Ŋwàʼlè ə̀ Mâk 9 - Ŋwàʼlè ə̀ Fèzhə̀ Mkâyn Mə̂ Fèm

¹ Njisə̀s ə fɨnə pîə se ghɨ nə ghɛ nə, “M pîə sê ghàyn səmɔʼ nə, ghɨ yiə tyəm ke nâʼà fayn zôyn, va se tə kwu ndɔ̀ʼɔ fe kə fɔ̂yn ə Fezhə̀vè pə̀yn ètyaʼa.”

Wiyn ə Njisə̀svè ə kwiynê ə pfɨyn

² Epàmə m̀tuʼ mtufə, Njisə̀s ə njìə Pità è Njə̂m è Njɔyn yîghə̀ ghənə ə kɔʼɔ ndûə etûə pfɨ̀yn è ghaʼa zhîzè. Ə̀ tè nyi kə ghənə nyi fu. Kyâʼ ə Njisə̀szè ə pfɨ̀ŋə̀ kwiynə̂ kə ə chùmte èpàm sə vəynsə əshi.

³ Ndzɨse ə vəynse ə kə̀mnə̀ fɨfə kə nyi, fɨnə nyiynə̂ mə wùə vayn kàʼa e shu ndzɨse fâyn ə mbi ə se zo sə fɨfə zamə.

⁴ Kè nyi, Èlanjà yî Mosîs ə fɨə ghənə ekyàʼ sè wâmnə̀ sê Njisə̀s.

⁵ Pità ə ke pì sê Njisə̀s nə, “E tsɔ̂fə̀ ndò ə Tyə̀ynsè kə ghâsènì nyì fâyn. Ghàs nə̀ pɛ m̀pfɨ̀ə m̀ta, ə ò kyi fèmɔ̀ʼ, Mosîs e kyi fèmɔ̀ʼ, Èlanjà e kyi fəmɔ̀ʼɔfe.”

⁶ È tè wàmnə zâ kûmə̀ efâyn etsɨə zɛ e tè nyi ə ghənə ewìyn.

⁷ Kè nyi, mbàʼsè ə tso ə kɨytə̂ ghənə, kyə̀ ə fɨ ətəyn ə pìə nə, “Ə̀ vɨ̂nə nyi Vayn èkɔ̀ŋ vɨ̂mè. Ghàyn e zɨə sê vəyn.”

⁸ Ghənə ə pîə fɨnə naynə̂ ndò ə tàʼa fɨnə fe wùə, ə̀ tsɛ̂ kə va Njisə̀s.

⁹ Ghənə ə pìə kɛsə̂ tso pə̂ ndò fumə ə pfɨyn, Njisə̀s ə kànə̀ se ghənə pîə nə “Kə ghàyn nə tsayn èghɛ zɛ ə fe sê wùə se zaʼâ kə Va Wùə tə zômə̀.”

¹⁰ Ghənə ə ndə̀mə̀ èghɛ ətəynze kè sê ngɨŋ sə ghənə̂sè sè pfɨfə se ngɨŋ sə ghənə̂sè nə se zòmə̀ chwìtə̀ nə ghɛ?

¹¹ Ghənə ə pfɨfə sê Njisə̀s nə, “Kûmə̀ ghè ə tyə̀ynsè sə alàŋsè tè piə nə ə kyi Èlanjà se pə̀yn sə shi sê vɛ ə kɨmnə?”

¹² È və pìə sê ghənə nə, “E nyi ke nâʼà səmɔʼ nə Èlanjà pə̂ ndò sə shi, se pɨaʼtə nâʼà əghɛ ə̀kɨ̂m. Pîza, kûmə̀ ghè ə nyâʼ ə Ŋwàʼlè ə̀ Fèzhə̀ nə Vâ Wùə nə fe ngəʼ nâʼà sə ŋaŋ, ə fɨyn kwiynse nə è va afɨa ə?

