Ŋwàʼlè ə̀ Pɔ̂l sê ghɨə Lûmghè 14 - Ŋwàʼlè ə̀ Fèzhə̀ Mkâyn Mə̂ Fèm

Kə wùə saʼ ànyìə vəyn

¹ Ghàyn fi ndzɨsê ə̀ghɨ ghɛ ə pomə ghənə̂zè pa pɔ. Kə ghàyn ə saʼnə̂ ə̀ghɛ ghâyn ghə̀ ghənə kûmə̀ ə̀ghɛ ghɛ ə ghənə kwaʼtə̀ nə ə kyi se nə̀yn, è kɨsè ghɛ ə ghənə kiva se nə̀yn.

² Pomə əghɨ̀ yîghe zâ ndò nə ghənə zhi nâʼàpi àkè, pîza ghɨ ghɛ ə pomə ghənə̂zè tɛ va, ghənə zhiə kə èmbàs.

³ Ghɨ ghɛ ə zhiə nâʼàpî ghè kiva se chìynə̀ ə ghɨ ghɛ ə pamə fɨa ə mɔ̀ʼɔve. Kə ghɨ ghɛ ə pamə fɨa vîve, saʼ ghɨ ghɛ ə ghe zhiə fɨave ekɨ̂m kûmə̀ nə ghənə əkɨ̂m nyi chichi ə Zhə̀fè ə shi.

⁴ Ò nyì nâʼà ndè sə̂ saʼa wùə èfɨ̀aʼa ə wùə ə ndò ə? Ə̀ kyi ke Pɛ̀ èfɨaʼ se pì nə ghɛ zɛ ə è nə̀yn pofə ndò, kɨ̀sə ze tsɔ̂fə̀ ndò. Pîza tyaʼa ə Pɛ̂pɛ ke nə̀ tsâmtə̀ wùə èfɨ̀aʼ nə è nəyn ghɛ echûŋzè.

⁵ Ghɨ mɔ̀ʼɔ kwaʼtə̀ nə tuʼ fîfe kɔʼnə̂ tsɛ ndò fə mɔ̀ʼɔfe, yîghe kwâʼtə̀ nə tuʼmè m̀kɨ̂m nyi ke èghɨ. Nâʼàpî èghɛ èkè zɛ ə wùə kwàʼtè, ə è və ke nə ze kwəyn sê vəyn.

⁶ Ghɨ ghɛ ə ghe fe nə tuʼfe nyìə kɔʼnə̂ tsɛ̂ fîfe nə̂ nyiəmə kè sê ngɨmnê ə Pɛ̂pɛze. Ghɨ ghɛ ə ghe zhiə nâʼàpî àkè, ghənə nə̂ kəpi zamə se ngɨmnə̂ Fèzhə̀ kûmə̀ nə ghənə fo àzɔ̀ŋnè se Zhə̀fè kûmə̀ èfɨazhiə ətəynve. Ghɨ ghɛ ghe zhiə kəpî va fɨa vîve, nə̂ zamə se ngɨmnə Pɛ̂pɛ, fo àzɔ̀ŋnè sê Zhə̀fè.

⁷ Wùə va ə ghâsènì əfètəyn ə è ndamə kə kûmə̀ ngɨŋə̂ vəyn, wùə vîvè e kwuə va sê ngɨŋə̂ vəyn.

⁸ Ə ghâsènì nyi etwɔ, ə nyi mə ghâsènì nyi etwɔ se nə̀yn eghɛ zɛ ə Pɛ̂pɛ kyiŋə nə ghâsènì nəyn. Mə ə ghâsènì kwu, ə nyi mə ə kwu se nə̀yn nə Pɛ̂pɛ ə saŋnə̂. Nyiəmə, kɨ̀sə ghâsènì nyi etwɔ, kɨ̀se ghâsènì nyi mə ə kwu, ghâsènì nyì ke ə Pɛ̂pɛ ə gho.

⁹ Ghɛ zɛ ə ze tè nəyn kə Klâys kwu, ə è zomə, ə è və nyi ètwɔ, nyi kə è və nyi Pɛ̂pɛ se ghɨ ghɛ ə nyi mə ə kwu è ghɛ ə ghe nyi etwɔ.

¹⁰ Ghàyn ghɛ ə ghàyn zhiə kə mbàszè, kûmə̀ ghè ə ghàyn tsɛsə̀ saʼze əghɨ mɔ̀ʼɔghe ə tuə? Ghàyn ghɛ ə ghàyn zhiə nâʼàpî ghè, kûmə̀ ghè ə ghàyn chìynə̀ ghɨə mɔ̀ʼɔghe ə? Nâʼà ghâsènì əkɨ̂m tə tyəmə̂ ə Zhə̀fè əshi, ə fe saʼ ghâsènì.

