Ŋwàʼlè ə̀ Pɔ̂l sê ghɨə Lûmghè 6 - Ŋwàʼlè ə̀ Fèzhə̀ Mkâyn Mə̂ Fèm

Pi nyi mə è zə zhwi ghâsènì pîza Klâys ve zomsè ghâsènì

¹ Ghâsènì nə̀ piə nə ghe zo? Ə ghâsènì ndu ke èshike sə̂ ndamə ə pi kə fùʼ ə Fezhə̀kè ə ndəmə̂ kɔʼɔ ndûə kə èshike ə?

² E vachi zâ. Ghâsènì ə kwu fɨyn kiva ghɛ zhîze se nə̀yn è pi. Ghâsènì kàʼa faŋ zayn sə nə̂ nduə kə pi èshike ə?

³ Ghàyn keva nə shîŋə̀ kɛ ə ghâsènì tè fi mômè, ghâsènì tè nyì sə afɨa àmɔ̀ʼ ghasènìə ghə̀ Klâys, ə kwuə ghasènyìə ghə̀ Vəyn ə?

⁴ Mô mɛ ə ghâsènì tè fi chwîtə̀ nə ghâsènì ə kwu, ə vɛ ə pfɨ̂mə̀ ghâsènì è Vəyn. Zɨnə mə tè kyayn se nə̀yn nə ghâsènì kyi ndam efeze. Zɨnə mə nyi kepî èghɨ kə pɨ̀a tè zòmse Klâys, è pɔmsê ə Vəynze endam efeze.

⁵ Ə ghâsènì nyì sə afɨa àmɔ̀ʼ e vəyn kûmə̀ ekwu ə Vəynze, ə ghâsènì tə nəyn ə nyi kepî sə afɨa amɔ̀ʼ è Vəyn ezhoghɛ ə ghâsènì zòmə̀.

⁶ Ghâsènì kyi sə̂ kwaʼtə̀ kə shîŋə̀ tekɨ̂m nə kə ə tè paynte Klâys awâmnè, ə tè paynte Vəyn è tsɨsə̂ emɨ zɛ ə ghàs tè kyi chi. Zɨnə tè kyayn kə tyaʼ etsɨsə emɨ kɛ ə ke tè nə̂ nə ghâsènì nəyn pi njise. Zɨnə mə tə nə̂ ə pi taʼa fɨnə njiə ghâsènì kə ekɔ̂s.

⁷ Ə wùə kwu, pi e fɨyn kiva tyaʼke ə vəyn ətu.

⁸ Kə ghâsènì se nyi mə ə tə kwu ghasènìghə̀ Klâys, ghâsènì pomə̂ ndò nə ə tə pə̂ ə nyi kepî ètwɔ kə Vəyn.

⁹ Ghâsènì pomə̂ nyiəmə kûmə̀ nə ghâsènì kendô nə Klâys ə tə zômə̀, va se fɨnə kwu nâʼà kə ghè tə ghayn. Kwuze fɨyn kyi va tyaʼ kyîke.

¹⁰ Kə è kwu, pi fɨyn kiva ghɛ zhîze se nə̀yn è Vəyn. Ndam zɛ ə È nyi ətəyn zôyn, nyi endam zɛ ə ze nyi yî Zhə̀fè.

¹¹ Kèpî endom nə vɨnə mə, ə̀ nyi zamə kə ghàyn kyi sə̂ fe sèngɨŋ saynse kə ghɨ ghɛ ə nyi mə ə kwu kə pi tə nəyn ə è zə fɨyn kiva tyaʼke ə ghàsenì ətu. Ghàyn e fe kəpi sèngɨŋ saynse kə ghɨ ghɛ ə ghe nyi etwɔ ghâyn ghə̀ Zhə̀fè tɔynə̂ se Njisə̀s Klâys.

¹² Kə ghàyn fɨyn za nə pi ə kyi àtyaʼ ə ghàyn etûə èwìyn achaʼ mchike. Zɛ mə nə̀ nə̂ ə ghàyn ə fɨyn va chùmtè əghɛ ghɛ njà ewìynse kyiŋə.

¹³ Ghàyn kiva sə̂ zâ apâs kayn kyîke əfètə̂ ghɛ pighe, kyi kepî va sə̂ njiə kəynke nə̂ ə̀ghɛ əpighe ətəyn. Pîza ghàyn pɨl fo sèngɨŋ saynse sê Zhə̀fè kə ghɨ ghɛ ə nyi mə ə fɨsê ghənə ekwu, ə fo ghənə èndam efeze. Ghàyn fo nâʼà èwiyn vaynve ekɨ̂m ə Zhə̀fè ə gho, kə è tə nəyn ə ghàyn ə nə̂ ə̀ghɛ ghɛ ə ghe nyi chichi ə Zhə̀fè əshi.

