Ŋwàʼlè ə̀ Mâk 15 - Ŋwàʼlè ə̀ Fèzhə̀ Mkâyn Mə̂ Fèm

Ə ndù è Njisə̀s sê Paylɛ̀t

¹ Tuʼve ə zo ghɨ kɔʼsə nə eshyə̀ engaŋtəghe, è ghɨ ghaʼlə̂ghè endaʼ, yî tyə̀ynsè sə alàŋsè, è ghɨə sesaʼ ghəkɨ̂m, ə zùŋtə̀ ə kyîə àtsɨ̂ynte. Ghənə ə kolə Njisə̀s è chaʼse ə ndùə fo vəyn ə Paylɛ̀t ə gho.

² Paylɛ̀t ə pfɨfə sê vəyn nə, “Ò nyi fɔ̀yn sê ghɨ Njûs ghə̂?” Njisə̀s ə pə̀ynsə̀ nə, “E nyi ke kə ò pì.”

³ Ghɨ kɔʼsə nə eshyə̀ engaŋtə ghe ghâmə̀ Njisə̀s əghɛ ghe tsɨ̀ə kə nyi.

⁴ Paylɛ̀t ə pfɨfə kwəynsə̂ sê Njisə̀s nə, “Ò pə̀ynsə̀ vâ? Zɨ ghɛ ghɨ̀yn ə ghâmə̀ ghò sə ətəyn!”

⁵ Pîza Njisə̀s ə tàʼa pa pə̀ynsè. Paylɛ̀t e nyi èkaynze.

Ə tsɛ̀sè saʼze nə ə zhwi Njisə̀s

⁶ Nâʼàpî zɨyn ə tè nyì se zhi azhi ə zaʼatsɛke, Paylɛ̀t e kyi se fɨsə̂ wùə ə ndɛ ə̀chaʼ èmɔ̀ʼ vɛ ghɨə kyiŋə.

⁷ Ə̀ tè nyì fu ashìŋə̀, wùə vîve nyi ə ndɛ ə̀chaʼ, e tɔŋtə̂ nə Pàlapàs. È tè nyì yighə̀ ghɨ mə ghe tɛ ètuke sê ngômnàyn ə̀ Lûm, ə nò àngyə̀s ə zhwiə wùə.

⁸ Nɔ̂yn ə ghɨ̀kè ə zùŋtə̀ ə̀ pìə sê Paylɛ̀t nə è fɨse wùə èmɔ̀ʼ ə ndɛ chaʼ kə è ndamə fɨsə.

⁹ Paylɛ̀t ə pfɨfə sê ghənə nə, “Ghàyn kɔ̂ŋɔ̀ nə m fɨse fɔ̀yn əghɨ Njûsə̀ mə?”

¹⁰ È tè nyîə ke nə ghɨ kɔʼsə nə eshyə̀ ə ngaŋtəghe fo Njisə̀s se vəyn kûmə̀ àghə̀ʼ.

¹¹ Ghɨkɔʼsə nə eshyə̀ ə ngaŋtəghe ə chiyntə̂ ànɔ̂yn əghɨ̀ kɛ nə ke pi nə Paylɛ̀t fɨse Pàlapàs.

¹² Paylɛ̀t ə fɨnə pfɨfə sê ghənə nə, “Ghàyn kyiŋə nə m ghayn ghe è vɛ ə ghàyn tɔŋtə nə fɔ̀yn ə̀ghɨ ə Njûs ghə?”

¹³ Ghənə ə pɨa pîə nə, “Paynte vəyn ə awâmnè!”

¹⁴ Paylɛ̀t ə pfɨfə nə “Kûmə̀ ghè? È pofse ghe?” Ghənə ə kɛsə̂ pɨa pîə kə sə ŋaŋ nə, “Paynte vəyn awâmnè!”

¹⁵ Paylɛ̀t tè kɔ̀ŋə se nə̀yn nə nɔ̂yn əghɨ̀ ətəynke ə saŋnə̂. È və fɨsə̂ Pàlapàs ə ndɛ ə̀chaʼ. È və fo àtyaʼ nə sokə̀ʼse pus Njisə̀s, ə ndu payntê awâmnè.

Sokə̀ʼse nyə̂ʼsə̀ Njisə̀s

¹⁶ Sokə̀ʼse ə njìə Njisə̀s ə njiə è vəyn ezhɔyn ə tɔʼve, ə tɔŋnə̂ zûŋtə̀ sèsokə̀ʼ nâʼà sèkɨ̂m.

