Ŋwàʼlè ə̀ Pɔ̂l sê ghɨə Lûmghè 12 - Ŋwàʼlè ə̀ Fèzhə̀ Mkâyn Mə̂ Fèm

Endam zɛ ə ghɨ Klâysghè kyi sə̂ ndamə

¹ Nyiəmə ə ghɔnyì ghɨmə, m chyatə̂ ghàyn, kûmə̀ èkosê esəyn ə Fezhə̀ eghaʼâzè sê ghâsènì, ghàyn fo ngɨŋ saynse kə efo zɛ ə ze kyi ndamze sê Zhə̀fè. Ə fo nə zɨnə mə ə nyi è ŋwaʼze kə fɨ̂aʼ zaynze ə nyi chichi ə və shi. Ə̀ zɨnə nyi engɨmnê ə səmɔʼ zɛ ə ghàyn kyi sə̂ ngɨmnə̂.

² Kə ghàyn nə ndamə kə njà saynse wìynse kyiŋə, pîza ghàyn pɨl za ə Zhə̀fè fo kwàʼtè efe sê ghàyn, kə ghàyn ə kyi tsɨnè èfe. Zɨnə nə̀ nə̂ ə ghàyn ə ke, nə̂ ə̀ghɛ ghɛ ə Zhə̀fè kyiŋə. Ghàyn nyìə ke chùŋ, ke ə̀ghɛ ghɛ ə ghe nə̂ nə Zhə̀fè ə saŋnə̂, ke ghɛ ə ghe nyi chichi.

³ Kûmə̀ àfùʼ ə Fezhə̀ kɛ ə è fo sê mi, m pîə se ghàyn əkɨ̂m nə kə ghàyn nə nji sèngɨŋ saynse ekwùtwəyn endom vɛ ə ghàyn kwàʼtə̀ ətəyn, ghàyn e pɨlə njîə sèngɨŋ saynse ə chi ə ghàyn ekwâʼtè. Nâʼàpî ndè kyi se fe ngɨŋə̂ vəyn əfètə̂ èpomə eghɨ kûmə̀ èfo zɛ ə Zhə̀fè nyi mə fə fo sê vəyn.

⁴ Wiyn ə wûəvè nyi emɔ̀ʼ kyi èpɨ̂as ve tsɨ̂ə kə nyi, nâʼàpî àpâs àkè e kyi ke èfɨaʼ ə vəynze.

⁵ Kèpî èghɨ famə endom, pî kə ghâsènì tsɨ̀ə, ghâsènì nyi wiynve mɔ̀ʼ ghasènìəghə̀ Klâys, wùə vîvè e va sə və ngɨŋ.

⁶ Zhə̀fè ə njì fùʼ ə vəynke se fo ə fô ə̀ nâʼà pîndè, nâʼàpî zɨ̀yn e nyi ke sənɨŋ. Ə Zhə̀fè nyi mə fə fo wùə è fo nə è və wâmnə̀ ə̀ghɛ ə Zhə̀fè ezə, è ve wâmnə̀ kə əghɛ ətəynghe kə pomə̂ zɛ ə è kyi tyə̂nə̀.

⁷ Ə fo ə̀ Fezhə̀ se wùə nyi nə è fɨ̂aʼ, è və fɨaʼà. Wùə vɛ ə fo ə̀ Fèzhə̀ se vəyn nyi nə è və zaʼlə̂, è ve zaʼlə̂ ə̀ghɨ.

⁸ Wùə vɛ ə fo ə̀ Fèzhə̀ se vəyn nyi nə è və fo ə̀təm sê ghɨghe, e ve nə̂ kə zamə. Nâʼàpî ndè vɛ ə fo ə̀ Fèzhə̀ se vəyn nyi nə fɨake ə ndô ə və gho ndûə sê ghɨ mɔ̀ʼɔghe, è ve fo è təm ə vəynghe əkɨ̂m. Wùə vɛ ə fo ə̀ Fèzhə̀ se vəyn nyi nə è və nyi àtu se ghɨghe, è ve nyi àtu se ghɨə təynghe achûŋ. Wùə vɛ ə fo ə̀ Fezhə̀ se vəyn nyi sə̂ kyi èkosê esəyn sê ghɨghe, ə è və nə̂ zamə è saŋnêzè.

