Njə̂m 2 - Ŋwàʼlè ə̀ Fèzhə̀ Mkâyn Mə̂ Fèm

Fɨ̀as sə̂ kɔ̂ŋə̀ wùə ə̀mɔʼɔ̂, pânə̀ və mɔʼɔ̂

¹ Ghɔnyì ghɨmə, ghàyn kə ghɨ pomə sê Pɛ̂pɛə ghâsènì Njisə̀s Klâys vɛ ə è kyi pomsêzè kyi va sə̂ kɔ̂ŋə̀ wùə ə̀mɔ̀ʼɔ̂, pânə̀ və mɔʼɔ̂.

² Ghàyn ndə̀m nə ghɨ ghe əpɛ̀ ə nji pə̀yn ə ghàyn ə ndɛ̂ atsɨ̀ynte, vəmɔʼɔ e nyi mə è və fɛte laf nâʼà àchûŋ è ndzɨse se tɛ èkɛve, ə chìŋə̀ sèchaʼ mə ə fɛte è ngôl, vîvè e nyi wùə àfɨf mə è màʼ ke eshwɔ̂ʼ ə sendzɨse.

³ Ə ò tɔ̀ʼnè è vɛ ə è laf achûŋ ə pìə sê vəyn nə, “Tsɨsə fâ fekyə̀ fechûŋfè”, pîza ə pìə sê wùə àfɨf vɛ nə, “Tyəm ndù fɛ, ə̀ va zâ o pə̀ tso tsɨsə̂ əchi fa mì ə tefɨəyn,”

⁴ piə zɨnə mə tyə̂nə̀ nə ghàyn nyîə kɔ̂ŋə̀ ə̀ghɨ əmɔ̀ʼɔghe ə ghàyn əfètəyn tsɛ̂ yîghe ə? mə ghɛ zɛ ə ze nə̂ nə ghàyn ə nə̂ nyiəmə nyi pi.

⁵ Ghàyn zɨte ə ghɔnyì ghɨm ghe chûŋə̀! Piə ghàyn ke ndô nə Zhə̀fè ə tə chɔʼ ghɨ ghɛ ə ghɨ ə mbighe njîə nə nyi əghɨ afɨfə, ə nə̀ nə ghənə ə kyi èkyî èpomə̂ eghaʼâzè, ə ghənə kyi luʼ efɔ̀yn vɛ ə Zhə̀fè tè tsɨ̀nè sê ghɨ ghɛ ə ghe kɔ̂ŋə̀ vəyn.

⁶ Pîza, ghàyn nyi mə ghàyn ə sòylè ghɨ afɨfə. Piə ə̀ kyiə fiə ə̀ghɨ ghaʼâghè fɨa vâynvè, fɨnə njîə ndùə èghàyn ətelùʼ tə saʼte?

⁷ Piə ə̀ pofsə̂ kəpî ghənə zə echûŋ ə wùə vɛ ə è kyi ghàyn ə?

⁸ Ə ghàyn lotə ndə̂mə̀ saʼ ə efɔ̂yn ə Fezhə̀zè kə ze nyi ə Ŋwàʼlè ə̀ Fèzhə̀ nə, “Kɔ̀ŋ ghɨə mɔ̀ʼɔghe kè eghɨ kə ghàyn kɔ̂ŋɔ̀ ngɨŋ saynse,” ə̂ nyi mə ghàyn nə̀ kə nâʼà èghɛ echûŋzè.

⁹ Pîza, ə ghàyn sè njîə nə ghɨə mɔ̀ʼɔ nyiə tsɛ̀ yîghe, ə nyi nə ghàyn nə̀ pi, ə Saʼze ko ghàyn kè eghɨ kə ze ko nâʼàpî ndè vɛ ə è kəm saʼze.

¹⁰ E za tyə̀nə̀ nə ə̂ ndə̀mə̀ pîndè saʼ tekɨ̂m ə nə̀ kəmə kə èmɔ̀ʼ, ə ze ə nyi nə è və kəm saʼ tekɨ̂m.

¹¹ E nyi nyî kûmə̀ nə wùə vɛ ə è tè pi nə, “Kə wùə nə̂ nyîŋə è zhwîə wùə kɨ̀sə yî ndom ə̀ wùə,” è və tə pì kepî nə, “Kə wùə nə̂ zhwi.” Ò za tàʼa nyìŋə̀ è zhwiə wùə kɨ̀sə ghayn ndom ə̀ wùə, pîza ə zhwiə wùə, ə ze ə nyi mə o kəm ke saʼ tekɨ̂m.

¹² Ghàyn e tɔ̂ʼnə̀ è wâmnè zaynze fɨnə nə̂ kə ghɨ ghɛ ə nyi se tə saʼ ə ghənə èsaʼ zɛ ə ze nə̂ nə kə ghɨghe ə fɨyn nyi èkɔ̂s.

