Ŋwàʼlè ə̀ Mâk 14 - Ŋwàʼlè ə̀ Fèzhə̀ Mkâyn Mə̂ Fèm

Ə pɨaʼtə̂ se zhwiə Njisə̀s

¹ Ə̀ tè faŋ ke m̀tuʼ mpɛ̀ kə zhi tuʼ fɛ tsì ə̀ Fèzhə̀ tè zaʼ tsɛ sè ndɛ sə ghɨə Isìlâyghè, è tuʼ vɛ kə zhi panə kwaŋ kɛ ə tè nyi mə ə paʼà ndə̀m fèsə̀ʼ ətəyn. Ghɨ kɔʼsə nə eshyə̀ engaŋtəghe yî tyə̀ynsè sə alàŋsè e sè kyiŋə èndom se nyaʼtə̂ kyiə Njisə̀s se zhwi,

² Ghənə ə pìə sê ngɨŋ sə ghənə̂sè nə, “E tsɔ̂fə̀ va se kyiə Njisə̀s əfetuʼ fə azhife kə ndɔ̀ʼɔ ghɨ ndwise nôzè.”

Wùzhɔyn ə kɨmne Njisə̀s ə Petanì

³ Njisə̀s tè nyi ə Petanì ə Shimùyn ə ndɛ vɛ è tè zafə è kwùsà. Kə Njisə̀s zhiə, wùzhɔyn ə njiə pə̂ è mbùʼtə̀fè, è mngwɨlmê lɨ̂mtə̀ mə ətəyn. Ngwɨ̂l mə tə̂m tè nyîə tɛ èkɛve, mə fɛte è nât. Wùzhɔynə̂ təyn ə kəmə àtɔ̂ŋ ə fèbùʼfə mngwɨl fɛ ə sɨ̀sə̀ ə Njisə̀s atu.

⁴ Ghɨ yîghe fu ə fe zâ, kyì e pfɨfə sê kyì è tɔŋ ezafe nə, “Ə̀ nyi kûmə̀ ghè ə è pofsə ngwɨlə̂m nyi ə?

⁵ Ə fe kàʼa ə pəʼle ngwɨ̂l mə tə̂m se ekɛ etsɨəve, ə fo kɛ ətəyn sê ghɨ afɨfə.” Ghənə ə zɔ̂ wùzhɔyn ə̀təyn nâʼà sə ŋaŋ.

⁶ Pîza, Njisə̀s ə pìə sê ghənə nə, “Ghàyn za vəyn! Ghàyn fo ngəʼ ə̀ghè sê vəyn ə? È və nə̀yn ghɛ etsɔ̂fəze sê mi.

⁷ Ghàyn nə ndam kyi ke ndò ghɨə afɨfə ə ghàyn əfètəyn, mə ghàyn kɔ̀ŋ nâʼà pî ashìŋə̀ àkè, ə ghàyn tsamte ghənə. Pîza, m mə va ə ghànə fètəyn shîŋə̀ tekɨ̂m.

⁸ Wùzhɔyn vɨnə nə̀yn ke èghɛ zɛ ə è fè kàʼa ə è nəyn. È sɨ̂s mngwɨl me lɨ̀mtə̂m ə mì atu se pɨaʼtə e pfɨ̀mə̀ zɨmze tsɔ̀fə shîŋə̀kè kwənə.

⁹ M pîə sê ghàyn səmɔʼ nə nâʼàpî ghayn ə ndâʼà tom èchùŋ zɨ̀yn ə mbi, ə tsâ èghɛ zɛ wùzhɔyn vɨnə nə̀yn sə̂ kwâʼtə̀ vəyn.”

Njondàs ə pomə se pəʼlê ə Njisə̀s

¹⁰ Njondàs Èskalɔ̀t, ə wùə èmɔ̀ʼ əfètə̂ sèchùmtè èpàm sə Njisə̀sè njò sepɛ̀ ə ndò ə ndùə fe ə̀ghɨ kɔʼsə nə eshyə̀ ngaŋtəghe, se pəʼlê ə Njisə̀s sê ghənə.

¹¹ Ghənə tè nyi èsaŋnə̂zè se zɨ eghɛ zɛ ə Njondàs tè pi ə tsɨ̀nə̀ se fo vəyn èkɛve. Njondàs ə ke zhə̀tè sə̂ kyiŋə tèndom se pəʼlê ə Njisə̀s sê ghənə.