¹⁷ Ghənə ə màʼà sèndzɨs se paŋəse, se fusə̂ sè ndzɨs sə tefɔ̀yntè, ə̂ Njisə̀s ewìyn. Ghənə pɛ àfɔ m̀sòlèndzɔŋke, ə sò ə Njisə̀s atu.

¹⁸ Ghənə ə zhə̀tə̀ sə̂ pîŋtə̀ vəyn pîə nə, “Pomsê sê ghò ə Fɔ̀ynə̀ ə ghɨ̀ ə Njûsə̀!”

¹⁹ Ghənə e pusə àtuə ə vəynke è mbàŋ, tsɨlə̂ m̀tɛ̂ ə vəyn ewìyn, ngwuʼə ə̀ ndzɨs kaŋkaŋə̂ tyə̂nə̀ nə ə ngɨmnə ndò vəyn.

²⁰ Kə ghənə nyə̂ʼsè mɨ̂sè vəyn, ghənə ə chɔʼɔ sendzɨs sepaŋa sɛ ə vəyn ewìyn, ə kɛsə̂ mâʼà sə vəynse. Ghənə ə njìə fɨə è vəyn se nduə payntê ə awâmnè.

Ə paynte Njisə̀s ə awâmnè

²¹ Ə tè nyi kə ghənə ndûə, ə kwəynə è wùə vîvè endom, mə tɔŋtə̂ nə Shimùyn. Shimùyn tè fɨ endaʼa Silênzè. È tè nyi pɨ̀a Àlɛ̀ksandà yî Lufùs. Shimùyn tè tsɛ njiə ndûə endaʼ. Sokə̀ʼse ə ke kyî ə vəyn ə pìə nə è pɨaʼa wâmnè ə Njisə̀skè.

²² Ə njiə ndùə è Njisə̀s elùʼ e tɔŋtə̂ nə Ngolngotà, mə za nyi, “Eluʼ ewɔf atuve.”

²³ Ghənə ə ndûə tâ fu, ə fo mlɨ̂ sê vəyn mə ə ndə̀m fuve ətəyn, e tɔŋtə̂ nə mâyl. Pîza, è və tə nə è mɨə va.

²⁴ Ghənə ə tɨmə pə̀ʼ se chàtè ə sendzɨs sə vəynse.

²⁵ Ə̀ tè nyi pɨsə̀pɨsə̀ ə sechwîə epolə mɔ̀ʼ kə tè paynte vəyn awâmnè.

²⁶ Ə nyàʼà èghɛ zɛ ə tè pi nə è pofse ndô apàŋ afɨake, ə payntə̂ ə vəyn etûə awâmnè nə, “Fɔ̀ əghɨ Njûsə̀.”

^27-28 Ə payntə̂ kəpî ə̀ghɨ ə chɔŋɔ yîghe əpɛ̀ ə Njisə̀s əngwùŋ: èmɔ̀ʼ e nyi ə vəyn ekɔyntwɔve, è və mɔ̀ʼɔ ekɔyn ekôvè.

²⁹ Ghɨghe e tsɛ̂ èndom, nəʼə̀ ètu, sôylə̀ vəyn pîə nə, “Àa! Ò tè pi nə Ò nə̀ pɨ̂ytè Ndɛ Ètsə̀mə, ə Ò kɛse pɛ sə mtuʼ mta!

³⁰ Sɔzà ngɨŋ zɛzè zôyn ə tso pə̂ fɛ awâmnè!”

³¹ Ghɨkɔʼsə nə eshyə̀ ngaŋtəghe, è tyə̀ynsè sə alàŋsè e nyə̂ʼsə̀ kəpî Njisə̀s, pîə nə, “È nyiə tè sɔzâ ə̀ghɨ, va se sɔzà ə ngɨŋə̂ vəyn.

³² Ghâsènì fe vɛ Zhə̀fè chɔʼ, ə fɔ̀yn ə̀ghɨ̀ Isìlâyghè, ə è tso pəyn awâmnè zôyn, ə ghâsènì sê pomə Vəyn.” Ghɨ echɔŋə ghɛ ə tè paynte awâmnè ə Njisə̀s etipì e pɔŋɔ sôylə̀ kəpî Vəyn.

Njisə̀s ə kwu

³³ Kə zhwize kɔʼ lo tso, lɨmke ə kɨlə tèluʼ tekɨ̂m, tə fɨ̀mə̀ sə sechwìə sèta.