¹³ M pîə sê ghàyn səmɔʼ nə Èlanjà tè pə̀yn ghɨghe e kotə̂ pî ghè vɛ ghənə tè kɔ̀ŋɔ̀, nə̂ sê vəyn kè eghɨ kə ə tè nyi mə ə nyàʼ ə Ŋwàʼlè ə̀ Fèzhə̀ kûmə̀ vəyn.”

Njisə̀s ə tsuʼ vayn endômə̀ è ve kyi sezuʼse pise

¹⁴ Ə pə̀ kə ghənə kɛse pə̂yn elùʼ vɛ ə chùmtè èpàm sə Njisə̀s sə mɔ̀ʼɔse tè nyi ə kotə̂ mə nɔ̂ynkè ə kyɨ̀ŋ nga ghənə. Tyə̀ynsè sə alàŋsè e saʼnə̂ yî ghə̀ ghənə.

¹⁵ Nɔ̂yn ə ghɨ̀ nə kɨ̂yn ə fe Njisə̀s kè sə ashìŋə̀, sè nyi èkaynze. Ghənə ə nyɨŋə ndûə tɔŋtə̂ vəyn.

¹⁶ Njisə̀s ə pfɨfə sê chùmtè èpàm sə vəynse nə, “Ghàyn saʼnə̂ ghè ghâyn ghɨ ghɨyn ə?”

¹⁷ Wùə vîvè əfètə̂ ànɔ̀yn nə kɛ ə pîə nə, “Tyə̀ynsè, m pə̀yn è vayn endômə̀ vɨ̂mè sê ghò, è ve kyi sèzuʼ sepise, se nə̂ nə kə è və wâmnə̀.

¹⁸ Se kyîə pî vəyn ashìŋə̀ àkè, tɨmə kə vəyn ə chi, è ve nâyntə̀ tɛ kə nyiə kwas, pfɨpfɨke e fɨə ə vəyn echo, è ve kwɨlə ə̀sɔŋ. Mə fê pə̀yn chyate chùmtè èpàm sɛse nə ghənə chum fɨse sezuʼ nə sɨ̂nə̀, ghənə e fɨmə se chùm.”

¹⁹ Njisə̀s ə pìə sê ghənə nə, “Ə̀ fɨnə nyi feghâŋ fèkè ə fe làʼà pomə̂zè nyiə ə? M nə̀ kolə zaʼâ zàyn təmə ghâsènì ə? Pə̀yn è va ətəyn sê mi.”

²⁰ Ghənə ə nji pə̀ è vâ ətəyn sê Njisə̀s. Zuʼse epi nə sɛ ə fe pə̀ kə Njisə̀s nyî, ə kyîə vâ ə̀təyn, ə tɨmə vəyn ə chi, è ve pɨŋnə̂, pfɨpfɨke e fɨə ə vəyn echo.

²¹ Njisə̀s ə pfɨfə sê pɨ̀a vayn nə vɨ̂yn nə, “Zaf nə zɨ̂nə ndam tayn zàyn ə vəyn ewiyn ə?” È və pìə nə, “Kè se zhə̀tè ə pə̀yn kə̂ è tè nyi sə vâyn pɔ.

²² Se tɨmə kə vəyn ewùs è kɨsè mmò shîŋə̀ tekɨ̂m se zhwiə vəyn. Pîza, ə ò nyi mə ò kàʼa ò nəyn ghɛze, o kosə̂ èsəyn sê ghàs, ə tsàmtə̀ ghàs.”

²³ Njisə̀s ə pfɨfə sê vəyn nə, “Kûmə̀ ghè ə ò pìə nə ə m nyi kàʼa m nəyn ghɛze mə nə̂ ə? Ə̀ pomə pindè, ə kaʼa ə nəyn nâʼàpî ghè sê vəyn.”

²⁴ Kè nyiə kə è wàmnè mɨ̂sè, pɨ̀a va ə̀təyn ə pɨa pîə nə, “Mə pomə pîza fɨyn tsàmte mi ə m tɔʼ pomə̂!”

