔ̂ʼnə̀ è ghɨ motə pə, fɨnə kɔ̀ŋɔ̀ sə̂ nə̂ ə̀ghɛ chûŋə̀. È kyi sə̂ nyi wùə, ke se kyiə ngɨŋ ə vəyn, nə̂ ə̀ghɛ ghɛ ə ghe nyi chichi, nyi èŋwaʼze, nguŋnə̂ ngɨŋ ə̂ vəyn.

⁹ È kyi sə̂ nyi wùə mə è və fɛte kyî tom èchùŋ zɛ ə è nyi səmɔʼ zɛ ə zaʼlə sê vəyn kə è və ke se zaʼle əghɨ è ghɛ ghɛ ə Zhə̀fè kyiŋə, fɨnə nə̂ nə ghɨ ghɛ ə ghe kwiynsə̂ tom nə zɨnə̀ ke nə ghənə nyîə nə̂ pofsə̂.

¹⁰ M piə nyi kûmə̀ nə ghɨ tsɨəghe ə ghàyn əfètəyn zɨtə va, tsɨnə̀ wâmnə̀ kə tèwâmnè tezomte, fɨnə lesə̂ ə ghɨ. Ghɛ nə ghɨnə mə tsɨ̂ə ə fètəyn ə̀ghɨ ghɛ ə ghe pîə zûŋsə̀ nə wùə kàʼa è kyi ke èsɔzaze ezhoghɛ ə se nam ə vəynghe.

¹¹ Ò kyi se nə̀yn nə kə ghənə ə tsɨnə̀ wàmnə̀ nyi kûmə̀ nə ghənə ndùə njiə əghɨghe mpɨəyn, ghənə pofsə̂ kə m̀kɨ̂m è zaʼlê epi nə zɨ̂nə̀. Ghənə nə̂ nyî kè se kyî ekɛ mə nyi afɨa kɛ ə ke pə̂ èghomə̂zè.

¹² Wùə ə̀ ghənə̂ vîvè ə Klìlît mə nyi wùə èghaʼâ ə ŋwàʼlè ə tə pì ghɛ kûmə̀ ghənə nə, “Ghɨ Klìlit ghəkɨ̂m nyi əghɨ akaŋghe, ndamə kə kə senyam sə mbvɨynse pise, zɔlə̂, zhiə tsɛ̂sə̀.”

¹³ Ghɛ nə zɨnə mə nyi səmɔʼ. E za tyə̀nə̀ nə ò kyi se zɔ̀ sê ghənə nâʼà è tyaʼa kə ghənə pomə è tyaʼke sê ghɛ zɛ ə ze nyi səmɔʼ,

¹⁴ ə fɨnə zɨtə̂ va ghâŋghàŋà me èzom mə̂ ə̀ghɨ Njûsə̀m, fɨnə zɨtə va lwɔ̂ŋ vɛ ə ve ndô pə̂ sê ghɨ ghɛ ə ghe nyi mə ə tə ghɛ zɛ ə ze nyi səmɔʼ.

¹⁵ Ghɨ ghɛ ə təmə ghənə̂ghè zo, nâʼàpî àkè nyiə zo sê ghənə. Pîza ghɛ ə təm ə ghənə̂ghè zo va, è ghɛ ə nyi ndɔ̀ʼɔ pomə, fɨa kyîke va ə ke zo sê ghənə. E nyi nyî kûmə̀ nə kwâʼtè tə ghənə̂tè, è təm ə saʼa ə ghənə̂ghè nyi mə ə pofsê.

¹⁶ Ghənə kaŋkaŋa pîə nə ghənə ke ndo Zhə̀fè, pîza ndam ə ghənə̂zè e tyə̂nə̀ nə ghənə ə tə vəyn. Ndam tə ghənə̂tè nyîə kwə̂mnə̀, ghənə e tɛ ètuve, mə ghənə vayn kàʼa nəyn nâʼà èghɛ zhîze mə ə̀ nyi eghɛ echûŋzè.