¹³ Kûmə̀ nə shîŋə̀ kɛ ə Zhə̀fè tə piə fe saʼa nâʼàpî ndè vɛ ə è kosə va səyn sê wùə, ə fe tàʼa kosə esəyn sê vəyn; Pîza wùə vɛ ə è kosə səyn sê ghɨə mɔ̀ʼɔ, shîŋə̀ kɛ ə Zhə̀fè tə piə fe saʼa vəyn, ə fe saʼ vəyn èkosê esəynze.

Kyî epomə̂zè mə ze kyi va fɨ̂aʼ echûŋzè va nâʼà èghɛ zhîze

¹⁴ Ghɔnyì ghɨmə, ə wùə pìə nə zhi ə kyî kyì epomə̂zè se Zhə̀fè, tyə̂nə̀ va ə vəyn efɨaʼ, ə chùŋ ə̀təyn ə nyi nâʼà ghè? kyî epomə̂ nə zɨ̂nə̀ kàʼa ə ze sɔza vəyn ə?

¹⁵ Ə nji nə ànyì vîvè kyi va ndzɨse se màʼ, kyi va fɨake se zhi,

¹⁶ ə wùə vîvè sê ghàyn pì sê vəyn nə, “Kwiə kə achûŋ. Ə ò ndù ò mâʼà àfɨa ə tɨmtəke, ə fɛtə zhiə kolə,” pîza ndɔ̀ʼə ghàyn fo fɨa ewìyn vɛ ə è kyiŋə, ə chùŋ ə̀təyn ə nyi nâʼà ghè?

¹⁷ E za nyi nə ə wùə kyi kyî epomə̂zè ndɔ̀ʼɔ è paʼse fɨ̂aʼzè ətəyn, ə pomə̂ ətəynze ə va nâʼà èghɛ zhîze.

¹⁸ Pîza wùə vîvè kàʼa è pi nə, “Ò nyîə kyi èkyî epomə̂zè, m kyi èfɨaʼ.” M pîə nə ò tyəyn kyî epomə̂ zɛze sê mi zɛ ə ze kyi va fɨ̂aʼzè, m tyəyn fɨ̂aʼ zɨm zɛ ə m nə̂ tɔynə̂ ə mì ekyî epomə̂zè.

¹⁹ E tsɔ̂fə̀ kə ò pomə nə Zhə̀fè nyì ke fèmɔ̀ʼ! Nâʼàpî tèpamə̂ tə Satàyntè nyîə pomə̂ kə pîza fɨnə tsɨŋtə̂ è fâynzè.

²⁰ Ngo afɨa kɨ̂yn! Ò kyiŋə se fe chwìə nə kyî epoməzè nyi ezom ezhoghɛ ə ze kyi va fɨ̂aʼzè ə?

²¹ Zhə̀fè tè nji pɨ̀a ghâsènì Aplàghâm sə wùə chichi kûmə̀ ghè? Piə ə̀ tè nyi kûmə̀ èghɛ zɛ ə è tè nəyn kə è tè fo vâ vəyn Azɨ̀k sə efo etûə àlaŋ efoke ə?

²² E za tyə̀nə̀ nə kyî epomə̂ ə vəynze è fɨ̂aʼ ə vəynze tè nyi ke sə afɨa àmɔ̀ʼ. Ə̀ tè nəyn efɨ̂aʼ ə vəyn nə kyî epomə̂ ə vəynze kwəyne.

²³ Ze tè kyàyn nyi ə lwiynsə kə eluʼ ə Ŋwàʼlè ə̀ Fèzhə̀ vɛ ə ve tè pi nə, “Aplàghâm ə tə pomə̂ sê Zhə̀fè, fe ə njiə vəyn sə wùə chichi,” ə fɨnə tɔŋtə vəyn nə sô vəyn.

²⁴ Ghàyn fe ndò zôyn nə, Zhə̀fè njîə wùə sə wùə chichi kûmə̀ èfɨ̂aʼ ə vəyn, ə̀ va ke kûmə̀ èkyî èpomə̂ ə vəynze.

²⁵ Kèpî famə endom, Zhə̀fè tè nji La-àp mə ə̀ tè nyi afɨa ə kwiəke sə wûə ə̀ chichi tɔynə̂ efɨ̀aʼ zɛ ə è tè fɨ̂aʼ. È tè fi ndzɨsê əghɨ Isìlâyghè mə ə̀ tè nyi sechə̀yn ə tyə̀ynə̀ tèndom tə ndôtè kə ghənə ndo tə ətəyn.

²⁶ E za nyì nə kèpî kə wiyn vɛ ə ve kyi va zuʼse nyi mə ve ə kwu, ə̀ nyì kepî zamə kə kyî epomə̂ zɛ ə ze kyi va fɨ̂aʼtè nyi mə ze ə kwu.