Njisə̀s ə zhi fɨazhiə ezaʼa tsɛve yî chùmtè èpàm sə vəynse

¹² Ə̀ tè nyi əfetuʼ fə shife, ashìŋə̀ azhi kɛ ə tè zhiə payn ə kwaŋke ndɔ̀ʼɔ ndəm fèsə̀ʼ ətəyn. Ə̀ tè nyì kepî etuʼ vɛ ə tè se ghɔ sendzè se kwùnə̀ efɨazhie Zaʼatsɛ̂ve ətəyn. Chùmtè èpàm sə Njisə̀sè ə ndùə pfɨfə sê vəyn nə, “Ò kyiŋə nə ghàs ndu fɛte ghayn fɨazhiə ezaʼa tsɛve sê ghò ə?”

¹³ Njisə̀s ə tomə sê chùmtè èpàm sə vəynse sepɛ̀ ə pìə nə, “Ghàyn nji ndu əfètə̂ tə̀ʼ. Wùə nə̀ kwəynə è ghàyn mə è və pɨàʼà tɔ̀yn m̀mò. Ghàyn chumte ndu vəyn.

¹⁴ Ghàyn pi sê pɛ̀ ndɛ vɛ è ndù nji ətəyn nə, ‘Tyə̀ynsè pfɨf nə, Lôm ə̀ ndɛ ə̀ghɨ motə pə zâyn ə ghasè chùmtè èpàm sɨmse zhi fɨazhiə ezaʼa tsɛve ə tə?’

¹⁵ Ə è tyəyn Lôm èghaʼâ sê ghayn. Lôm ə̀təyn e nyi ekwùtwəyn mə fɛtê pɨaʼtê ndəm. Ghàyn fɛte fɨazhiəve ətəyn sê ghâsènì.”

¹⁶ Chùmtè èpàm sə təynse ə ndò ndûə əfètə̂ tə̀ʼ ə fe ə̀ghɛ ə̀kɨ̂m kè kə Njisə̀s fê tsâyn sê ghənə, ə fɛtə èfɨaezhiə azhi Ezaʼa tsɛve fu.

¹⁷ Ashìŋə̀ ezhwikwɨləke, Njisə̀s ə pə̀ fu yî chùmtè èpàm sə vəynse njò sepɛ̀.

¹⁸ Kə ghənə tè tsɨs etûə àlaŋ zhiə, Njisə̀s ə pìə sê ghənə nə, “M pìə sê ghàyn səmɔʼ nə wùə èmɔ̀ʼ ə ghàyn əfètəyn, nə̀ pəʼlə̂ mi, vɛ ghasè vəyn zhiə əmɔʼ.”

¹⁹ Zə nə̀ wîyn mə chùmtè èpàm sə Njisə̀s mə pɔylə̂, se sè pfɨfə sê vəyn èmɔ̀ʼ emɔ̀ʼ nə, “M kwâʼtə̀ nə vachi mi.”

²⁰ Njisə̀s ə pə̀ynsə̀ nə, “Ə̀ nyi wùə èmɔ̀ʼ ə ghànə fètəyn njò sepɛ̀. Vɛ ə ghasè vəyn tsɨ̂ə ndzɨsə paynke akaŋ əmɔʼ.

²¹ Va Wùə nə̂ kwuə kè kə ə nyi mə ə nyàʼ ə Ŋwàʼlè ə̀ Fèzhə̀. Pîza, tsôs èghaʼavè nyì sê wùə vɛ ə è nə̀ pəʼlə Vəyn! E fe kàʼa ə zə pɨlə tsɔ̂fə̀ sê wùə nə vɛ ezhoghɛ ə tè tàʼa piə vəyn nâʼà səkɔs.”

Efɨazhiə Pɛ̂pɛve

²² Kə ghənə tè zhiə, Njisə̀s ə njìə àpayn ə kwaŋke, ə fo àzɔ̀ŋnè sê Zhə̀fè, ə pɨaʼlə̂ kəynke, ə fo kəynke sê chùmtè èpàm sə vəynse ə pìə nə, “Ghàyn ko kəynke. Ə̀ vɨ̂nə nyi ewiyn vɨmve.”

²³ Èpàm ətəyn È və njiə wà m̀lɨ̀, ə fo àzɔ̀ŋnè sê Zhə̀fè, ə fo zə̂yn sê ghənə, ghənə əkɨ̂m ə mɨə kə fumə ə wà.

²⁴ Njisə̀s ə pìə sê ghənə nə, “Ə̀ mɨ̂nə̀ nyi mndəm mɨ̂m mə̂ m̀kàyn mɛ ə sɨ̂s sê tsɨ̀tsɨ̂ ə̀ghɨ̀.

