Ŋwàʼlè ə̀ Mâk 3 - Ŋwàʼlè ə̀ Fèzhə̀ Mkâyn Mə̂ Fèm

Njisə̀s ə tsuʼ kɔyn ə wûəkè kə̂ ke kwu

¹ Ə tè fɨyn nyi kepî etuʼ vîve, Njisə̀s ə kɛsə̂ ndûə ə ndɛ atsɨ̀ynte, wùə vîvè e nyi fumə mə kɔyn ə vəyn kyîke ə kwu.

² Ghɨ yîghe tè nyì fumə kyiŋə èndom nə Njisə̀s nəyn tsas èghɛ kə ə gham vəyn, zamə, ghənə ndə̀mə̀ èshi ə vəyn ewìyn se fe nə, è nyiə nə̀ tsuʼə ndò wùə nə vɛ etuʼ endaʼa.

³ È və pìə sê kwuə àkɔyn nə vɛ nə, “Tsɛ fɨ pə̀yn əshi fàyn.”

⁴ Njisə̀s ə ke pfɨf sê ghənə nə, “Saʼze pomə̂ ndò nə ə nəyn chùŋ etuʼ endaʼ mə̂, pî nə zə pomə̂ nə ə sɔza wùə mə ə zhwi və?” Pîza, ghənə kɨmə̂ kə mɔŋ.

⁵ Njisə̀s ə naynə̂ ka ndûə ghənə nyî mə tɔŋ ə̀ vəyn və zaf È ve sè fɨnə kosə̂ èsəyn kûmə̀ ə̀təm ə ghənə ghe tɛ, ə ke pì sê wùə nə vɛ nə, “Nɛ̀se kɔyn kɛke.” È və nɛ̀sə̀ kè sə ashìŋə̀, gho ətəynke ə tɛ kə ndò.

⁶ Ghɨə Falàsîə ghə fɨə kə sə ashìŋə̀, ə kyîə atsɨ̂ynte yî ghɨ Ɛlɔ̀tghè sè pɨaʼtə̂ se zhwiə Njisə̀s.

Nɔ̂yn ə ghɨ̀kè ə chùmtè ndu Njisə̀s ə enjwì Ngalìlîvè

⁷ Njisə̀s ə ndò ə ndùə yî chùmtè èpàm sə vəynse ə enjwì ə Ngalìlîvè. Ghɨghe ə ndùə ə Njisə̀s epàm, tsɨ̂ə kə nyî mə ə ndo apàs endaʼa Ngalìlîkè ə fɨnə ndô ə Njòndyâ,

⁸ yîghe ndô pə̂ ə Njèlusalɛ̀m, ghə mɔ̀ʼɔghe ə ndò apàs endaʼa Ìndùmiyàkè, yîghe ə tyàŋà pə̀ endom və engyinə̂ apàs endaʼa Njondàynkè, yîghe fɨnə ndô pə̂ epɨ̀as vɛ ve tè nyì paʼsê se Tayà è Sindɔ̀n. Ghɨ nə ghɨnə̀ tè pə̂ se Njisə̀s kûmə̀ ə̀ghɛ ghɛ ghənə tè zɨ nə è nə̀ ndò.

⁹ Ghɨ ə tə tè tsɨ̀ə tsɛ̂sə̀ ndò. Njisə̀s ə ke pì sê chùmtè èpàm sə vəynse nə se chise ghɛ ngwùʼ èghaʼâzè, kə ndɔ̀ʼɔ chiynə vəyn.

¹⁰ È tè nyi mə è və kàynè tsuʼ ghɨ ghe tsɨ̂ə kə nyî, kûmə̀ zamə nâʼàpî ndè vɛ ə è tè zafə, e kyiŋə kə èndom se pə kûmə̀ vəyn kə zhi tɛ.

¹¹ Zuʼse pi sɛ ə se tè nyi ə ghɨ ghəm mwìyn e fe ndûə Njisə̀s nâʼàpî ashìŋə̀ àkè, sə nə̀ ghɨ ətəynghe ə pfɨ̀ə ə chi, sè pɨa chîə pîə nə, “Ò nyi Va Fèzhə̀!”

¹² Njisə̀s ə fo fɨ̀as nə kə ghənə fɨyn tsayn se ghɨghe wùə vɛ zhi nyi vəyn.

Njisə̀s ə chɔʼtê ghɨətomə njò sepɛ̀

¹³ Fumə ashìŋə̀ Njisə̀s ə kɔʼɔ ndûə èndomve etûə pfɨ̀yn, ə tɔŋɔ ə̀ghɨ ghɛ ə è kyiŋə, ghə pə̀ sê vəyn.

¹⁴ È və chɔʼɔ yîghe kèpî ə ghənə əfètəyn njò sepɛ̀, nə ghənə nə kwîə paʼsə̂ ke se vəyn, è və tɔŋə̂ ghənə sə əghɨtom ə vəynghe kə è tom ə ghənə kwîə ndàʼà èghɛ e Fezhə̀zè.

¹⁵ Ə fɨnə fo ghənə ètyaʼa nə ə chumə̀ fɨsə̂ tèpamə̂ tə satàyntè ə ghɨghe ə mwìyn.

