Ŋwàʼlè ə̀ Pɔ̂l sê ghɨə Lûmghè 7 - Ŋwàʼlè ə̀ Fèzhə̀ Mkâyn Mə̂ Fèm

Ghɨ ə Klâysghè fɨyn va etyə̂ àlâŋ

¹ Ghɔnyì ghɨmə, ghàyn nyiə ke kûmə̀ èlwɔ̂ŋ. Ghàyn ghɛ ke nə ghɨghe nyi ke etyə̂ àlâŋ shîŋə̀ kɛ ə ghənə pa nyi ètwɔzə?

² Ə ghâsènì nji Chwìə ə̀ghɛ ə malə̂ghè. Ə wùzhɔyn malə wùə, lâŋkè pìə nə è kyi sə nyi yî ndôm ə̀ vəyn shîŋə̀ tekɨ̂m kə ndom pa nyi ètwɔ. Pîza ə ndom ə̀ vəyn kwu, lâŋ ə malə̂kè fɨnə ko va vəyn.

³ Nyiəmə, ə è ndam yî ndom ə̀ mɔʼɔ mə ndom ə̀ vəyn pa nyi ètwɔ, ə tɔŋtə̂ vəyn nə wùzhɔyn vɛ ə è chùmtə̀ wùə ndomə̀ mə è pa nyi ə ndom ə ndɛ. Pîza ə ndom ə vəyn kwu, ə nyi mə kə lâŋkè tyə̀nə̀, ə è və nyi sə və ngɨŋ. Mə ə è njì ndom ə̀ ndò ashìŋə̀ nə kɛ mə, ə ze ə tyə̂ nə è paʼà chùmtè wùndômə̀ əpɨəyn.

⁴ Ghɔnyì ghɨmə, ə̀ nyi zamə kə ze nyi kepî se ghàyn. Lâŋkè fɨyn kiva tyaʼke ə ghàyn ə tu kûmə̀ nə Njisə̀s ə kwu, ghàyn ghe kwu kepî. Zôyn, ghàyn nyi əghɨ ə wûə ndòghè, ə Njisə̀s vɛ ə Zhə̀fè nyi mə Fe ə zomsè kə ghàyn ə nyi kàʼa ə ghàyn fɨ̂aʼ sê Zhə̀fè achûŋ.

⁵ Kûmə̀ nə shîŋə̀ kɛ ə ghâsènì tè nyi etyə̂ ètsɨsə̂ ə wûə m̀sɔ̀ŋze, lâŋkè tè nyîə ndwisə̀ ə̀ghɛ epi ghɛ ə wîyn mə ghasènîəm kyiŋə. Zɨnə tè nyiə nə̂ ghâsènì e nə̂ əghɛ epi ghɛ ə ghe pə̂yn ekwuze.

⁶ Pîza, zôyn ghâsènì ə fɨ etyə̀ àtyaʼ alàŋkè kə ghâsènì nyi mə kwu. Nyiəmə ghâsènì fɨyn va etyə̂ àlâŋ kə ekɔ̂s. Zɨnə ə nə̀yn zôyn ghâsènì e chûmtə̀ èndom efeve se fɨ̂aʼ se Zhə̀fè. Ghâsènì fɨaʼà se Vəyn endom vɛ ə Zuʼ sə Fezhə̀sè tsà sê ghâsènì, ə̀ vachi se chùmtè elwɔ̂ŋ vɛ ə nyi mə ə nyàʼ tsosê.

Ə̀ nyi alâŋ ə Fezhə̀kè ə ke chwîtə̀ pi sə ghasènìse

⁷ Ghâsènì nə̀ piə nə ghe zo? E tyə̂ nə lâŋkè pofə ndò mə? Ngaŋngaŋ! Lâŋkè pofə chîəva, pîza ə̀ nəyn alâŋ kə m mə ke èghɛ zɛ ə ze nyi eghɛ epize. Ə lâŋkè tè tàʼa pì nə kə wùə ndəm shize ə wùə afɨa, mə m keva nə ze pofə ndò se ndə̀m eshi ə wùə afɨa.

⁸ Pîza lâŋ nə kɛ mə tè ndwìse ekwaʼtè zɨmze pize, ə nə̀ mə zhə̀tə̀ se ndə̀m eshi əghɨ ghe efɨa ə tendom tetsɨəte. Ə lâŋkè va, ə pi ə va.

⁹ Shîŋə̀kè tè nyì ndô mə m keva lâŋkè. Pîza shîŋə̀ kɛ ə m tè ke lâŋkè ətəyn, shi ə fɨə ghɨmghe ə chiyntə̂ mi nə m nəyn pi, mə kwuə.

¹⁰ Lâŋ kɛ ə Zhə̀fè tè fo nə ke pəyn èndamze ə tə pɨl zhwi mi.

¹¹ Pi ə tə tsɛ̀ epàmə àlàŋ, lɛsə̂ mi, mə nə̀ pi, pi ə̀təyn ə zhwiə mi.

