Ŋwàʼlè ə̀ Pɔ̂l sê ghɨə Lûmghè 13 - Ŋwàʼlè ə̀ Fèzhə̀ Mkâyn Mə̂ Fèm

Ghàyn e fo èkɔʼsê se tu endaʼve

¹ Nâʼà ghàyn ə̀kɨ̂m kyi sə̂ zɨə se tu endaʼve kûmə̀ nə tu endaʼ kyîke va mə ə̀ paʼà zàmaʼà Zhə̀fè. Tu endaʼve nyi mə ə̀ ndəm Fezhə̀ è ghənə ə fekyə̀.

² Nâʼàpî ndè vɛ ə è zɨə va se tu ə ghənə̂ ke ndaʼke, e za tyə̀nə̀ nə è kɔʼsə va pɨaʼtə̂ Fezhə̀zè.

³ Ghɨ ghɛ ə ghe nə̂ chùŋ kyi va sə fânə̀ etu endaʼve. Pîza ghɛ ə ghe nə̂ pi, ə̀ fànə̀ ghənə ètu endaʼve. Ə ò kɔ̀ŋə̀ va sə fânə̀ atu endaʼke, ò nə̂ ə̀ghɛ ə chûŋghè. Ə ò nə̀yn nyiəmə, ə è tsite ghô.

⁴ Kûmə̀ nə tu endaʼke nyi wùə è fɨaʼa se Zhə̀fè, nə̂ èfɨaʼ sə ghò ə chùŋ. Pîza mə ə ò nə̀yn pofse, ò kyi sə̂ fânə̀ vəyn, kûmə̀ nə tyaʼ kɛ ə è kyi se pɔynsê əghɨ vachi sə ndô. È nyi wùə èfɨaʼa Fezhə̀, pə̂ è pɔynsê ə Fezhə̀zè ə ghɨ ghɛ tu ə ghənə nə̂ pofsə.

⁵ Kûmə̀ zɨnə, ghàyn kyi sə̂ zɨə se tu endaʼve, ə̀ vachi ke kûmə̀ nə ghàyn fanə̀ epɔynsê, pîza ghàyn ke ke pî ndò nə, təm ghaynghe nyîə tsâ se ghàyn nə ə̀ nyi zamə kə ghàyn kyi se nə̀yn.

⁶ Ə̀ nyì kepî kûmə̀ èghɛ nə zɨnə mə ə ghàyn màʼà ŋwàʼlè, kûmə̀ nə tu endaʼve fɨaʼà sê Zhə̀fè, ezhoghɛ ə ghənə nə̂yn fɨ̂aʼzè endom vɛ ə ghənə fe kyi se nə̀yn.

⁷ Ghàyn ndaʼ se tu endaʼve fɨa kɛ ə ghàyn kyi se ndàʼ sê ghənə. Ghàyn maʼ ŋwàʼlè se ghɨ ghɛ ə ghe kyiŋə nə ghàyn maʼ ŋwàʼlè, ə̂ nyi ekɛ se ndàʼ kûmə̀ afɨa kə ghàyn kyi, ghàyn ə ndàʼà. Ghàyn e fo èkɔʼsê se ghɨ ghɛ ə nyi se fo èkɔʼsê se ghənə, è ngɨmnêzè sê ghɨ ghɛ ə nyi se ngɨmnə ghənə.

Ghàyn e kɔ̂ŋɔ̀ sengɨŋ saynse

⁸ Kə wùə vîvè tə kyî wùə è ndàŋkè. Ndàŋ kɛ ə ghàyn nâʼà ə ghàyn ə fètəyn kyi sə kyi nyi nə, ghàyn e kɔ̂ŋə̀ sèngɨŋ saynse, kûmə̀ nə nâʼàpî ndè vɛ ə è kɔ̀ŋə̀ ghɨ mɔ̀ʼɔghe, ze tyə̂ nə è və ndə̀m lwɔ̂ŋvè ekɨ̂m.

⁹ Lwɔ̂ŋ vɨnə nə, “Kə ò tə nyîŋə̀ è zhwîə wùə kɨ̀sə ndom ə̀ wùə, kə ò tə zhwi wùə, kə ò tə chɔŋ, kə tə fɨ èshiə əghɨ ghe efɨa.” Lwɔ̂ŋ nə vɨ̂yn è və mɔ̀ʼɔve ekɨ̂m tsɨ̀yntə̀ sə nyi àlâŋ àmɔ̀ʼ. Lâŋ nə kɛ mə nyi nə, “Kɔ̀ŋ ànɛ̂ kè eghɨ kə ò kɔ̂ŋɔ̀ ngɨŋ zɛ̂zè.”

¹⁰ Ə wùə kɔ̀ŋə̀ ànyì ə̀ vəyn, ə è tə tàʼa nə̂ pofsê se vəyn. E za nyi nə se kɔ̂ŋ nyì se ndə̀m alâŋ àkɨ̂m.

¹¹ Ghàyn kyi se nə̂ zɨnə mə kûmə̀ nə shîŋə̀kè ə kwəyn kə ghàyn zəmə. Shîŋə̀ kə kwəyn kə ghàyn ə nyi epɨaʼtêzè, kûmə̀ nə sɔza ə ghasènìze ə paʼsê zôyn, tsɛ̂ kə ze tè nyì sə shi kə ghâsènì tè pomə.

¹² Tuʼve se nyi ke se zo, pɨəynke se panə mɨ̂sə̀ pə̂ ndò. Ə ghâsènì zàmaʼà ə̀ghɛ pi ghɛ ə ghâsènì tè nə̂, ə maʼ fɨa eghɔ̀ŋ vɛ ə nô ətəyn əfètə̂ epayn.

¹³ Ghàyn e kyi tsɨnè èchùŋ kə ghɨ ghɛ ə ghe nyi epayn. Kə ghàyn ə nduə ə telùʼ te zhisə̂ nə ewìyn tɛ ə ghɨghe mɨə lɨ̀m fumə, m̀ ko ghənə, kə ghàyn ə chûmtə zəynghe è ndômnèghè. Kə ghàyn ə nə ghɛ ə nyələghe, kə ghàyn ə zɔ, kə ghàyn ə kyi àghə̀ʼ.

¹⁴ Pîza ghàyn e pɨl kyi ètsɨsə̂ ə Pɛ̂pɛ Njisə̀s Klâyszè. Kə ghàyn ndəm tuke əghɛ ghɛ ə njà ewìyn kyiŋə, kə ghàyn tə nəyn kə wiyn vɛ ə ve chiyntə ghàyn nə ghàyn nəyn pi kyiŋə.