Njût 1 - Ŋwàʼlè ə̀ Fèzhə̀ Mkâyn Mə̂ Fèm

¹ Ə̀ nyâʼà mi Njût ŋwàʼlè zɨ̀yn sê ghàyn. M nyi ànyìə Njə̂m, nyi wùə èfɨ̀aʼa ə̀ Njisə̀s Klâys. M nyâʼà zɨ̂ynzè sê ghàyn əkɨ̂m ghɛ ə Zhə̀ fɛ ə fe nyi Pɨ̀a nyi mə fe ə tɔŋə̂. Fe nyîə kɔ̂ŋə̀ ghàyn ə ndə̀mə̀ ghàyn nə Njisə̀s Klâys ə tɔ̂ʼnə̀ è ghàyn.

² M tsə̀mə̀ nə Zhə̀fè ndu ke èshike se fo ghàyn èkosê esəynze, è pɔ̂ynè, è kɔ̂ŋzè setsɨ̀ setsɨ̀.

Fɨ̀as kûmə̀ sètyə̀ynsè sə akaŋse

³ Soyn sɨmse kɔ̀ŋsè, M tè nyîə mɔ̂msə̀ nâʼà ètyaʼke se nyàʼ sê ghàyn ghɛ kûmə̀ èsɔzà zɛ ə ghâsènì tsɨ̂ynte kyi, pîza zôyn mə fe nə m kyi se nyàʼ kûmə̀ èghɛ ə ndôzè mə ze nyi se chyatê ə ghàyn nə ghàyn no se ndə̀m ekyî epomə̂ zɛ ə Zhə̀fè nyi mə fe ə fo sê ghɨ ə vəynghe kè eshîŋə̀.

⁴ Kûmə̀ nə ghɨ yîghe mə ghe ke va Zhə̀fè ə nyaʼtê nji ə ghâsènì ə fètəyn, ə̀ nyi ə̀ghɨ mə ghə fəʼtê tomə̀ àfùʼ ə Fezhə̀kè pîə nə fùʼ ətəynke nyîə pomə̂ nə ghɨghe ə ndamə tèndam tenyələte, Ŋwàʼlè ə̀ Fèzhə̀ se nyi mə è zə tə wàmnè nâʼà sə mɨ kûmə̀ ə̀ kyì ə ghɨ nə ghɨ̂nə̀ ə tsà nə Zhə̀fè tə saʼa pofsə̂ ghənə kûmə̀ nə ghənə ə tə pɛ̀ apɨəyn emɔ̀ʼ vɛ ə ghâsènì kyi ə̀ nyi Pɛ̂pɛ Njisə̀s Klâys.

⁵ Pî kə ghàyn kàyne ke ə̀ghɛ nə ghɨnə mə, m kyiŋə se fɨnə Pɨ̀əytè ə ghàyn nə Pɛ̂pɛ ə shɨŋ ə̀ mɔ̀ʼɔ zhîzè ə tè fɨse ghɨə Isìlây ghè ə ngəʼ endaʼ ə Enjìpzè, pîza epàm ətəyn ə pofsə̂ ə̀ghɨ ə Isìlây ghɛ ə ghe tè tàʼa pomə̂ se vəyn.

⁶ Ghàyn kwaʼte tsì sɛ ə se tè tàʼa faŋ elùʼ efɨaʼa vɛ ə Zhə̀fè tè fo nə ghənə ə nə̂, ghənə ə tə pɨl zàmaʼà luʼ vɛ ə̀ tè nyì və ghənə̂vè. Ə nyi mə ə kol ghənə è chaʼ sɛ ə tə zhə̂nə̀ va ə ndə̀mə̀ ghənə ndɛ̂chaʼ àlɨm kə ghənə ə lɨmtə̂ fètuʼ fe ghaʼâ fə saʼ fɛ ə Zhə̀fè tə saʼa pɔynsə ghənə ətəyn.

⁷ Ghàyn fɨyn kwâʼtè kèpi Sondòm è Ngòmolà è tɔ̂ŋ sə mɔ̀ʼɔse sɛ ə se tè nyì paʼsê pəyn se ghənə, kə ghənə tè nə̂ kəpî ə̀ghɛ ə nyələghe, nyɨ̂ŋə̀ è ghɨghe endom vîve mə ə ke va vəynve. Wus vɛ ə ve ndɨmə tsɛ̂ va ə tə pofsê tɔ̂ŋ se ghaʼâ nə sɨ̂yn se tyə̂m kə fɨ̀as sê ghɨghe əkɨ̂m.

