Njə̂m 4 - Ŋwàʼlè ə̀ Fèzhə̀ Mkâyn Mə̂ Fèm

Ghàyn fo ngɨŋ saynse sê Zhə̀fè

¹ Ə̀ pə̀ ghè ènôzè è saʼnêzè ə ghàyn əfètəyn ə? Ə̀ nyi əghɛ ə pi ghɛ ə ghàyn kyiŋə ə ghàyn ətəm ə ghe nə̂ nə ghàyn ə nô sèngɨŋ saynse.

² Ghàyn kyiŋə èfɨa kyîə va, ghàyn səmtə̂ èfɨa kyîə va, pɨaʼtə̂ se zhwi, ghàyn kyi aghə̀ʼ kûmə̀ èfɨa vɛ ə ghɨə kyi mə ghàyn vayn kyî, zamə ghàyn e zɔ̂, nô se fi sê ghənə. Pîza ghàyn kyi va fɨa kɛ ə ghàyn kyiŋə kûmə̀ nə ghàyn paʼà pfɨf kəynke sê Zhə̀fè.

³ Pî ezhoghɛ ə ghàyn pfɨf, Zhə̀fè fo va kûmə̀ nə ghàyn pfɨfə va è kwâʼtè echuŋzè. Ghàyn pfɨfə kə nə ə fo ghàyn ə nə̂ ə̀ghɛ ghɛ ə wiyn vaynve kɔ̂ŋə̀ è fɨa nə vɨ̂yn.

⁴ Ghàyn ghɨ ghɨ̀nə̀ ə nyi mə ə zà Zhə̀fè nyi! Ghàyn ke va nə ə ghàyn nyi sesoyn sê mbi, ə ghàyn ə nyi sèpàyn se Zhə̀fè ə? m pîə kwəynsə̂ nə ə ghàyn kyiŋə sə̂ nyi èsoynve sê mbi, ə ghàyn nəyn ngɨŋ saynse sə̂ nyi sèpàyn se Zhə̀fè.

⁵ Ghàyn kwàʼtə̀ nə ŋwàʼlè ə Fèzhə̀ wamə ndò kə è pìə nə, “Zhə̀fè nyiə səmtə̂ nâʼà sə ŋaŋ nə zuʼ sɛ ə fe nyi mə fe ə ndə̀m ə ghâsènì ə fètəyn tsamte ghâsènì sə̂ kɔ̂ŋə̀ vəyn.”

⁶ Pîza fùʼ kɛ ə Zhə̀fè fo nyîə tɛ tsɛ̂ kè kə nyâʼ ə Ŋwàʼlè ə̀ Fèzhə̀ nə, “Zhə̀fè nyiə njîə tsosə̂ ə̀ghɨ ghɛ ə ghe ghaŋsə wiynve, pîza fo àfùʼ ə vəynke sê ghɨ ghɛ ə ghe njîə tsosə pə̂ ngɨŋsə ghənə̂sè əchi.”

⁷ Ghàyn e nə̂ ə̀ghɛ ghɛ ə Zhə̀fè kyiŋə nâʼà ə̀kɨ̂m. Ghàyn kwiynse ndə̂plè, ə è tə ndo ə ghàyn epàm.

⁸ Ghàyn pə̀yn paʼse sê Zhə̀fè kə fe pə̀yn paʼse sê ghàyn. Ghɨ əghɛ piə ghɨyn! Ghàyn shù gho ghaynghe əghɛ piə! Ghàyn ghɨ kaŋkaŋə nəghe, ghàyn e kwâʼtə̀ kə ə̀ghɛ ə chûŋghè!

⁹ Ghàyn e nyi è komə̂ ewìynze, chîə, chîə mbɔ̂sə̀ fèshi. Ghàyn kwiyne chaʼ zaynze ə ghàyn ə chîə, ə ghàyn kwiyne saŋnê zaynze sə ekosê ekyàʼzè.

¹⁰ Ghàyn tsose ngɨŋ saynse ə Pɛ̂pɛ əshi kə fe ndwise ghàyn.

Kə ghàyn ə wâmnə̀ ghɛ əpighe kûmə̀ ə̀ ghɔnyì ə mɔ̀ʼɔghe

¹¹ Ghɔnyì ghɨmə, kə ghàyn ə wâmnə̀ ghɛ əpighe kûmə̀ ə̀ ghɔnyì ə mɔ̀ʼɔghe ə ghàyn ə fètəyn. Ə̀ pofsə pi ndè zə ànyìə vəyn kɨ̀sə è saʼa vəyn, ə ze ə tyə̂nə̀ nə è pìə èghɛ epi nə zɛ kûmə̀ Èsaʼ fɨnə saʼa kepî Èsaʼ ətəyn. Ə wùə saʼa Saʼze, ə nyi mə è ndə̀mə̀ va saʼ ətəynze, è pɨlə pîə nə saʼ ətəynze kyi va ghɛ zhîze se nə̀yn è vəyn.

¹² Ə̀ nyi ke Fèzhə̀ ə fe fo saʼte fɨnə saʼa ə̀ghɨ. Ə̀ nyi ke fəynfe ə fe kàʼa ə fe sɔza ə̀ghɨ, ə̀ fɨyn nyi ke fəynfe ə fe kàʼa ə fe pofsə̂ ghənə. O nyi ndè sə̂ saʼa ə̀ghɨ ə pomə mɔ̀ʼɔ ghə ə?

Fɨ̀as kûmə̀ èghaŋsê ewìynze

¹³ Zôyn ghàyn zɨte, ə ghàyn ghɛ ə ghàyn pìə nə, “Ndâyn kɨ̀sə eyisəʼə, ghàs nə̀ ndûə ə tɔ̂ŋ èghaʼâ zhizè, ə ghàs ndam fumə sə pîŋ, ə ghàs nə pəʼlè ə ngə̂sê kyî èkɛ”.

¹⁴ Kûmə̀ ghè ə ghàyn wàmnə̀ nyiə, ke va nə ə̀ tə kyânə̀ ghè eyisəʼə? Ndam zaynze nyi ke kə fefɨ̂atə̀ fə andəʼfe fɛ ə fe fɨə pə̂ kə nyi, ə mòtə̀ kə sə fendîŋə̀ nyi fe ə kɛsə̂ saŋə.

¹⁵ Ghàyn pɨl kyi sə̂ piə nə, “Ə ze kwəynə sê Pɛ̂pɛ, ə ghàs ndam ə nəyn ghɛ zɨ̀yn kɨ̀sə zhîə.”

¹⁶ Pîza zôyn ghàyn ghaŋsə̂ kə èwiyn eghɛ zɛ ə ghàyn kyiŋə se nə̀yn, mə kyì eghaŋsê ewìyn nə zɨnə mə ekɨ̂m nyi pi.

¹⁷ Nyiəm, ə̀ ke pi ndè ghɛ echûŋ zɛ ə è kyi se nə̀yn ə tàʼa nə̀yn, ə ze ə nyi nə è və nə̀yn pi.