¹⁶ Ghɨtom nə ghɛ tè nyi Shimùyn vɛ Njisə̀s tè fo kwəynsê èzə ə vəyn nə Pità,

¹⁷ è Njə̂m yî ànyìə vəyn Njɔyn, ə ghɔ Zepɛndì. (Njisə̀s ə tsɨ̀ ə kwəynsə̂ èzə zhîze sê ghənə nə Pòwananjìs, mə e za pìə nə ghɔyn eghole pɨaze).

¹⁸ Ə tè fɨyn nyi Andɨ̀lò, è Filìp, è Pàtòlòmiyà, è Matyò, è Tɔ̀mɔ̂s, è kɨsè Njə̂m ə va Àfeyùs è Tàtyə̂s è Shimùyn ə wùə ə fètə̂ anɔ̀yn kɛ ke pomə se kwu sê ndaʼa ghənə̂zè,

¹⁹ è Njondàs Èskalɔ̀t vɛ è tè kyi se pəʼlê Njisə̀s.

Ə pìə nə Njisə̀s nyi Peelzepùl

²⁰ Njisə̀s ə nə̀ kwɨlə̂, ghɨghe ə fɨnə pə̀ ə zûŋtə̀ ə vəyn ə ngwùŋ tsɨ̂ə kə nyî, shîŋə̀ ke sè va kə yî chùmtè èpàm sə vəynse zhi fɨake.

²¹ Kə ghɔnyìə və tè zɨ ghɛ ətəyn ə ndò ndûə se kyiŋə vəyn kə ghənə nji kwɨlə̂ è vəyn kûmə̀ nə ghɨ tè piə nə, ‘È və zhya.

²² Tyə̀ynsè sə alàŋ shîse mə se ndo pə̂yn ə Njèlusalɛ̀m tè piə nə, “Peelzepùl nyi ə vəyn ewìyn. È nyi fɔ̀yn ə̀ tèpamə̂ tə satàyn tɛ è fo tyaʼa sê Njisə̀s nə è və chûmə̀ fɨsə̂ tèpamə̂ tə satàyntè.”

²³ Njisə̀s ə tɔŋɔ̂ ghənə ə ke mɛ̀ ngàyn zhîzè sê ghənə nə, “Satàyn kàʼa è və chumə̀ fɨsə̂ zàyn Satàyn ə?

²⁴ Ə ghɨ endaʼ èmɔ̀ʼghe kyi chyâsè ewìynze, kyi va kyə̀ èmɔ̀ʼ, ə ndaʼ ətəynze pfɨ.

²⁵ Ə ghɨ esas ə ndɛ èmɔ̀ʼghe kyi chyâsè ewiyn kyi va kyə̀ èmɔ̀ʼ əsas ə ndɛ ətəyn pfɨ.

²⁶ Ə nyi mə fɔ̂yn ə Satàyn kyi ndô chyâsèzè, è nôzè ə zəyn zə fètəyn, ə fɔ̂yn ətəyn tàʼa ndam, ə ze pfɨ, ə ze mi mɨsè.

²⁷ Ò vayn kàʼa ò nji ə wùə àtyaʼ ə ndɛ ə ò kyi fi èfɨa vəynve mə ò paʼà kyî kol vəyn sə shi. Ò kolə chîə ndò vəyn, o ke kyiə fi efɨa vəynve.

²⁸ M pîə sê ghàyn səmɔʼ nə, ə nyi pî pi èkè kə ghɨ nə̂, ə Zhə̀fè lɛ̀se fo ghənə, fɨnə lɛ̀sè fo nâʼàpî èsôylè èkè zɛ ə ze fɨə pə̂ ə ghənə echo.

²⁹ Pîza mə ə sòylè pîndè Zuʼse Ŋwaʼase, ə tə tàʼa fɨnə lɛ̀sə fo vəyn. È və nə̀yn pi mə ə vayn kàʼa tə lɛsè fo.”

³⁰ Njisə̀s tè pi nyî kûmə̀ nə ghɨ tè pìə nə, “È nyîə kyi sèzuʼ se pise.”

Njisə̀s ə tsayn nyìə vəyn è ghɔnyì ə vəynghe

³¹ Nyìə Njisə̀s è ghɔnyìə Njisə̀sghè ə pə̀ tyəmə̂ əpɨəyn ə tom nə tɔŋɔ vəyn.

³² Ə nyi za, mə nɔ̂yn əghɨ̀kè ə tsɨsə̂ ə kyìŋə̀ ka vəyn. Ghənə pîə sê vəyn nə, “Fekə, nɛ̂ è ghɔyn ə nɛ̂ghè kyiŋə ghò əpɨəyn.”

³³ Njisə̀s ə ke pfɨf sê ghənə nə, “Nyì vɨ̂m è ghɔnyì ghɨmə, ə̀ nyi ghə̀ ndè?”

³⁴ Kə è wàmnè zâ, ə naynə̂ ka ghənə ə ke pì nə, “Nyì vɨ̂m è ghɔnyì ghɨmə ə nyi əghɨ ghɨ̀ynə̀.

³⁵ Ə̀ nə̂ nâʼàpî ndè ghɛ ghɛ ə Zhə̀fè kyiŋə, è nyi ànyì vɨ̂m, è nyì vɨ̂m.”