⁸ Kèpi èghɨ famə endom, ghɨ nə ghɨ̂ynə tè nə pi sê wiyn ə ghənə̂vè, tə àtyaʼ ə Pɛ̂pɛke ə ghənə ə tu, sôylə̀ sètsì sɛ ə se nyi ekwùtwəyn pîə nə ghənə ə fe laynəlaynte, te tsâ nə ghənə ə nə̂ ə̀ghɛ nə ghɨ̂yn.

⁹ Pi Maykèl kə è tè nyi atu ə sètsìkè tè pâʼà mɔ̀msè se pì è tyaʼ ə vəyn kə ngɨŋke sê ndə̂plè nə è zə nə̀yn pi kə yî zə̂yn tè kyi saʼne kûmə̀ èpfɨyn ə Mosîsè. È tè pɨl pi kə sê zə̂yn nə, “Pɛ̂ Zhə̀fè nə̂ zɔ̂ sê ghò.”

¹⁰ Pîza ghɨ ghɨynə sòylə̀ naʼapi èghɛ èkè zɛ ə ə ghənə zɨə ke va. Ghənə nə̂ nâʼàpî èghɛ èkè zɛ ə wiyn ə ghənə̂vè kyiŋə kə se nyam sə mbvɨynse, ə̀ nyi ə̀ghɛ nə ghɨnə mə ə ghe pə̂ è pofsêzè sê ghənə.

¹¹ Ngəʼ e ghaʼa nyi ə ghənə tu! Ghənə ə chùmtè ndom vɛ ə Kên tè nji kə è tè zhwi ànyìə vəyn. Kè kûmə̀ èkɔ̂ŋ ekɛze, ghənə ə fo ngɨŋ sə ghənə̂sè se tsas sɛ ə Palàm tè nəyn. Ghənə ə tə se pomə̂ sê Zhə̀fè, ə pofsə̂ sèngɨŋ sə ghənə̂sè kèpî kə Kolà tè tə ə pofsə̂ ngɨŋə̂ vəyn.

¹² Ezhoghɛ ə ghàyn tsɨsə se zhi efɨazhiəve kə əghɨ epoməghe, ghɨ nə ghɨyn e nyi ke kə eliŋ ə ghàyn əfètəyn ə pɔŋ pəyn tsɨsə sè zhiə, ghomə va. Pîza ghənə nyi kə sengyəyn sɛ ə se kyi va ghomə̂zè, mə ghənə tɔ̂ʼnə̀ kə sê ngɨŋ sə ghənə̂sè. Ghənə nyi kə sembàʼ ə fofke pɨaʼà, pîza pə̂ va è ghol zhîze. Ghənə nyi kə mkaʼ mɛ m̀ mu tsɛ̂ va twɔmve, pi ashìŋə̀ etwɔmke, nyi kə mkaʼ mɛ ə nyi mə ə chɔʼ paʼsə̂ kə è ghaŋte ətəyn, m̀ me nyi mə m̀ mə kwu.

¹³ Ghənə nyi kə awàwà epaməke, ghɛ ghənə̂ ghe ghoməghe e chwîtə̀ kə apfɨpfɨ. Ghənə nyi kə mlî mɛ ə m̀ tsɨ̀nə̀ ghanə ka kə ndô, mə Zhə̀fè ə ndə̀m luʼve sê mêmè, ə̀ nyi eluʼ fɨ̂mə̀ tsɛ̂ tèluʼ tekɨ̂m.

¹⁴ Enɔ̀k vɛ ə è tè nyi feghâŋ fèsɛ̀mbɛ ə Andàm epàm, ə tə tsàyn kûmə̀ èghɛ zɛ ə ze tə kyânə̀ kûmə̀ ghənə nə, “Ghàyn zɨte! Pɛ̂pɛ tə pə̂ è tsì sə vəyn se Ŋwaʼase kamse se tsɨ̂ə kə nyî,

¹⁵ se saʼ əghɨ ə̀kɨ̂m, è se pì nə ghənə əkɨ̂m ə pfɨ̀ saʼ kûmə̀ ə̀ghɛ ə pighe əkɨ̂m ghɛ ə ghənə nyi mə ə nə̀yn, è wâmnè tepi tekɨ̂m tɛ ə ghɨ epi ghɛ ə ghe ke va Zhə̀fè tè wàmne kûmə̀ Fèzhə̀.”

