Ŋwàʼlè ə̀ Mâk 5 - Ŋwàʼlè ə̀ Fèzhə̀ Mkâyn Mə̂ Fèm

Njisə̀s ə tsuʼ wùə mə è kyi sezuʼ se pise

¹ Ə pə̀ kə Njisə̀s tyàŋ njwî ə Ngalìlîvè yî chùmtè èpàm sə vəynse ə ndùə tânə̀ apàs endaʼ kɛ ə tè tɔŋtə nə Njɛ̀lɛsens,

² sè fɨə pə̀ kə ə ngwùʼ èghaʼâ nyî, ə kwənə yî wùə, è ve kyi sèzuʼ sepise, mə è ndò ə teshyə̀.

³ Ə nyi zâ, wùə ə̀təyn e ndamə ndûə kə ə teshyə̀ teghaʼâ nə tɛ, wùə e va nâʼà èmɔ̀ʼ ə è tè kàʼa è kol ndəm vəyn luʼve emɔ̀ʼ nâʼàpî è chaʼse;

⁴ kûmə̀ nə ə tè faŋə va se fâ tefɨəyn tə vəynte è chaʼse se fɨnə kolə̂ ekɔyn ə vəynze è chaʼse nə è təynte ke ndò, nâʼà wùə e fɨnə tɛ kwəynə va se kyiə ndə̀mə vəyn luʼve emɔ̀ʼ kûmə̀ nə è tè nyîə kyi tsɛsè àtyaʼ.

⁵ È ve kwîə ka əfètə̂ tèshyə̀ teghaʼâtè è pfɨynse kə tuʼve zo, kə ve chi pɨaytə̂, ndəmsə̂ ngɨŋ ə vəyn è chîə.

⁶ È və fe pə̂ kə Njisə̀s sə aghaf, ə nyɨŋə ndûə tɨmə ə̀ngwuʼ ə vəyn əshi

⁷ ə pɨa nâʼà è kyə̀ ètɛ ə pìə nə, “Ghasè ghò kyi kɨŋnê ghè ə Njisə̀s, Va Fèzhə̀ fɛ ə fe ngaŋtə kwəynə? M chyatə̂ ghò ezə ə Fezhə̀zè nə kə ò poynse mi!”

⁸ È tè pîə zâ kə̂ Njisə̀s pì se zuʼse pisə təynse nə, “Fɨ ə wùə vɨ̂nə ewìyn ə zuʼse pi sɨ̂nə̀!”

⁹ Njisə̀s ə ke pfɨf sê wùə ə̀təyn nə, “Zə zɛze nyi nde?” È və pə̀ynsə̀ nə, “Zə zhize nyi ‘Anɔ̀yn,’ kûmə̀ nə ghàs nyi nâʼà se tsɨ̀.”

¹⁰ È və pìə zâ sè chyatə̂ Njisə̀s pîə nə kə è chum fɨsê sèzuʼ sepi nə sɛ ə apàs endaʼ nə kɛ.

¹¹ Ə tè nyi zâ nɔ̂nə ekwùndwuŋ eghaʼâ kyîke e nyi paʼsê fu, zhiə èwiynə ə̀ pfɨyn.

¹² Zuʼ sepi nə sɛ ə chyatə̂ Njisə̀s ə pìə nə, “Tom ghàs elùʼ ə ekwùndwuŋ fɛ̂, ə ghàs njiə ə vəynve ewìyn.”

¹³ È və zà ghənə, ghənə ə fɨə ə wùə nə vɛ ewìyn ə ndùə njiə əfètə̂ ekwùndwuŋ vɛ. Ə nyi za, Kwùnduŋ ətəynve e kɔʼɔ tâ ndùə sèkam sè pɛ̀, və shɨŋə nyɨŋə ə tso ndûə tânə̀ ə apɔ̀ʼ kyîke ə etipì ènjwì ə tàyntə̀ ə tsô ə ndiŋə.

