Ŋwàʼlè ə̀ Pɔ̂l sê ghɨə Lûmghè 10 - Ŋwàʼlè ə̀ Fèzhə̀ Mkâyn Mə̂ Fèm

¹ Ghɔnyì ghɨmə, m kɔ̂ŋə̀ nâʼà è təm ghɨmghe əkɨ̂m, fɨnə tsə̂mə̀ nə nâʼà ə̀ghɨ ə Isìlâyghè əkɨ̂m ə nyi mə ə sɔ̀ fɨ.

² M kaʼa m tsayn nə ghənə nyîə kɔ̂ŋə̀ se fɨ̂aʼ se Zhə̀fè è təm ə ghənə̂ghè əkɨ̂m, pîza tɔʼ keva kə ghənə kyi se fɨ̂aʼ se Vəyn.

³ Ghənə ke va ndom vɛ ə Zhə̀fè njìə ghɨ sə ghɨə chichiə ətəyn. Ghənə pɨlə kyiŋə èndom sə nyi chichi ə Zhə̀fè əshi. Nyiəmə, ghənə njîə va ngɨŋ sə ghənə̂sè əchi se chùmtè endom vɛ ə Zhə̀fè nyi mə Fe ə fɛtê kə ghɨghe ə nyi chichi ətəyn ə Fəynfe əshi.

⁴ Klâys ə nə̀yn fɨ̂aʼ zɛ ə lâŋkè tè kyi se nə̀yn, nyiəmə, nâʼàpî ndè vɛ ə è pomə sê Vəyn nyi chichi ə Zhə̀fè əshi.

Sɔzaze nyi sê tâŋ tekɨ̂m

⁵ Mosîs ə tə nyàʼ kûmə̀ èndom vɛ ə wùə kyi sə̂ nyi chichi ətəyn kə è chùmtə̀ lâŋkè. È tè pi nə, “Nâʼàpî ndè vɛ ə è nə̀ ghɛghe əkɨ̂m ghɛ ə lâŋkè pìə tə kyîə èndam zɛ ə ze tə mîə va.”

⁶ Pîza, ghɛ zɛ ə ŋwàʼlè ə̀ Fèzhə̀ pì nə wùə kyi sə̂ nyi wùə ə̀ chichi ətəyn ə Zhə̀fè əshi tɔynə̂ epomə̂ nyi nə, “Ò kiva se pfɨfə ə ghò əfètə̂ təm nə, ə̀ tə kɔʼɔ ndè ekwùtwəyn.” (E za tyə̀nə̀ nə, se njìə Klâys ekwùtwəyn se tsosə pə̀ Vəyn ə chi.)

⁷ Pi se pfɨf nə, “Ə̀ nə̀ tso ndûə ndè apùʼ kɛ ə ke lɔŋə ndûə kə ndô ə?” (E za tyə̀nə̀ nə, se njìə ə Klâys apùʼ kɛ ə ke lɔŋə ndûə kə ndô se zòmsè ə vəyn.)

⁸ Ghɛ zɛ ə ŋwàʼlè ə Fèzhə̀ pìə nyi nə, “Ghɛ ə Fezhə̀zè nyì paʼse ke nyîə sê ghò. Nduə kə èshike sə̂ ndâʼà zəynze, e kayne nyi ndò ə ghò əfètə̂ təm.” Tom nə zɛmə nyi tom zɛ ə ghàs ndàʼà nə ghàyn kyi sə̂ kyî èpomə̂.

⁹ Ə ò pì ècho zɛze nə, “Njisə̀s nyi Pɛ̂pɛ” ə pomə nə Zhə̀fè ə tə zòmsè vəyn ekwu, ə ò tə sɔ fɨ.

¹⁰ Ə̀ nyi epomə̂ ə ghasènìze ə ze nə̂ nə ghâsènì ə nyi chichi ə Zhə̀fè əshi. Ə̀ nyi eghɛ zɛ ə ghâsènì pìə ə ghâsènì echo è pomə̂zè, ə ze nə̂ nə ghâsènì sɔ fɨ.

¹¹ Ŋwàʼlè ə̀ Fèzhə̀ pi nə, “Nâʼàpî ndè vɛ ə è pomə sê vəyn tə kwɨlə̂ va è gho ə zomghe.”