³⁴ Ə sechwìə sèta, Njisə̀s ə pɨa pîə nâʼà è kyə̀ è tɛ nə, “Èli, Èli, lama sapatanì?” Mə è za pìə nə, “Zhə̀ fɨmfe, Zhə̀ fɨmfe, kûmə̀ ghè ə ò kyiyne miə?”

³⁵ Ghɨə mɔ̀ʼɔ ghɛ ə tè tyəm fu ə zɨə ə pìə nə, “Ghàyn zɨte, È tɔŋɔ Èlanjà nə è pəyn tsâmtè vəyn!”

³⁶ Wùə èmɔ̀ʼ ə ghənə fètəyn ə nyɨŋə ndûə njîə kwùynchaʼ ə tsɨ̀ə mlɨ̂ me ngwaŋə̂m ə fa ə fekàʼ, ə fo kɔʼsə̂ ndûə ə Njisə̀s echo nə È mɨ. È və pìə nə, “Ghàyn za Vəyn! Ə ghâsènì fe kə Èlanjà nə̀ pə̂ tsosə Vəyn.”

³⁷ Njisə̀s ə pɨa chîə ə zhwìsə̀ àzhwìsè e kwuŋsəke.

³⁸ Pâŋ ə sendzɨs kɛ ə tè ghaŋse ə Ndɛ Ètsə̀mə ə pàsə̀ pɨ̂asvè èpɨ̀a, se zhə̀tə̀ ekwù se tso fɨ etyə̀.

³⁹ Tuə sesokə̀ʼ kɛ ə ke tè tyəm fu ə fe èndom vɛ ə Njisə̀s kwu ətəyn ə pìə nə, “Səmɔʼ, wùə vɨ̀nə tè nyi ke nâʼà Vâ Fèzhə̀!”

⁴⁰ Zəyn yîghe tè nyì fu naynə̂ ə̀ghɛ ghɛ ə ghe tè kyànə sə aghaf. Ə ghənə ə fètəyn tè nyi Mèli Màkndàlɛ̂n, Sàlomè, è Mèli nyìə Njə̂m è tətə̂ yî Njosɛ̀f.

⁴¹ Zəyn nə ghɨnə tè chùmtə Njisə̀s mə è nyi ə Ngalìlî, tsâmtə̀ Vəyn. Zəyn ə mɔ̀ʼɔ tè nyì fu se tsɨ̀ mə chùmtè pəyn Vəyn ə Njèlusalɛ̀m.

E pfɨ̂mə̀ ə Njisə̀szè

^42-43 Wùə vîvè tè nyì e tɔŋtə̂ nə Njosɛ̀f. E tè ndò pə̂yn ə tə̀ʼ ə̀ Àlimàtiyà. Vəyn Njosɛ̀f tè nyi wùtwɔ əfètə̂ atsɨ̀ynte əghɨ̀ eghaʼâkè endaʼ. È tè ndamə lɨmtə̂ kə àshîŋə̀ kɛ ə fɔ̀yn ə Fezhə̀vè tə pə̂ ətəyn. Kə ə̀ tè se nyi fètuʼ fe pɨaʼtəfe (etuʼ endaʼ), e və kolə ə̀təm ə ndùə fe Paylɛ̀t ezhwikwɨlə nə è fo pfɨnə Njisə̀svè sê zhi.

⁴⁴ Paylɛ̀t tè nyi è kaynze se zɨ nə Njisə̀s se nyi mə è və kwu. È və tomə tɔŋɔ àtu ə sesokə̀ʼ kɛ ə pfɨfə sê vəyn nə Njisə̀s fə se nyi mə è və kwuə.

⁴⁵ Ə pə̂ kə Paylɛ̀t zɨ nə Njisə̀s ə ndɨŋ kwu, è və fo èpfɨyn ə vəyn sê Njosɛ̀f və Àlimàtiyâ.

⁴⁶ Njosɛ̀f ə zhɔnə àmbɛlaŋ ə koytə̂ è pfɨnə Njisə̀szè ətəyn. È və pfɨ̀mə̀ eshyə̀ zhîze mə ə tsof anayn. Epàm ətəyn è və pɨŋsə̂ èchi eghaʼazè ə fìnə̀ ècho eshyə̀ eghaʼâzè ətəyn.

⁴⁷ Mèli Màkndàlɛ̂n yî Mèli nyìə Njosɛ̀f tè nyîə naynə̂, ə fe eluʼ vɛ ə pfɨ̂mə̀ Njisə̀s ətəyn.