²⁵ Ə pə̀ kə Njisə̀s fe kə ghɨə se nyɨŋə pə̀ se tsɨ̀, è və kàyntə̀ ə̀ghɛ sê zuʼse pi nə sɛ ə pìə nə, “Tsɛ fɨ. Ə̀ pi mi sê ghò ə zuʼse pi sɨ̂nə̀, sê ghò vɨ̂nə ò nə̂ nə kə vayn vɨ̂yn ə wâmnə̀, fɨnə nə̂ nə kə è və zɨə ə̀ghɛ. Ə ò fɨ za kə ò tə fɨyn nji.”

²⁶ Zuʼse pise ətəynse ə fo kyə̀, ə nə̂ʼsə̀ vâyn nə vɛ nâʼà sə ŋaŋ ə fɨə. Vâ ə̀təyn e sè kyaʼà kə kə̂ akwu ə wûəkè, nɔ̂ynkè ə zhə̀tə̀ sè pîə nə, “È və kwu”

²⁷ Pîza, Njisə̀s ə kyîə àgho vəynke ə ndwìsə̀, è və ndwìə tyəmə̂.

²⁸ Ə pə̀ kə Njisə̀s njiə ə ndɛ, chùmtè èpàm sə vəynse ə nyaʼtə̂ pfɨfə sê vəyn nə, “Kûmə̀ ghè ə ze fe tɛ ghaʼa ghàs se chùmə fɨse ə sezuʼ sepi nə sɛ ə?”

²⁹ È və pìə sê ghənə nə, “Fɨa vayn kàʼa ke chùm fɨse, èkyìə ə sezuʼ sepi nə sɨ̂nə̀ ə̀ tsɛ̂ kə va tsə̂mzè.”

Njisə̀s ə wàmnè kûmə̀ èkwu ə vəynze

³⁰ Ghənə ə ndò fumə ə kwìə ə ndùə tɔynə̂ apàs endaʼ ə Ngalìlîkè, Njisə̀s e kɔ̀ŋɔ̀ va nə wùə ə ke nə zhi nyi fu,

³¹ kûmə̀ nə ə̀ tè nyi zâ, è ve zaʼlə̂ sèchùmtè èpàm sə vəynse pîə sê ghənə nə, “Ə nə̀ fo Vâ Wùə sê ghɨə, ə zhwi vəyn, ə epàm ə mtuʼ mta, ə è kɛse zômə̀.”

³² Pîza ghənə ə tàʼa zɨə kê eghɛ nə zɨ̂nə̀ sè fânə̀ ghaʼə se pfɨf.

Njisə̀s ə zaʼlê kûmə̀ wùə vɛ ə è tsɛ̀ wùə mɔʼɔ̂

³³ Ghənə ə ndùə zaʼâ ə Kàpanùm sè nyi ə ndɛ, Njisə̀s ə pfɨfə sê ghənə nə, “Ghàyn fe saʼnə̂ pə̀ nə ghe endom za?”

³⁴ Pîza ghənə kɨmə̂ kə mɔŋ kûmə̀ nə ə tè nyi endom saʼne ze nyi nə, ə nyi ndè wùə vɛ ə è ngaŋtə tsɛ̂ ə ghənə əfètəyn ə?

³⁵ Njisə̀s ə tsɨsə̂ ə chi ə pîə sê chùmtè èpàm sə vəynse nə sɛ njòse pɛ̀ nə se kɨŋtə pə̀yn paʼsê sê vəyn. Ə pə̀ kə ghənə kɨ̀ŋte paʼse pə̂yn, è və pìə sê ghənə nə, “Naʼapi ndè vɛ è kɔ̂ŋɔ̀ sə̂ nyi əshi kyi se ndə̀mə ngɨŋ ə vəyn èpàm ə ghɨ̀ ə̀kɨ̂m, sə fɨyn nyi wùə èfɨ̀aʼa se ghɨghe əkɨ̂m.”

³⁶ Kə è wàmnè zâ, ə shìyntə̀ vâyn èpɔ, ə tɔmə ə ghənə əshi ə fɨnə tolə va ətəyn, ə ke pì sê ghənə nə,

³⁷ “Ə̀ tɔ̀ʼnè pîndè è vâyn nyiə kə vɨ̀nə kûmə̀ mi, ə nyi mə è və tɔ̀ʼnə̀ èmi, ə vɛ ə è tɔ̀ʼnə̀ mi ə ke nə è tɔ̀ʼnə̀ e vɛ ə è tom mi.”

