Ŋwàʼlè ə̀ Pɔ̂l sê ghɨə Lûmghè 4 - Ŋwàʼlè ə̀ Fèzhə̀ Mkâyn Mə̂ Fèm

Ə̀ tè nəyn epomə̂ kə Zhə̀fè nji Aplàghâm

¹ Ghâsènì kaʼa pi nə ghe kûmə̀ pɨ̀a ghâsènì və shi Aplàghâmə. Ə̀ tè kyayn ghe ə vəyn ashìŋə̀ ə.

² Ə̂ nyi mə è tè nyi chichi ə Zhə̀fè shi kûmə̀ ə̀ghɛ ghɛ ə è nə̀yn, ə è və kyi eghɛ zɛ ə è kàʼa è tsɔs ngàŋtèkè ətəyn. Pîza è tè va se kàʼa è kyi ghɛ zhîze se tsɔ̀s angàŋtè ətəyn ə Zhə̀fè əshi.

³ Ŋwàʼlè ə Fezhə̀ pi nə, “Aplàghâm ə tə pomə̂ Zhə̀fè, kûmə̀ èpomə̂ ə vəynze, Zhə̀fè ə njìə vəyn kə wùə chichi ə və shi.”

⁴ Ə wùə fɨ̂aʼ, ə ndàʼà vəyn ətə èfɨ̀aʼ zɛ ə è nə̀yn. Ndâʼ nə zɛ mə va kə emâʼte. Ə̀ nyi afɨa kɛ ə è kyi se kyî kûmə̀ àzuʼse ə vəynke.

⁵ Pîza ə wùə tàʼa fɨ̂aʼ ə ndə̀mə̀ ə və təm nə, kə zhi pomə Zhə̀fè, nə zɛ mə tə nə̂ ə zhi ə nyi chichi ə Zhə̀fè əshi, ə Zhə̀ fɛ ə fe nə̂ nə ghɨ pighe ə nyi chichi ə və shi, È nə̀ njiə vəyn kə wùə vɛ ə è nyi chichi ə Zhə̀fè əshi kûmə̀ nə è və pomə̂ vəyn.

⁶ Ze nyi kepî èghɨ kə Ndàfît tè wàmne kûmə̀ èpɔsê ə̀ghɨ ghɛ ə nyi chichi ə Zhə̀fè əshi, pi kə ghənə nə̂ va fɨ̂aʼ zhîze.

⁷ Ndàfît tè pi nə, “Pɔsêzè nyì sê ghɨ ghɛ ə Zhə̀fè nyi mə fə lɛ̀sè fo tsas tə ghənə̂tè, ə zə̀sə̀ sèpi sə ghənə̂sè.

⁸ Pɔsêzè nyì se wùə vɛ ə Pɛ̂pɛ Zhə̀fè tə fɨnə kwaʼtə̀ va ghɛ ə Vəynghe pighe.”

⁹ E za tyə̀ nə ghɨ ghɛ ə nyi mə ə se nam ə ghənə̂ghè nyì ke ghɛ ə ghe tə kyiə pɔsê nə zɨ̂yn ə Ndàfît pìə mə ghɛ ə nyi ndɔ̀ʼɔ se nam ə ghənə̂ghè tə kyîə kəpî ndò pɔsê ətəynze ə? Ghâsènì nyi mə ə kàynè pi nə ŋwàʼlè ə̀ Fèzhə̀ pi nə, “Aplàghâm ə tə pomə̂ Zhə̀fè, Zhə̀fè ə njìə vəyn kə wùə chichi ə vəyn əshi”

¹⁰ Ə̀ nyì ashìŋə̀ àkè ə Zhə̀fè tè nji vəyn kə wùə chichi ə? Ə tè nyi mə ə se nam ə vəynghe mə pâʼà se ə? Zɨnə mə tè kyayn mə pâʼà nyìəm se nam ə vəynghe.

¹¹ Ə tè piə se ə̀ nam ə vəynghe mə Zhə̀fè ə kàynè nji vəyn. Se ə nam ə vəynze tè nyi chwìə se tɔ̀ʼɔ̀ chichi ə̀ vəyn ə Zhə̀fè əshi kûmə̀ èpomə̂ ə vəynze. Pi kə Zhə̀fè tè pomə vəyn kə wùə chichi, ə tè paʼà se nam ə vəynghe. Zɛ mə tè nyì se nə̀yn nə Aplàghâm ə nyi pɨ̀a sê ghɨghe əkɨ̂m ghɛ ə nyi mə ə paʼà se nam ə ghənə̂ghè mə ghənə nyi chichi ə Zhə̀fè əshi kûmə̀ nə ghənə ə pomə̂ Zhə̀fè.

¹² Zɨnə mə tè nyì kə è və nyi kepî pɨ̀a ə̀ghɨ̀ ghɛ ə nyi mə ə se nam ə ghənə̂ghè, mə ghənə ə pomə kepî Zhə̀fè eghɨ kə pɨ̀a ghâsènì tè pomə ndɔ̀ʼɔ nyiəm se ə̀nam ə vəynghe.

Ə̀ nyi epomə̂ ə ze nə̂ nə wùə kote fɨa kɛ ə Zhə̀fè pì

¹³ Ghɛ mɔ̀ʼɔ zɛ ə ghâsènì ke nyi nə sə mɨ, Zhə̀fè ə tə tsɨ̀nè se Aplàghâm è ghâŋ fə vəynfe nə Zhi tə fo mbi ə ghənə gho. Zhə̀fè tè paʼà wàmnè chi zamə kûmə̀ nə Aplàghâm tè nyiə chumtə̀ elwɔ̂ŋ ə Vəynve. Zhə̀fè tè pi nyiəmə kûmə̀ nə Aplàghâm ə tə pomə̂ vəyn, Zhə̀fè ə njìə vəyn kə wùə chichi ə və shi.