¹⁶ Ghɨ ghɨnə zàŋsə̀ shwinə̂ wamnə̀ kə ndò, kɔŋə̀ sə ghâmə̀ ə̀ghɨ mɔ̀ʼɔghe, ghənə chûmtə̀ ə̀ghɛ ghɛ ə təm ə ghənə̂ghè kyiŋə nə ghənə ə nə̂, ghaŋsə̂ èwiyn kûmə̀ sèngɨŋ sə ghənə̂sè, wamnə̀ èwâmnè efɔməze sê ghɨghe se kyî afɨa kɛ ə ghənə kyiŋə.

Kə ghɨ epoməghe kyi sə̂ ndamə

¹⁷ Pîza, ghàyn kwaʼte ə soyn sɨmse ghɛ zɛ əghɨtom ə Pɛ̂pɛ ə ghâsènì Njisə̀s Klâys tè tsàyn sê ghàyn sə mɨ.

¹⁸ Ghənə tè pì sê ghàyn nə, “Mtuʼ me kwùŋsə̂m, ghɨghe tə pə̂ ə nyi chaʼa ghàyn, əghɨ mə ə chûmtə̀ ə̀ghɛ əpi ghɛ ə təm ə ghənə̂ghè kyiŋə.”

¹⁹ Ə̀ ghɨnə nyi əghɨ ghɛ ə nə̂ nə chyâsè zə nyi, mə ghɛ zɛ ə ze chisə ghənə nyi nâʼàpî èghɛ èkè ə təm ə ghənə̂ghè pì nə ghənə nəyn kûmə̀ nə ghənə kyi va Zuʼsə Fezhə̀sè.

²⁰ Pîza, se ghàyn ə soyn sɨmse chûŋsè, ghàyn e tsâmtə̀ sèngɨŋ saynse sə̂ ndəmə̂ ə ghàyn ekyî epomə̂ zɛ ə ze lote nyi èŋwaʼze. Ə tyaʼ ə Sezuʼ se Ŋwaʼase ə tsâmtə̀ ghàyn sə̂ tsə̂mə̀.

²¹ Ghàyn ndu ke èshike sə̂ ndamə èndam zaynze endom vɛ ə ghɨ ghɛ ə kɔ̂ŋə̀ Zhə̀fè kyi sə̂ ndamə kə ghàyn lɨmtə nə Pɛ̂pɛ ə̀ ghâsènì Njisə̀s Klâys pəyn tyəyn ekosê esəyn sê ghâsènì tɔynə̂ endam zɛ ə è tə fo sê ghâsènì mə ze tə mìə va.

²² Ghàyn tyəyn səyn ekoze se ghɨ ghɛ ə ghənə ke va nə ə kaʼa pomə mə tàʼa pomə̂.

²³ Ghàyn shiyn fɨsê ə̀ghɨ ə mɔ̀ʼɔghe ewùs ə ghàyn sɔse ghənə, sê ghɨə mɔ̀ʼɔghe, ghàyn tyəyn kose esəynze mə ghàyn nə̀ zɨnə mə è tɔ̂ʼnèzè kə piə ghɛ ə ghənə̂ ghe pighe nyi mə ghe ə nyùʼ ndzɨsə ghənə̂sè.

Etsə̂m e tsitəze

²⁴ Sê Vəyn vɛ ə è kàʼa è ndəm ghàyn nə kə ghàyn pfɨ, è kɨsè se pə̀yn ghàyn è saŋnê eghaʼâzè mə ghàyn kyi va ləʼke ə və shi, ə̀ nyi eluʼ epomsəve.

²⁵ Ə pomsêzè ekɨ̂m ə nyi sê vəyn vɛ ə̀ nyì ke vəyn Zhə̀fè, ə vəyn vɛ ə è nyi sɔ̀zà ə̀ ghâsènì tɔynə̂ ə Njisə̀s Klâys Pɛ̂pɛ ə̀ ghâsènì. Zhə̀fè tè kyi epomsê, è ghaʼze, è tyaʼke. È tè saʼa è tyaʼ eghaʼâkè tsɔ̀fə kə ə se pomə mbi, è pa nyi ke zamə, nyi se faŋ sə̂ nyi ke zamə nâʼà kə ghè tə ghayn. Ə ze ə nyi ke zamə.