Wùə vɛ ə è nyi ə ghâsènì apàs

³⁸ Njɔyn ə pìə sê Njisə̀s nə, “Tyə̀ynsè, ghàs a fe wùə è ve chûmə̀ fɨsə̂ tèpamə̂ tə satàyntè ə ghò ezə, ghàs ə pìə nə kə è fɨyn mɔm kûmə̀ nə è va wùə èmɔ̀ʼ ə ghâsènì əfètəyn.”

³⁹ Pîza, Njisə̀s ə pìə sê ghənə nə, “Kə ghàyn fɨyn tam vəyn, kûmə̀ nə nâʼàpî ndè vɛ ə è nə̂ ghɛ echo ə zomə ə mì ezə kaʼa è fɨyn kə̀mnə̀ sə̂ pîə ə̀ghɛ piə kûmə̀ mi.

⁴⁰ Naʼapi ndè vɛ ə è nò va ghâsènì nyi ə ghâsènì apàs.

⁴¹ M pîə sê ghàyn səmɔʼ nə, nâʼàpî ndè vɛ ə è fo wà mmò nə ghàyn mɨte kûmə̀ nə ghàyn chùmtə̀ mi vayn kàʼa è faŋ se kyî emâʼte ə vəynve.”

Əghɛ ghɛ ə ghe nə̂ nə wùə ə nə̂ pi

⁴² “Ə̀ nyiə nə̀yn pîndè nə ghɔyntə̂ femɔ̀ʼ əfètə̂ ə̀ ghɔyn nə ghɨ̂yn ə pomə sê mi nyiə nə̀yn pi, ə ze ə tsɔ̂fə̀ nə ə kol chize ə vəyn emì, ə ndu mâʼà vəyn ə tsô èghaʼâ.

^43-44 Ə gho kɛ ke nə̀yn nə ò nə̀yn pi, o kà tsɨ̂sə̀. E tsɔ̂fə̀ nə ò kyi ndam zɛ ə ze tə mîə va kyi va gho ke àmɔ̀ʼ, tsɛ̂ kə ò nji elùʼ epofə vɛ ə wuse pɛ ətəyn ndɨmə̂ va.

^45-46 Ghol kɛke ə nə̀ nə ò nə̀yn pi, o kà tsɨ̂sə̀. E tsɔ̂fə̀ nə ò kyi ndam zɛ ə ze tə mîə va kyi va gholke àmɔ̀ʼ, tsɛ̂ kə ò nə kyi ə̀ghol ghɛ əkɨ̂m, ə màʼa ghô ewùs.

⁴⁷ Shi zɛze ə nə̀ nə ò nəyn pi, o pɔ̀ʼɔ̀ fɨsə̂. E tsɔ̂fə̀ nə ò nji efɔ̂yn ə Fezhə̀vè è shize emɔ̀ʼ tsɛ̂ kə ə maʼa ghô elùʼ ewùs è shighə pɛ̀,

⁴⁸ mə za nyi elùʼ vɛ ə kə kwûsvè nə kwɨlə chaʼ ewìyn kɛke ətəyn, wusve pɛ̂ fu mə ə vayn kàʼa ndɨmse.

⁴⁹ Kûmə̀ nə ngwaŋ fɛ ə tè fɛte nâʼàpî ndè ətəyn tə pə̂ ə nyi ke ewus.

⁵⁰ Ngwaŋfe nyîə tsɔ̂fə̀, pîza mə ezhoghɛ fe sè fɨnə tɔfə va, ə ò ghayn ghe è fəynfe nə fe ə fɨnə tɔfə? Ghàyn e kyi fèngwaŋ ə ghàyn ewìyn. Nâʼàpî ndè e ndamə èndam ə pɔ̂ynèzè yî ànyìə vəyn.”