¹⁴ Ə ze tè nyi nə ə̀ nyi əghɨ ghɛ ə ghe chûmtə̀ lâŋkè se kyî, ə fɨa kɛ ə Zhə̀fè tsɨ̀ne ndə̂m nə È tə fo ndò, ə nyi mə pomə̂ zɛ ə ghɨ kyi sê Zhə̀fè vachi èghɛ zhize. Ə ze ə nyi nə fɨa kɛ ə Zhə̀fè tsɨ̀nè ndə̂m nə zhi tə fo ndò ə va kepî èghɛ zhize.

¹⁵ Ghɛ zɛ ə lâŋkè nə̀ pɨl nyi se pə̀yn ènyɔ̂ʼsè etɔŋ ə Fezhə̀zè sê ghɨghe. Pîza ə lâŋkè va, ə kəm alàŋzè ə va kepî.

¹⁶ Ə̀ nyi kûmə̀ nə ghɨə pomə̂ ndò se Zhə̀fè, ə ze tə nə̂ nə ghənə kyi fɨa vɛ è nyi mə è və tsɨnè. È və nə̀yn nyiəmə kə ze tyəyn nə ə̀ nyi ətəm ə vəynghe chûŋghè ə ghe nə̂yn nə È tsayn mɨsè shîŋə̀ zemɔ̀ʼ sê ghâŋ fə Aplàghâmfè nə È tə fo ndò fɨa kɛ ə è tè tsɨ̀ne sê ghənə. È tè paʼà fo ke tsɨ̂nèzè se ghɨ ghɛ ə ghe tè ndə̀mə lâŋkè, È tè fo kepî sê ghɨ ghəkɨ̂m ghɛ ə tè pomə Zhə̀fè kə Aplàghâm tè pomə. Aplàghâm nyi pɨ̀a sê ghâsènì əkɨ̂m.

¹⁷ Ə nyàʼ ə Ŋwàʼlè ə Fèzhə̀ nə Zhə̀fè tè pì sê Aplàghâm nə, “Mə nə̀yn nə o nyi pɨ̀a sê ndaʼà tekɨ̂m.” Nyiəmə Aplàghâm pɨ̀a ghâsènì ə Zhə̀fè əshi. Zhə̀ fɛ ə Aplàghâm pomə nyi Fezhə̀ fɛ ə Fe fo ndamze sê ghɨ ghɛ ə nyi mə ə kwu, ə̀ nyi Fəynfe ə Fe pîə ghɛze mə ze va, ze ə kyànə̀.

¹⁸ Aplàghâm ə tə pomə̂ Zhə̀fè ə ndə̀mə̀ ə̀təm ə və sê Fəynfe, pi kə ghɨ msɔ̀ŋghe tè fe ə ghənə endom, ghɛ zhîze tè va ə ze tè tyə̀ynə nə ghɛ ghɛ ə Zhə̀fè pì nə ghe tə kyanə̀ ndò tə kyanə̀. È və tə pomə nə, “Zhi tə nə̂ ə zhi ə nyi pɨ̀a sê ndaʼ tetsɨəte” kə Zhə̀fè tè tsàyn sê vəyn nə, “Ghâŋ fefe tə nə̂ ə fe ə tsɨə kə kə mlî”

¹⁹ Kə Zhə̀fè tè tsayn zɨnə sê Aplàghâm, è tè nyi mə è və zaʼâ pìŋsè ewə̀. È tè ke ndô nə wiyn ə vəyn fɨnə tɛ va, ke kepî nə zhwîə vəyn Sèla nyi akâyn. Pîza pomə ə vəynze ə tàʼa pa ndɨmə̂.

²⁰ È tè paʼà mɛnê nə Zhə̀fè nə̀ nə̂ èghɛ zɛ ə fe pî. È və pɨlə pomə ndûə kə Fèzhə̀ èshike, ə fo ètsîtè se Zhə̀fè eghɛ zɛ ə fe tè nyì se nə̀yn.

²¹ È tè nyîə fɛte ke ke nâʼà səmɔʼ nə ghɛ zɛ ə Zhə̀fè tsɨ̀nè, Fe nə̀ nə̂ zəynze.

²² Ə̀ za nyi eghɛ zɛ ə pomə ə Aplàghâmzè tè nəyn Zhə̀fè, Fe ə njìə vəyn kə wùə vɛ ə è nə̀ ghɛ ghɛ ə Fe kyiŋə.

²³ Ghɛ nə zɨ̂nə̀ ə nyâʼ ə ŋwàʼlè ə̀ Fèzhə̀ nə, “Zhə̀fè tè nji Vəyn kə wùə vɛ ə è nə̀ ghɛ ghe endom vɛ ə Fe kyiŋə” ghe va ke sê Aplàghâm.

²⁴ Ə tè nyâʼ kepî ə̀ghɛ nə ghɨnə mə sê ghâsènì. Zhə̀fè tə njiə kəpi ghâsènì ghɛ ə pomə nə ə nyi kepî kə ghɨ ə Vəynghe. Ə̀ zòmse Vəyn Pɛ̂pɛ ə ghâsènì Njisə̀s Klâys.

²⁵ Ə̀ nyi Njisə̀s ə Zhə̀fè tè fo nə È kwu kûmə̀ ə̀ghɛ ə piə ghasènìghe. Zhə̀fè tè zòmse vəyn kə ghâsènì kyi ndomve sə̂ nyi chichi ə Vəyn əshi.