²⁵ M pîə sê ghàyn səmɔʼ nə m tə fɨnə mɨə va lɨ̀m mèyn se zaʼâ etuʼ vɛ kə m mɨ me fêm elùʼ efɔ̀yn ə Fezhə̀vè.”

²⁶ Ghənə ə zhəmə njàŋ ə fɨə ndûə ə pfɨ̀yn ə̀ Sèolìf.

Njisə̀s ə tsàyn nə Pità nə̀ mɛ Zhi

²⁷ Njisə̀s ə pìə sê ghənə nə, “Ghàyn əkɨ̂m nə̀ tə zâ mi, kûmə̀ nə ə nyàʼ ə ŋwàʼlè ə̀ Fèzhə̀ nə, ‘M nə̀ zhwiə ngyəyn, ə ndzè sə təyn sekɨ̂m chyase.”’

²⁸ Njisə̀s ə ke pì nə, “Pîza, mə ashìŋə̀ kɛ È zòmsè Mi, ə m ndu ə Ngalìlî sə shi sê ghàyn.”

²⁹ Pità ə pìə sê Njisə̀s nə, “M vayn tə zà əgho, əghɨ ghəkɨ̂m zà pî ghò.”

³⁰ Njisə̀s ə pə̀ynsə̀ sê Pità nə, “M pîə sê ghò səmɔʼ nə, ndomə̀mbvɨ nə̀ piə è tɔŋɔ shîŋə̀ tepɛ̀ ètuʼve ndâyn mə o mɛnê Mi shîŋə̀ teta.”

³¹ Pità ə fɨnə pìə nâʼà è kyə̀ ètɛ nə, “M vayn tə za ghô, ə m nyi pî se kwu ghâsè ghò.” Chùmtè èpàm sə Njisə̀s sekɨ̂m ə pɔŋɔ pîə ndùə kə zâ.

Njisə̀s ə tsə̀m ə Ngètsemenì

³² Epàmə̂ ə̀təyn, Njisə̀s yî chùmtè èpàm sə vəynse ə pə̀ elùʼ, e tɔŋtə̂ nə Ngètsemenì. Kə ndû tâyn, Njisə̀s ə pìə sê ghənə nə, “Ghàyn tsɨsə fâyn, M ndu tsəm.”

³³ Njisə̀s ə njìə Pità yî Njə̂m, è Njɔyn yî ghənə ə ndùə əmɔʼ se tsə̀m. Ghɛghe ə zhə̀tə̀ sə̂ fo ngəʼ ə vəyn ekwâʼtè nâʼà sə ŋaŋ.

³⁴ È və pìə sê ghənə nə, “Ghɛ nyîə fo ngəʼ ə mì ətəm nâʼà sə ŋaŋ, mə ghe kàʼa ghe zhwi mi. Ghàyn tsɨsə fâyn ə ghâsènì kyâʼ pɨ̂əyn.”

³⁵ È və tɛtə̂ ndùə əshi, ə tɨmə ə̀ngwuʼ ə chi tsə̂mə̀ nə, ə ndom ətəyn nyi, kə m tsɛ tɔynê fa ekyì ètsòs vɨ̀nə.

³⁶ È və tsə̀mə̀ nə, “Pɛ̂pɛ, Pɨ̀a vɨm, ghɛ ghəkɨ̂m nyîə poynə̂ sê ghò. Njiə tsɨ̀se tsôs vɨ̂nə sê Mi. Pîza, nə̀yn kə ò kɔ̀ŋə̀, ə̀ vachi kə m kɔ̂ŋə̀.”

³⁷ Njisə̀s ə tsə̀mə̀ mɨ̂sə̀ ə kɛsə̂ pə̂ sê chùmtè èpàm sə vəyn sɛ sèta, ə kotə̂ ghənə e pɨənə̂. È və pìə sê Pità nə, “Shimùyn, ghàyn pɨənə̂ ndò? Ghàyn vayn kàʼa ghàyn kyaʼ ghâsènì se zaʼâ chwìə emɔ̀ʼ ə?

³⁸ Ghàyn e kyaʼà, tsə̂mə̀, kə ndɔ̀ʼɔ ghàyn pfɨ əfètə̂yn emɔ̀m. Təmə nyîə kɔ̂ŋə̀ se nə̀yn, pîza njà sə ewìynse e pɔylə̂.”

