Njə̂m 3 - Ŋwàʼlè ə̀ Fèzhə̀ Mkâyn Mə̂ Fèm

Ghâsènì kyi sə̂ tɔ̂ʼnə̀ èndəm ə ghasènìke

¹ Ghɔnyì ghɨmə, kə ghàyn əkɨ̂m ə no sə̂ nyi sètyəynsè, kûmə̀ nə ghàyn ke ndô nə Zhə̀fè tə njîə ashîŋə̀ tsɨəke se saʼa ghâsènì ghɛ ə zaʼlə tsɨ̂ə tsɛ̂ kə è tə saʼa ghɨə mɔ̀ʼɔghe.

² Ghâsènì əkɨ̂m nyìə nə̂ pofsə̂ ə̀ghɛ. Ə wùə nə̀ pofsə va ə vəyn ewàmnè, ə nyi mə wùə ə̀təyn ə ndəmə̂ kwəyn, nyi mə è kàʼa è chise ngɨŋə̂ vəyn əghɛ ə mɔ̀ʼɔghe əkɨ̂m.

³ Ghâsènì kàʼa ə fəʼte kenyàmkè akɨ̂m ə ke kəmne ezhoghɛ ə ghâsènì tuŋ chaʼ ə kəynke echo se nə̀yn nə ke ə zɨə ghâsènì.

⁴ Ghàyn fe kepî ngwùʼ èghaʼâ kə è nyiə! Pî kə è ngəsə̂ ghaʼa, ə̀ fəʼtə̂ kə fɨ̂atə̀ fə londàfè zə̂ynzè, è ze ndûə nâʼàpî ghayn kə wùə è shìnə ə̀ ngwùʼ èghaʼâ kwəynə kyiŋə nə è ndu.

⁵ E za nyi kepî eghɨ kə andəm ə wûəkè. Ə̀ nyi eluʼ ewiynve, tətə̂ kə nyi, pîza mə ke kàʼa ə ke ə kɔʼsə̂ èwiyn pîə ə̀ghɛ ə ghaʼâ. Ghàyn fe kə fɨ̂a fə andəm ewùske nə̂ nyɔ̀ʼɔ̀ àko ke ghaʼa kə nyi ə!

⁶ Ndəm ə wûəkè nyì kepî kə andəm ewùske, ke nyi ke kə mbi mə ə̀ lwiyn kê pi ətəyn, nə̂ kə wiynve ekɨ̂m nəyn pi. Ke kaʼa ə ke nyɔʼ wiyn ə wûəvè ekɨ̂m è wusve ve nyi kə vɛ ə ve ndô ke nâʼà elùʼ ewùs.

⁷ Wùə m̀sɔ̀ŋ kàʼa è nəyn ə kyì ə senyàm tekɨ̂m kə senyam sə mbvɨynse, è nɨ̂ŋmè, è sɛ ə se ŋâŋnə̀, è fɨa vɛ ə ve nyi ə tsô ə nə̂ èghɛ zɛ ə è kyiŋə.

⁸ Pîza, wùə vîvè va ə è nyi nə̀yn nə ndəm ə vəynke nəyn ghɛ zɛ ə è kyiŋə. Ndəm ə wûəkè nyi afɨa e pike, tsɨsə̂ tsɛ̂ va mɔŋ, kyi lɨf, è zhwiə.

⁹ Ghâsènì tsîtə̀ Pɛ̂pɛ vɛ ə è nyi Pɨ̀a ghâsènì è ndəmke, sôylə̀ kəpì ə̀ghɨ msɔ̀ŋghe mə ə̀ pom Fezhə̀ ghe fusə̂ vəyn è ndəm nə kɛ̂.

¹⁰ Ə tsɨ̂tə̀ Fèzhə̀ è ndəmke fɨnə sôylə̀ kəpî ə̀ghɨ è kəynke. E kyi va sə̂ nyi za ə ghɔnyì ghɨmə.

¹¹ Mô mə èzomè è mô mə èliŋə̂m vayn kaʼa m̀ mə fɨə ətɔŋ èmɔ̀ʼ.

¹² Ghɔnyì ghɨmə kâʼ fə fîkfè nyiə kàʼa ə fe mu twɔm ə olìfvè ə? Kâʼfə etwɔm mlɨ̀kè kàʼa ə fe mu twɔm ə olìfvè ə? Mə tɔŋ m̀mò zɛ ə è fɨsə mômə̂ fèngwaŋme kàʼa è fɨse mô mə̂ èchùŋmè ə?

Etɔf eghaʼâ zɛ ə ze ndô pə̂ se Zhə̀fè

¹³ Ə wùə nyi ə ghàyn əfètəyn kyi ètɔfə eghaʼâzè, fɨnə zɨə kê ə̀ghɛ, è və tyə̀nə endam echûŋ zɛ ə è ndamə, sə̂ nə̂ ə̀ghɛ chûŋghè è ngɨmnêzè è kɨsè tɔf eghâʼazè.

¹⁴ Pîza ə nyi mə ə ghàyn ətəm nyi mə lwiyn ke kàyntè aghə̀ʼ, è muze, kə wùə sê ghàyn nə ndə̂tè səmɔʼ ə è və pfɨ̂nə̀ àngàŋtè pîə nə zhi nyîə kyi ètɔf eghaʼazè.

¹⁵ Kyì etɔf eghaʼâ nə zɨ̂nə̀ ndò pə̂ va sê Zhə̀fè, ze ndo pə̂yn fa mbi, ze paʼà ndò pəyn sê Zuʼse Ŋwaʼase, ə̀ fo ndə̂plè è ngɨŋə̂ vəyn.

¹⁶ Luʼ vɛ ə ghə̀ʼkè è muze nyi ətəyn, nâʼàpî ndè e ndamə kə kə è kɔ̀ŋə̀, kyì əghɛ ə pighe əkɨ̂m e kyânə̀ fu.

¹⁷ Pîza, ghɛ əshi zɛ ə ze nyi kûmə̀ ètɔf eghaʼâ zɛ ə ze ndô pə̂ ekwùtwəyn nyi nə ze nyîə zo, kɔ̂ŋə̀ pɔ̂ynè, pɔynə̂, ndə̂mə̀ ngɨŋə̂ vəyn əchi, kyi ekosê esəyn zɛ ə ze muə twɔm echûŋvè, nə̂ ə̀ghɛ kè eghɨ sê ghɨghe, kaŋkaŋə̂ nə̂ va ghɛghe.

¹⁸ Ghɨə pɔ̂ynè ghɛ ə ghe zho è pɔ̂ynè, fɨa kɛ ə ghənə tə kwîə nyi chichi.