¹² Pî nə zɨnə̀ nyì sê nâʼàpî ndè kûmə̀ nə sə nɨŋ va sê ghɨ ghɛ ə̀ nyì ghə Njûsghè, è ghɛ ə̀ vachi ghə Njûsghè. Zhə̀fè nyi Pɛ̂pɛ kè sê ghɨ ghəkɨ̂m, pɔsə̂ nâʼàpî ndè achûŋ vɛ ə è tɔŋə ndû sê Vəyn.

¹³ Ŋwàʼlè ə̀ Fèzhə̀ pìə nə, “Nâʼàpî ndè vɛ ə è tɔŋte zɨə Pɛ̂pɛze nə è fi za zhi, tə kyîə ndò sɔzaze.”

¹⁴ Pîza ghənə kaʼa tɔŋə zayn vəyn nə è fi za ghənə mə ghənə paʼà pomə̂ se vəyn ə? Ghənə kaʼa pomə zayn ezhoghɛ ghənə nyi ndɔ̀ʼɔ zɨ tomə? Ghənə kaʼa zɨ zayn tom ə̀təyn ezhoghɛ wùə va se ndàʼà zə̂ynzè se ghənə?

¹⁵ Wùə kàʼa è ndaʼa zayn tom nə zɨ̂yn sê ghɨ ndɔ̀ʼɔ ə tom və ə? Ə nyi mə ə nyàʼ ə ŋwàʼlè ə̀ Fèzhə̀ nə, “Ə wùə pə̀ è tom èchùŋ, è pə̀ è saŋnêzè.”

¹⁶ Pîza, ə̀ vachi əghɨ Isìlâyghè əkɨ̂m ə tè pomə tom èchùŋ ə̀təyn. Fɨ̀aʼtè Èsayà è ngɨŋə̂ vəyn nyi mə è və tə wàmnè kûmə̀ èghɛ nə zɨ̂yn nə, “Pɛ̂pɛ ə̀ zɨ nde tom zâszè ə pomə̂ ə?”

¹⁷ E za tyə̀nə̀ nə, pomə̂zè pə̀ ashìŋə̀ kɛ ə wùə zɨ tom ə̀ Fèzhə̀, mə ghɨghe kyi se ndàʼà tom èchùŋ ə̀ Klâys kə ghɨ pomə sê vəyn.

¹⁸ Pîza pfɨf zɨmze nyi nə, ze nyi ndô səmɔʼ nə ghənə tè pâʼà zɨ tomə̀ təyn ə? Ghənə tə fɛtê zɨ zə̂ynzè àchûŋ. Ə nyàʼ ə ŋwàʼlè ə̀ Fèzhə̀ nə, “Ə tə zɨ kyə̀ ghɨ̀ nə ghɛ ə ghe tè ndàʼa tom èchùŋ pôlə̀ tə mbi tekɨ̂m. Wâmnè ə ghənə̂zè ə tə ndù fɨ pôlə̀ tə mbi tekɨ̂m.”

¹⁹ M fɨnə pfɨfə kəpî nə, ghɨə Isìlâyghè tè pâʼà zɨ kê ghɛ zɛ ə tè ndàʼà mə? Mosîs nâʼà è ngɨŋ ə vəyn tè nyi wùə ə̀shi se pì nə Zhə̀fè pi nə, “M tə pɔsə̂ ə̀ghɨ ghɛ ə ghe kiva ndaʼ ə ghənə̂ zə ngɨŋze, kə ghàyn ə ghə̂ʼə̀ ghənə. M tə pɔsə̂ èngo kə ze nəyn ə ghàyn ə nyɔʼsə̀ ètɔŋ.”

²⁰ Fɨ̀aʼtè Ìsayà ə tə pomə kepî wàmnə̀ kə Zhə̀fè tè pi. È tè pì ə fètə̂ ghɨ̀ nə, “Ghɨ ghɛ ə tè kyiŋə̀ va mi, ə fe mi. Mə tyə̀yn ngɨŋ zɨm sê ghɨ, mə paʼà tyəmə̂ pfɨfə mi.”

²¹ Pîza Èsayà tè wàmne kûmə̀ ə̀ghɨ ə Isìlâyghè nə Zhə̀fè pi nə, “Mə nɛ̀sè gho ghɨmə sə fetuʼ fe fɨ̂flèfè ə tɔŋɔ ə̀ghɨ nə ghe pəyn, ghənə tə se zɨə mi. Ghənə ə tɛ ètuke ə kɛsə̂ ə mì epàm.”