¹⁴ Pi kiva sə̂ kyi àtyaʼ ə ghàyn ə tu. Ghàyn va etyə̂ àlâŋ pîza ghàyn nyi ə Zhə̀fè etyə̂ àfùʼ.

Ghâsènì nyi èkɔ̂s se nə̀yn eghɛ zɛ ə Zhə̀fè kyiŋə

¹⁵ Ghâsènì nə̀ pîə nə ghe zo ə? Kə ghâsènì nyi etyə̂ àfùʼ ə Fezhə̀kè, ghâsènì kyi ndô sə nə̂ nduə kə pi kûmə̀ nə ghâsènì fɨyn va etyə̂ àlâŋ ə? Ngaŋngaŋ e vachi za.

¹⁶ Ghàyn keva nə ezhoghɛ ə wùə ndə̀m ngɨŋə̂ vəyn ə wùə mɔ̀ʼɔ etyə̀ kə akɔ̂s, ə è və nə̂ nâʼàpî èghɛ èkè zɛ ə wùə ətəyn pîə, kə è nyi akɔ̂s se wùə təyn ə? Ghɨ ghɛ ə nyi mə fo ngɨŋ sə ghənə̂sè se ə̀ nə̂ ə̀ghɛ ə pighe, ndâʼà ghənə̂zè nyi ekwu. Pîza wùə vɛ ə è fo ngɨŋə̂ vəyn se nə̀yn kə Zhə̀fè kyiŋə, è nyi wùə vɛ ə è nə̀ ghɛ ghɛ ə ghe nyi chichi ə Zhə̀fè əshi.

¹⁷ Pîza zɔ̀ŋnèkè nyì se Zhə̀fè. Ghàyn ghɛ ə ghàyn tè nyi kɔ̂svè etyə̂ ə̀ghɛ ə pighe, ghàyn ə zàmaʼà ndom nə vɛ mə, ə nyaʼâ chumtə̀ ə̀ghɛ ghɛ ə ghe nyi səmɔʼ è təm ghaynghe əkɨ̂m.

¹⁸ Zôyn kə Zhə̀fè nyi mə Fe ə fɨsê ghàyn etyə̂ àtyaʼ əghɛ pighe, ghàyn ə pə̀yn sə ekɔ̀s sə nə̂ èghɛ zɛ ə Zhə̀fè kyiŋə.

¹⁹ M pîə ə̀ghɛ nə ghɨ̂yn nâʼà ə̀kɨ̂m kə wùə msɔ̀ŋ, kûmə̀ nə ghàyn kə əghɨ msɔ̀ŋghe tɔ̂ʼɔ̀ zɨə kêva. Sə shi ghàyn tè fo sengɨŋ saynse kə ekɔ̂s, nə̂ ə̀ghɛ ə pighe è kɨsè ghɛ ə teliŋghe, nə̂ ndûə kə ə̀ghɛ ə pighe. Zôyn ghàyn kyi se fo sengɨŋ saynse əkɨ̂m kə ekɔ̂s, sə nə̂ ə̀ghɛ kə Zhə̀fè kyiŋə, ə zɨnə nəyn ə ndam zaynze ə nyi è ŋwaʼze.

²⁰ Ə̀ tè nyì səshi kə ghàyn tè nyi kɔ̂svè etyə̂ ə̀ghɛ epighe, ghàyn tè kiva ghɛ zhîze se nə̀yn èghɛ zɛ ə Zhə̀fè tè kyiŋə nə ghàyn nəyn.

²¹ Ə̀ nyi chùŋ èkè zɛ ə ghàyn tè kyi kə ghàyn tè nə ghɛ ghɛ ə ghe pə̂ èghomə̂zè zôyn fumə ashìŋə̀? Ghɛ zɛ ghɛ nə ghɛ mə pə̂ e zɨynze nyi ekwu.

²² Pîza Zhə̀fè ə fɨse ghàyn etyə̂ àtyaʼ əghɛ pike, ghàyn e nyi èkɔ̂s ə Vəynve zôyn. Chùŋ zɛ ə ghàyn tə kyiə nyi nə Zhə̀fè ə nə̀yn ghàyn e nyi èŋwaʼze kə ghɨ Vəynghe nyi èŋwaʼze. Zɛ mə tə nə̂ ə ghàyn kyi ndam zɛ ə ze tə mîə va.

²³ Ghàyn ke ndô nə ndâʼ zɛ əghɛ ə pighe pə̂yn è zəynze nyi ekwu. Pîza maʼte vɛ ə Zhə̀fè fo sê ghɨghe səndô nyi endam zɛ ə ze tə mîə va. Ghâsènì ə kyî zəynze kə ghâsènì nyi ghasènìghə̀ Njisə̀s Klâys Pɛ̂pɛ ə̀ ghâsènì.