¹¹ Ə nyàʼ ə ŋwàʼlè ə Fèzhə̀ nə, “Zhə̀fè pi nə, kè kə m nyi Fezhə̀ fɛ ə m ndamə, pî ndè pə̀ tɨmə ə̀ ngwùʼ ə mì əshi, ə nâʼàpî ndè tsɛ̀ fɨaʼtèzè nə m nyi Fezhə̀.”

¹² E za tyə̀nə̀ nə nâʼàpî ndè ə ghâsènì əfètəyn tə taŋa njô ə̀ vəyn sê Zhə̀fè kûmə̀ èndamə vəynze.

Kə ò nəyn nə ànɛ̂ nəyn pi

¹³ Kə ghâsènì ə fɨnə saʼa ghɨə mɔ̀ʼɔghe. Ghàyn pɨl saynê se tə tàʼa nə̀yn eghɛ zhîze mə ze kaʼa ə ze nəyn ə wùə tɨm gholke ə è pfɨ ə pi.

¹⁴ Kə m nyi ghasè Pɛ̂pɛ Njisə̀s sə afɨa àmɔ̀ʼ, e nə̂ ndò nə mə ke nə fɨazhiə vîve va ə ve zo va ə Zhə̀fè əshi, pîza mə wùə pomə nə fɨazhiə vîve nyi ndô ə ve zo kwəynə va ə Zhə̀fè əshi, kə è zhi vəynve.

¹⁵ Ə ò nə̀yn nə ànyì vɛ vîvè ə kyi èfɨmsê kûmə̀ àfɨa kyîke kə ò zhiə, ə ze ə nyi nə ò kiva kɔ̂ŋzè sê ànɛ̂. Kə ò tə nəyn nə fɨazhiə vɛ ə ò zhiə pofse ndam ə wûəzè mə Klâys tè kwu kûmə̀ vəyn.

¹⁶ Kə o tə za nə tyaʼ kɛ ə ò kyi kə wùə vɛ ə pomə̂ ə vəynze tɛ, chiynte wùə kə è nəyn pi, kə ghɨə tə tàʼa pì əghɛ ə pighe ə ghò ətu.

¹⁷ Ə̀ vachi se zhi efɨazhiəve, kɨ̀sə se mɨ mlɨ̂ ə ze kyi m̀kɔʼnè elùʼ efɔ̀yn ə Fezhə̀vè. Ghɛ ghɛ ə ghe kyi m̀kɔʼnè nyì sə̂ nyi chichi ə Zhə̀fè əshi, sə kyi pɔ̂ynè, è saŋnê zɛ ə ze ndô pə̂ sê Zuʼse Ŋwaʼase.

¹⁸ Mə ə ghɨə fɨaʼà sê Klâys famə endom nə vɨ̂yn, ghənə nə̂ nə Zhə̀fè ə saŋnə̂, ghɨə mɔ̀ʼɔghe e pîə nə ghənə ə nə̀yn ghɛ echûŋzè.

¹⁹ E za nyi nə ghâsènì kyi sə̂ sô mndyàyn sə nə̂ ə̀ghɛ ghɛ ə ghe pə̂ èpɔ̂ynè, è ghɛ ghɛ ə ghe tsâmtə̀ ghâsènì nə ə fo ə̀təm sê ngɨŋ sə ghasènìse.

²⁰ Kə fɨazhiəve nəyn ə ghàyn pofse fɨ̂aʼ ə Fezhə̀zè. Fɨa e zhiəve kɨ̂m zo ndò ə Zhə̀fè əshi, pîza e tsɔ̂fə̀ va nə wùə zhi fɨa kɛ ə ke nə nə̂ nə wùə mɔʼɔ pfɨ əfètə̂ pi.

²¹ Ghɛ zɛ ə ze tsɔ̂fə̀ se nə̀yn nyì sê wùə se tàʼa kwɨlə nyàm, pî se mɨ mlɨ̂, pî se nə̀yn eghɛ zhîze mə ze kaʼa ə ze nəyn ə ànɛ̂ pfɨ ə pi.

²² Nâʼàpî èghɛ èkè zɛ ə ghàyn pomə kûmə̀ ə̀ghɛ nə ghɨ̂yn, ə̀ ke ke ghàyn, ghâynghə̀ Zhə̀fè. Saŋnêzè nyì sê ghɨ ghɛ ə ghe kwaʼtə̀ va nə ə nə̀yn pofsê shîŋə̀ kɛ ə ghənə nə̂yn ghɛ zɛ ə ke nə ze nyi achûŋ!

²³ Pîza, ghɨ ghɛ ə kyi mɛnêzè nə ə kiva se zhi ekyì efɨazhiə vîve, pɨlə zhiə vəynve, nyiəmə, Zhə̀fè nə̀ pîə nə ghənə ə nə̀yn pi kûmə̀ nə ghənə ə njì pomə̂ ə ghənə̂zè se nə̀yn eghɛ zɛ ə ze nyi səmɔʼ. Ə wùə nə̀yn ghɛze mə è mɛnə̂ ndò nə ze nyi achûŋ mə ze va achûŋ ə, ə ze ə nyi nə è və nə̀yn pi.