¹² Nyiəmə, ghâsènì ə fe nə lâŋkè ə kəynke ə ngɨŋ nyi èŋwaʼzè, ghɛ zɛ ə lâŋkè pì e nyi èŋwaʼze, ke nyi àchûŋ, tsɔfə.

¹³ Pîza, zɨnə mə tyə̂ ndò nə fɨa kɛ ə ke pɨlə tsɔ̂fə̀ ə pə̀yn mi èkwuze mə? Ngaŋngaŋ, e vachi zamə. Ə̀ vachi àlâŋ ə ke pə̂ mi èkwuze, ə̀ tsɛ pi epàmə̂ àlâŋ, mə ə̀ nyi afɨa ə chûŋkè, ə pə̀ mi ekwuze. Zɨnə mə tè kyayn kə ghɨghe fe kə pi nyi. Nyiəmə, Lâŋ ə Fezhə̀kè ə nə̀yn, pi e chwîtə̀ àtyaʼ ə vəynke nâʼà sə ŋaŋ.

Ngyə̀s kɛ ə ke nyi ə wùə m̀sɔ̀ŋ ə fètəyn

¹⁴ Ghâsènì nyiə ke nə Lâŋ kɛ ə ghâsènì wàmnə̀ kûmə̀ kəynke nyi afɨa ə sezuʼ. Pîza m nyi wùə m̀sɔ̀ŋ. M nyi kə wùə ə pəʼle etyə̂ pi kə akɔ̂s.

¹⁵ M paynse tɔʼ keva ghɛ zɛ ə m nə̂. Ghɛ ghɛ m kyiŋə se nə̀yn, m nə̂ va ghəynghe. Ghɛ ghɛ ə m pâynə̀ ə̀ nyi ghəynghe ə m pɨlə nə̂.

¹⁶ Zôyn kə m nə̂ ghɛ ghɛ ə m kɔ̂ŋə̀ va se nə̀yn, zɛ mə chwîtə̀ nə mə pomə̂ nə lâŋkè nyîə tsɔ̂fə̀.

¹⁷ Pîza, səmɔʼ ə̀ lote vachi mi è ngɨŋ zɨ̂mzè kə m paynsə̂ nə̂, pîza ə̀ nyi pi zɛ ə è nyi ə mì əfètəyn ə è chiyntə mi nə m nəyn zamə.

¹⁸ M kendô nə ghɛ echûŋ zhîze va ə mì əfètə̂ təm, zɛ mə tyə̂nə̀ nə ə mì əfètə̂ ewìyn ə wûə m̀sɔ̀ŋve. Pi kə təm ghɨmghe chiyntə mi nə m nəyn chùŋ, e tɛ ghaʼa ndò mi se nə̀yn.

¹⁹ M nə̂ va ghɛ chùŋ zɛ m kɔ̂ŋə̀ se nə̀yn, pîza ghɛ epi zɛ m kɔŋə̀ va se nə̀yn, ə̀ nyi zəynze ə m pɨlə nə̂.

²⁰ Zôyn kə m nə̂ ghɛ zɛ ə m kiva se nə̀yn, zɨnə mə chwîtə̀ nə ə̀ vachi mi è ngɨŋ zɨ̂mzè ə m paynsə̂ nə̂ ghɛ ətəynghe. Pîza ə̀ nyi pi zɛ ə è nyi ə mì əfètəyn ə è chiyntə mi nə mə nə̂ ə̀ghɛ ətəynghe.

²¹ Nyiəmə, m fe nə lwɔ̂ŋvè nyì ndô vɛ ə m nyi etyə̂ ə̀təyn. Nâʼàpî ashìŋə̀ àkè kɛ m kyiŋə se nə̀yn eghɛ echûŋzè, ə̀ nyi ke sê mi kə m nəyn pi.

²² Ə̀ mì əfètə̂ ə̀təm, m kɔ̂ŋə̀ se chùmtè alâŋ ə Fezhə̀kè è təm ghɨmghe əkɨ̂m.

²³ Pîza mə fe nə lwɔ̂ŋ əmɔ̀ʼɔve nyi ndô vɛ ə wiyn vɨmve ə wùə m̀sɔ̀ŋve nyi etyə̂ ə̀təyn, ve nô èlwɔ̂ŋ vɛ ə təm ghɨmghe kɔ̂ŋə̀. Lâŋ nə kɛ mə ə kyî mi ə nə̀ nə mə nyi àkɔs.

²⁴ Ə̀ nyi ekyì etsòs èkwə̀ ə ve kote mi nyiə! Ə nə̀ fiə za ndè mi fa ewìyn ə wùə m̀sɔ̀ŋ vɛ ə ve pə̂ mi è kwuze nyiə?

²⁵ Zɔ̀ŋnèkè nyì sê Zhə̀fè. E və fi za ndam zɨmze tɔynə̂ ə Va Vəyn Pɛ̂pɛ ə̀ ghâsènì Njisə̀s Klâys. Təm ghɨmə tsâ se mi nə m chumte lâŋ ə Fezhə̀kè, pîza wiyn vɨm və wûə msɔ̀ŋve e chûmtə̀ pi zɛ ə è nyi ə mì əfètəyn.