¹⁴ Ghɨ ghɛ ə tè tsɨ̀ŋnə Kwùnduŋ nə vɛ ə tə kwɨlə̂ ndûə ə tɔ̂ŋ è kɨsè tə̀ʼtə̂ mɛ m̀ tè nyì fu ə tsà èghɛ zɛ ə ze kyâyn. Ghɨə təynghe ə fɨə ndûə se fe eghɛ zɛ ə ze kyayn,

¹⁵ ə pə̀ fe Njisə̀s. Wùə vɛ è tè kyi nɔ̂yn ə tepamə̂ tə satàyn nə tɛ e tsɨs kepî fumə mə è və màʼ ndzɨse, nyi ke nâʼà ə vəyn etɔf. Ghɨ ətəyn ghə fe zâ ə fànə̀.

¹⁶ Ghɨ ghɛ ə tè fe kə ghɛ ətəynze kyâyn ə tsà sê ghɨə nə ghɛ, ghɛ zɛ ə ze kyâyn sê wùə ə̀ tèpamə̂ tə satàyn nə tɛ, è Kwùnduŋ vɛ.

¹⁷ Ghɨ ətəynghe ə zhə̀tə̀ chyatə̂ Njisə̀s pîə nə è ndo ə ghənə apàs endaʼke.

¹⁸ È və pìə è njiə ə ngwùʼ eghaʼâ se ndò, wùə vɛ è tè kyi pamə̂ tə satàyn nə tɛ e sè chyatə̂ se ndù yî vəyn.

¹⁹ Pîza Njisə̀s ə kwiynsə̂ ə pìə se vəyn nə, “Kɛse kwɨlə nduə fe ghɨ ghɛghe ə tsà sê ghənə ghɛ eghaʼâ zɛ ə Pɛ̂pɛ nə̂yn sê ghò, ə tsà kə è kose səyn sê ghò.”

²⁰ È və pɔŋɔ ndò kə zâ ə ndùə ə setɔ̂ŋ èghɨm sè kwîə tsâ èghɛ zɛ ə Njisə̀s nə̀yn sê vəyn. Kə è tsà zâ, ghɨghe əkɨ̂m ghɛ ə zɨ, e nyi ke è kaynze.

Njisə̀s ə tsuʼ wùzhɔyn ə fɨnə zômsə̀ vâ Njalùs

²¹ Njisə̀s ə kɛsə̂ tyâŋà ènjwî ə ngwùʼ ə ndùə engyinə̂ əmɔ̀ʼɔze. Kə è tyàŋ fɨ fumə, nɔ̂yn ə ghɨ̀kè ə zùŋtə̀ ə vəyn ə ngwùŋ.

²² Kè nyî, wùə èchisə vîvè ə ndɛ atsɨ̀ynte, zə ə vəynze e nyi Njalùs ə pə̀. Kè kə è fe pə̂yn Njisə̀s nyi ə pfɨ ə və shi.

²³ Ə chyatə̂ vəyn nâʼà sə ŋaŋ ə pìə nə, “Vayn vɨ̂m ve zəyn nyîə zafə, kyaʼà se kwu. M chyatə̂ ndò ghò pə ndə̀m gho kɛke ə vəyn ətu ə è tɛ ə è və nyi.”

²⁴ Njisə̀s ə ndùə yî vəyn. Nɔ̂nə ghɨ̀ kyîke e ndûə kə ə Njisə̀s epàm mə kyɨ̀ŋ ka vəyn.

²⁵ Ə tè nyi zâ, wùzhɔyn vîvè e nyi fu môtə̀ kə nyi fe ashîŋə̀ ə vəynke, mə zaf ətəynze ə ndam ə vəyn ewìyn sə pîŋ njò sepɛ̀,

²⁶ è fe ètsôs nâʼà sə ŋaŋ ə tyàŋtə̀ tèluʼ tə ngàŋtè, te tsɨ̀ə kə nyi, ə fɨnə ndàʼa nâʼàpî ghè kə̂ è tè kyi sê ghənə, pîza ə tàʼa kyiə pɔ̂ynè nâʼà səkɔs, zaf ə ətəynze ə pɨlə tɛ ndûə kə əshi.

²⁷ Ə̀ tè nyi zâ, mə wùzhɔyn ə̀təyn ə zɨ ghɛ ghɛ ə Njisə̀s tè nə̂. È və fɛsə̂ pə̂ kə èndomve ə vəyn epàm əfètə̂ ànɔ̀yn kɛ ə kòmə̀ sèndzɨs sə vəynse,

²⁸ kûmə̀ kə è tè kwâʼtə̀ sə və ngɨŋ nə, ə zhi kôm ke ndzɨs sə vəynse, ə zhi tɛ.

