Ŋwàʼlè ə̀ Mâk 4 - Ŋwàʼlè ə̀ Fèzhə̀ Mkâyn Mə̂ Fèm

Ngàyn kûmə̀ pɛ̀ àfùʼ

¹ Njisə̀s ə nə̀ fɨnə zhə̀tə̀ se zaʼlê əghɨ etipì enjwì ə Ngalìlîvè, nɔ̂yn ə ghɨ̀kè ə pə̀, ə kyìŋə̀ ka vəyn, è və fe zâ ə njiə tsɨsə̂ ə ngwùʼ èghaʼâ əfètə̂ tsò, ghɨghe ə tyəmə̂ ka ə etipìə tsô.

² È və zaʼlə̂ ghənə è ghɛ ghe tsɨ̀ə kə nyî kè ə sengàyn. È və mɛ̀ ngàyn sê ghənə nə:

³ “Ghàyn zɨte! Wùə vîvè ə tè səʼ se màʼ ə ngwàʼ,

⁴ ə piə è màʼà ndò, zhîzè ə tàyntə̀ kə aghòl endom kɛ ke tè tsɛ, nɨ̂ŋmè ə pə̀ tsoftə̂ kwɨlə nâʼà èkɨ̂m.

⁵ Shi yîghe ə tàyntə̀ elùʼ ə chi, chîmè e tsɨ̀ə va fu, ə zàŋsə̀ folə̀ kə nyî kûmə̀ nə chîəm tè lɔŋɔ va.

⁶ Kè nyi chwì ə panə pi ashìŋə̀ àkè, ə nyɔ̀ʼɔ mâʼà, m̀ mə zomə kûmə̀ nə ghaŋte tè paʼà tɔ̀ʼ nji əchi àchuŋ.

⁷ Shi yîghe ə tàyntə̀ kəpî elùʼ m̀sòlèndzɔŋ. M̀sòlèndzɔŋ mə̂təynmè ə fɨə ə ghàŋtə̀ kyîə èfɨa ətəynve, və tàʼa pɔŋ.

⁸ Shi yîghe ə tàyntə̀ kə nâʼà ə mchi mê chùŋə̀m. Ngwàʼ ə̀təyn ə fòlə̀ ə ndəmə̂ ə pɔŋɔ. Puʼtə mɔ̀ʼɔte e fɨə kyi ə̀shi m̀ghɨm mta, tə mɔ̀ʼɔte kyi ə̀shi m̀ghɨm tufə, tə mɔ̀ʼɔte kyi ə̀shi ewuʼə.”

⁹ Njisə̀s tè mɨ̀se ngàyn nə zɨnə̀ nə, “Ə̀ tɔfə pî ndè, è və tɔ̀ʼɔ̀ zɨtə̂.”

Eghɛ zɛ e nə̂yn Njisə̀s e wâmnə̀ ə se ngàyn

¹⁰ Ə pə̀ kə Njisə̀s nyì və̂yn nɨŋ chùmtè èpam sə vəynse njòse pɛ̀ è ghɨ mɔ̀ʼɔ ghɛ ghe tè nyì fu ə pìə se vəyn nə è tsayn ghɛ zɛ ngàyn sɛ tyə̀nə̀.

¹¹ È və pìə sê ghənə nə, “Zhə̀fè ə fo ghàyn tyaʼa sə̂ ke ə̀ghɛ əndətə kûmə̀ èfɔ̂yn ə Fezhə̀vè, pîza e kyi sə̂ zaʼlə̂ ə̀ghɛ ətəynghe sê ghɨ yiə kè ə sengàyn.

¹² È tè nəyn nyi kə, ‹Ghənə nə ndamə naynə̂ nâʼàpî zàyn fe kê va, ə ghənə ə zɨtə̂ pî zàyn, ə zɨə kê va kûmə̀ nə ə ghənə ke, ə ghənə kɛse pəyn sê Zhə̀fè, ə Fe lɛse fo sèpi sə ghənə̂sè.›”

Njisə̀s ə tsàyn ghɛ zɛ ə ngàyn ə̀təyn zaʼlə

¹³ Njisə̀s ə ke pfɨf sê ghənə nə, “Piə e za nyi nə ghàyn pâʼà zɨ ke ngàyn nə zɨ̀yn mə? Ə ghàyn sè zɨə ke va zɨ̀nə mə, ə ghàyn nə zɨ kê zàyn ngàyn sə mɔ̀ʼɔ sə?