⁹ Ə nâʼàpî ndè ə kɔŋə̀ ə̀ghɨ è təm ə vəynghe əkɨ̂m. Ə nâʼàpî ndè ə pânə̀ pi è təm ə vəynghe əkɨ̂m. Ə nâʼàpî ndè ə fɛtê tyəm sə̂ nə̂ kə èghɛ zɛ ə̀ nyì ze chûŋzè.

¹⁰ Ə nâʼàpî ndè ə kɔ̂ŋə̀ ànyì ə̀ vəyn è təm ə vəynghe əkɨ̂m. Ə nâʼàpî ndè ə fo èkɔʼsê se ànyì tsɨ̂ə tsɛ̂ kə è fo sê ngɨŋə̂ vəyn.

¹¹ Kə wùə vîvè ə zɔlə. Nâʼàpî ndè e fɨaʼà ètyaʼa sê Pɛ̂pɛ è təm ə vəynghe əkɨ̂m.

¹² Nâʼàpî ndè e saŋnə̂ kûmə̀ ə̀ghɛ ghɛ ə è ndə̀m təmə se tə̂ kyî, kolə ə̀təm ə və ətetsòs, kolə ə̀təm əfètə̂ ètsə̀m shîŋə̀ tekɨ̂m.

¹³ Nâʼàpî ndè e chyâtə̀ èfɨa vəynve, fo ə̀ghɨ pomə ghɛ ə ghe kiva. Nâʼàpî ndè e fiə ə̀ghɨ motə pə ə və ndɛ.

¹⁴ Ghàyn e tsə̂mə̀ nə Zhə̀fè pɔse ghɨ ghɛ ə ghe tsə̀fsə̀ ghàyn, tsə̂mə̀ nə è pɔse, ə̀ vachi nə è liŋ.

¹⁵ Ghàyn e saŋnə̂ ghâyn ghə ghɨ ghɛ ə ghe saŋnə, chîə èkwu ghâyn ghə̀ ghɛ ə ghe chîə kwuze.

¹⁶ Ghàyn e nə̂ ə̀ghɛ sə eghɛ èmɔ̀ʼ. Kə ghàyn nə ghaŋsə wiyn, pîza ghàyn e fɨaʼà tsɔ̂fsə̀ ghâyn ghə̀ ghɨ ghɛ ə kɔʼɔ kwəynə va kə ghàyn. Kə ghàyn nə ndəmə nə ghàyn nyîə ke tsɛ̂sè.

¹⁷ Ə wùə nə̀yn pi sê ghò, kə ò nəyn pə̂ynsè pi sê vəyn. Pîza ghàyn kyi sə kwaʼtə̀ sə nə̂ chùŋ ə ghɨghe əshi ə̀kɨ̂m.

¹⁸ Ghàyn mɔmse nâʼà è tyaʼa sə̂ ndamə èpɔynè ghayn ghɨ ghəkɨ̂m.

¹⁹ Ə wùə nə̀yn pi sê ghàyn, kə ghàyn pəynse zə̂ynzè è pi ə soyn sɨmse. Pîza ghàyn pɨl za nə Zhə̀fè pɔynse vəyn. M pîə zɨnə mə kûmə̀ nə ə nyi mə ə nyàʼ ə ŋwàʼlè ə Fèzhə̀ nə, Zhə̀fè pi nə, “Ə̀ nyì ke mi Pɛ̂pɛ ə m tə pə̀ynsə̀ nâʼàpî èkyì ə pi èkè zɛ ə wùə nə̀. Ə̀ nyi mi Pɛ̂pɛ ə m wâmnə̀”

²⁰ Ə nyàʼ ə ŋwàʼlè ə̀ Fèzhə̀ nə, “Ə chɨ̀ŋ zafə pàyn zɛ̂zè, o fo àfɨa, ə è zhi, pfɨ̀ŋ m̀mò e zafə vəyn, o fo àfɨa, ə è mɨ. Ə ò nə̀ nyiə mə, ə nyi mə ò ə ghomsê ghənə, ghənə e kyiŋə tèndom se kwiynê.”

²¹ Kə ghàyn zâ nə pi tɛ tsɛ ghàyn. Pîza ə chùŋ zâynzè pɨl tɛ tsɛ pi.