²⁹ Kə è kòm pə̂yn ke ndzɨsə Njisə̀s sè nyî, shîŋə̀ ətəynke ə mìə, è və zɨə kê kə nâʼà sə və ngɨŋ nə zhi ə tɛ.

³⁰ Njisə̀s ə zɨə kə tyaʼa fɨ ə vəyn ewìyn, ə shɨŋə kə̀mnə̀ əfètə̂ ànɔ̀yn ətəynke ə ke pfɨf nə, “Ə̀ kom nde ndzɨs sɨmse ə?”

³¹ Chùmtè èpàm sə vəynse ə pfɨfə sê vəyn nə, “Ò fe kepî kə ghɨə kwuʼlə kə ə ghò ngwùŋ, fɨnə pfɨfə nə ə kom nde ghô kûmə̀ ghè?”

³² Njisə̀s ə naynə̂ əfètə̂ ə̀ghɨ̀ se fe nə ə kom nde zhiə.

³³ Wùzhɔyn ə̂təyn e tsɨŋtə̂ fânə̀ kə è fe ghɛ zɛ ə ze kyâyn sê vəyn, ə ke ndù ə pfɨ̀ə ə Njisə̀s əshi, ə tsà eghɛ zɛ ə ze kyàyn səmɔʼ.

³⁴ Njisə̀s ə pìə se vəyn nə, “Vayn vɨ̂m, pomə̂ zɛze ə nə̀yn ò vɛ o tɛ. Kwɨlə ke è pɔ̂ynè. Tsôs vɛ və mì.”

³⁵ Kə Njisə̀s pa wàmnə̀ ghɨ yîghe ə ndò pə̂ ə Njalùs ə ndɛ ə pìə se vəyn nə, “Vayn vɛ və kwu ò fɨnə fo ngəʼ ə̀ ghè sê Tyə̀ynsè ə?”

³⁶ Pîza Njisə̀s ə pûʼsə̂ kə ndò ə pìə sê Njalùs nə, “Kə ò fayn, kyi ke pomə̂ zɛze zâ.”

³⁷ È və pìə è ndùə ə wùə ə̀təyn ə ndɛ ə njìə kə Pità yî Njə̂m, è Njɔyn ànyìə Njə̂m.

³⁸ Ghənə ə ndùə tâ ə̀ Njalùs, ə ndɛ Njisə̀s ə fe ə̀ghɨ, ghe ndzaŋə ə zɨə ghənə e chîə, luŋə.

³⁹ È və njiə ə ndɛ ə ke pì sê ghənə nə, “Ndzaŋ kɨ̀nə, è chi zɨ̂nə̀ nyi kûmə̀ ghè? Vayn vɨ̀nə pâʼà kwu chi, è pɨənə̂ ndò.”

⁴⁰ Ghɨ ətəyn ghe e chaʼa vəyn. È və chûmə̀ fɨsə̂ ghənə əpɨəyn nâʼà ə̀kɨ̂m, ə njiə kə pɨa vâ ətəyn, è nyìə vəyn, è chùmtè èpàm sə vəyn seta, ə njiə ndûə ə ndɛ fètəyn zɛ vayn nə vɛ tè nyɨ̀ŋ ətəyn,

⁴¹ ə ndùə kyîə àgho ə va ətəynke ə pìə sê vəyn nə, “Talita Kumì,” mə è za piə nə, “Vayn èzhɔyn, m pîə sê ghò nə ò ndwi!”

⁴² Kè nyî, vâyn èzhɔyn ə̀təyn ə ndwìə sè kwîə, (ə pa nyi ke wâ pìŋ njòse pɛ̀.) Kə è ndwì zâ, choze ə zomə ə̀ghɨ ghɛ.

⁴³ Njisə̀s ə fo fɨ̀as sê ghənə nə kə wùə nə zɨ èghɛ zɛ ə ze kyâyn, ə ke fɨnə pì nə, ghənə fo fɨake, ə va ətəyn zhi.