¹⁴ Ngwàʼ zɛ ə wùə vɛ tè zho za tè nyi eghɛ ə Fezhə̀zè.

¹⁵ Ghɨə mɔ̀ʼɔ nyi kə ngwàʼ zɛ ə è tàyntə̀ endom, ghənə ə zɨə èghɛ ə Fezhə̀zè, kè sə ashìŋə̀ Satàyn ə pə̀ njîə fɨsə̂ zə̂ynzè ə ghənə ətəm.

¹⁶ Yîghe nyi kə ngwàʼ zɛ ə è tè tàynte əfètə̂ ə̀chi. Kyì əghɨ̀ nə ghɨynə za zɨə èghɛ ə Fezhə̀zè, ghənə ə zàŋsə̀ pomə̂ kə ndò è saŋnêzè.

¹⁷ Ghənə zɨə, pîza è zə tàʼa kyî ə teghaŋ ə ghənə ətəm, ghənə ə pomə̂ kə sə fendîŋə̀ fə ashìŋə̀fè. Ə ngəʼ pə̂yn kɨ̀sə etsôs, ghənə ə zàŋsə̀ tə zâ.

¹⁸ Ghə mɔ̀ʼɔ ghe nyi kepî kə ngwàʼ zɛ ə è tàyntè elùʼ ə Msòlèndzɔŋ. Ə̀ nyi ghənə ghɛ ə zɨə ghɛ ə Fezhə̀zè,

¹⁹ pîza fɨmsê ə mbize è kɔ̂ŋ zɛ ə ghənə kyi sê ghaʼtə mbite, è ghɛ mbi ə mɔ̀ʼɔ ə pə̀ ghâŋtə̀ ə̀təm ə ghənə̂ghè, zə tàʼa mu etwɔm ə ghənə endam.

²⁰ Pîza ghɨ ghɛ ə ghe nyi kə ngwàʼ zɛ ə è tàyntè mchi mê chùŋə̀m, nyi ghɛ ghe zɨə ghɛ ə Fezhə̀zè, ghənə ə kyîə kə ndò, zə pɔŋə tèpuʼ, zhîze e kyi ə̀shi m̀ghɨm ta, zhîze kyi ə̀shi m̀ghɨm tufə, zhîze kyi ə̀shi ewə̀.”

Ngàyn ə lâm

²¹ Njisə̀s ə fɨnə pîə sê nɔ̂yn kɛ nə, “Ə njîə è lâm ə ndɛ, ə tàʼa pfɨsə̂ etyə̂ fèvɨ, ə tàʼa ndə̀tè echinəkwiyn. Piə ə njîə, ə tɔmə elùʼ engaŋtə ve ə?

²² Ə ndə̂tè pî ghè, ə nə pa fe kendò, ə kɨytə̂ nâʼàpî eghɛ èkè, ə sas ətəyn nə payn əndayn.

²³ Ə̀ kyi pîndè tɔfe, e və tɔ̀ʼɔ̀ zɨtə̂ èghɛ nə zɨ̂nə̀!”

²⁴ È və piə kəpî sê ghənə nə, “Ghàyn e tɔ̂ʼnə̀ è ghɛ ghɛ ə ghàyn zɨ! Ə ghàyn nə̀yn nâʼàpî zàyn se ghɨghe, ə Zhə̀fè nə pɔŋ nəyn sê ghàyn zamə, ə è nəyn tsɛ.

²⁵ E za tyə̀nə̀ nə ə kyi pîndè, ə fo kwəynse sê vəyn, ə̀ lâʼà pîndè ə Zhə̀fè fi tsɨsè nâʼàpi fetətə̂ fɛ ə è kyi.”

Ngàyn eshi ə ngwàʼè

²⁶ “Njisə̀s ə fɨnə pìə nə Fɔ̂yn ə Fezhə̀vè nyì kə wùə vɛ è màʼ ngwàʼ afùʼ,

²⁷ è və kɛsə̂ kwɨlə̂, etuʼve è ve pɨənə̂, è chwì è nə̂yn èfɨaʼ ə vəynze. Nâʼà ashîŋə̀ nə kɨnə mə ngwàʼ ə̀təyn e folə̀, ə ndəmə̂, e ve fɨyn ke va nə, ghɛ ətəynze fe kyàyn zayn zə.

²⁸ Ə̀ nyi zâ mə ə̀ nə̀ m̀chi nə ngwàʼ ə̀təyn ndəmə ə è pɔŋ puʼte. Ə̀ fɨə kɔʼɔ tèsê sə shi, zhaze ə fɨə tsɔfə puʼe pɔŋ.

²⁹ Sɔ̀fsè ətəynse piə nâʼàpî ashîŋə̀ àkè wùə ə̀təyn ə njìə èfɛ̂ ə vəynze ə səʼə kwîə, kûmə̀ nə shîŋə̀ ə kwiə kə kwəyn.

Ngàyn eshi ə ngwàʼà fèkàʼ fə mostàfè

³⁰ Njisə̀s ə fɨnə pfɨfə nə, Ə kàʼa ə səyne fɔ̂yn ə Fezhə̀vè è kè kə? Ə kàʼa ə fɨyn mɛ̀ nâʼà ngàyn èkè se tyə̂ynə endom vɛ ə fɔ̂yn ə Fezhə̀vè nyi ətəyn ə?

³¹ E nyi kə feshîlə̀ fə ngwàʼà fèkàʼ fîfe ə tɔŋtə nə mostà. Ə pə̀ ashìŋə̀ kɛ ə zho, fe tətə̂ tsɛ̂ nâʼàpî èshi ə ghe ze ə mbi.

³² Pîza ə zho ngwàʼ ə̀təyn, kâʼ fe ətəynfe ə tə kɔʼɔ ghaʼa nyi kə fekaʼ fəfe sɨsfe, kyi sèngɔyn kə nɨ̂ŋə̀m pɛ ndɛ sə ghənə̂sè ətəyn.”

³³ Njisə̀s ə tè tsàyn ghɛ ə Fezhə̀zè sê ghənə tɔynə̂ ə sengàyn nyiə kə sɨ̂nə̀ mə se tsɨ̀ə kə nyi; ke endom kə ghənə zɨ kê.

³⁴ È paʼà là tsayn ghɛze sê ghənə nâʼà emɔ̀ʼ ndɔ̀ʼɔ è mɛ sə ngàyn. Pîza shîŋə̀ kɛ ə è tè nyì və̂yn nɨŋ è chùmtè èpàm sə vəynse, È və fɛtə̂ tsâ èghɛ zɛ ə ngàyn sə təynse zaʼlə.

Njisə̀s ə kɨ̀l fof atɛke

³⁵ Ə tè nyi kepî etuʼ vɛ Njisə̀s tè zaʼlə ghɨ zâ, shîŋə̀ ezhwikwɨləke ə kwənə, è və pìə sê chùmtè èpàm sə vəynse nə, “Ə ghâsènì tyaŋ ndu engyinə̂ enjwì vîə.”

³⁶ Ghənə ə zà ànɔ̂yn ə ghɨ̀ kɛ ə njiə ngwùʼ zɛ ə Njisə̀s tè kàyne tsɨs ətəyn, ghənə ə njìə tyâŋə̀ è vəyn. Ngwùʼ seghaʼâ sə mɔ̀ʼɔse tè nyì fu.

³⁷ Ghənə ə pìə tyàŋà ndò, fof kyîke ə zhə̀tə̀ se tsɛ̀ tɛ kə nyi, mômə zhə̀tə̀ se njiə ngwùʼ èghaʼâ kyiŋə se sàŋsə zɨ̂yn.

³⁸ Ə nyi mə Njisə̀s tè nyɨ̀ŋ epàm ə ngwùʼ èghaʼâ pɨəynə̂ è tuə vəynke atɛa kwìkè. Ghənə ə zə̀mə̀ vəyn ə pfɨfə sê vəyn nə, “Tyə̀ynsè, piə e za nyi nə ghàs kwutə̂ ndùə nyi, ò fe va?”

³⁹ È və zə̀mə̀ ə kàyntə̀ ə̀ghɛ sê fofa ətəynke ə pìə sê tsò nə, “Pɔse tyəm ke za!” Kè sə ashìŋə̀ fof kɛ ə pɔ, luʼte ə kɨmə̂ kə mɔŋ.

⁴⁰ Njisə̀s ə pfɨfə sê ghənə nə, “Kûmə̀ ghè ə ghàyn fànə nyi ə? Piə e za nyi nə ghàyn pâʼà pomə̂ se zaʼâ zo?”

⁴¹ Ghənə ə fànə̀ nâʼà sə ŋaŋ, kyi e pfɨfə sê kyì nə, “Ə̀ vɨ̂nə nyi ekyì ə wùə èkè nyiə, nâʼàpî àfof è tsò e zɨə və ə?”