³⁹ Njisə̀s ə fɨnə ndùə sè tsə̂mə̀, pîə kə ə̀ghɛ ghɛ ə è fə piə chîə sə shi,

⁴⁰ È və kɛsə̂ pə̂ kwəynsə̂, ə kotə̂ chùmtè èpàm sə vəynse e pɨənə̂, shiə ghənə̂ghè tɨ̀lə̀ kə nyî ə mbɨəynse əgho. Ghənə e ke va nə pîə nə ghe sê Njisə̀s ə.

⁴¹ Kə è kɛse pə̀yn, nə ə̀ nyi tèshiŋə̀ tèta, È və pìə sê ghənə nə, “Ghàyn pa pɨənə kə ndò, zɨ̂tə̀ ə? zə kwəyn. Shîŋə̀kè ə kwəyn. Ghayn fe kə, ə nə̀ pəʼlə̂ Va wùə sê ghɨ piə.

⁴² Ghàyn ndwie! Ghàyn ndayn ə ndo. Ghàyn fe kə. Ə̀ vɨ̀nə pə̀ wùə vɛ ə è pəʼle mi.”

Ə ko Njisə̀s

⁴³ Njisə̀s tè pa wâmnə̀ ndò. Njondàs vɛ è tè nyì kepî wùə èmɔ̀ʼ əfètə̂ sèchùmtè èpàm sə vəynse njò sepɛ̀, ə pə̀. È tè nyì yighə̀ nɔ̂yn ə ghɨ̀kè ke kyi tefɛ̂ è mbàŋsè, mə tom əghɨ kɔʼsə nə eshyə̀ ə ngaŋtəghe, è tyə̀ynsè sə alàŋsè, è ghɨ ghaʼlê ə Njûsə̀.

⁴⁴ Njondàs vɛ ə è tè nyì se pəʼlə Njisə̀s tè nyi mə è və fo chwìə sê nɔ̂yn əghɨ̀ ətəynke ə pìə nə, “Ə m maŋne pî ndè, ghànə kê nə ə̀ nyi wùə vɛ ə ghàyn kyiŋə. Ghayn ko vəyn, ə fɛte kyî, ə nji ndo è vəyn.”

⁴⁵ Njondàs ə pə̀ ə chəmə ndûə kə chichi sê Njisə̀s ə pìə nə, “Tyə̀ynsè!” ə maŋnə̂ vəyn.

⁴⁶ Ghɨ ətəynghe pə̀ ə ko Njisə̀s ə fɛtə̂ kyîə vəyn.

⁴⁷ Wùə èmɔ̀ʼ ə Njisə̀s əfètə̂ ghɨ̀ ə chɔʼɔ fɨsə̂ èfɛ̂ apuʼle, ə kaʼa tənə atôŋne ə akɔ̀s ə̀ wûə èkɔʼsə nə èshyə̀ èngaŋtə kwəynəke.

⁴⁸ Njisə̀s ə pfɨfə sê ghənə nə, “Ghàyn fɨ pə̀yn è fɛtè è mbàŋsè se ko mi kə pîəm nyi wùchɔŋɔ kə ghè gha?

⁴⁹ M zɨsə̂ kə ghâsènì tuʼmè m̀kɨ̂m, zaʼlə̂ ə Ndɛ Ètsə̀mə, ghàyn e kyîə va mi. Pîza, ghɛ zɛ ə ze nyi ə Ŋwàʼlè ə̀ Fèzhə̀ kyi ndô se kwəyn.”

⁵⁰ Chùmtè èpàm sə vəyn sekɨ̂m ə tə zâ vəyn.

⁵¹ Kwuŋ vîve tè ndùə kəpî ə Njisə̀s epàm mə è və waflê kɔyn ə sendzɨsve. Ghɨ ghɛ e kyiŋə se ko vəyn,

⁵² è və màʼà zâ sèndzɨs sə təynse ə tə ndô kə è wiyn ezomve.

Ə ndù è Njisə̀s elùʼ esaʼve

⁵³ Ghɨ ghɛ ə tè ko Njisə̀s, ə njìə ndùə è vəyn ə wùə èkɔʼsə nə̂ èshyə̀ èngaŋtə kwəynə ə ndɛ. Nâʼà ə̀ghɨ kɔʼsə nə eshyə̀ əngaŋtə ghəkɨ̂m, è ghɨ eghâʼlə̂ ghè endaʼ, è tyə̀ynsè sə alàŋsè, ə pə̂ zûŋtə̀ fu.

⁵⁴ Kə tè nduə è Njisə̀s, Pità e chûmtə̂ ndûə Vəyn sə aghaf, ə ndùə njiə ə wùə èkɔʼsə nə̂ èshyə̀ èngaŋtə kwəynə apɨəyn. È və tsɨsə̂ fu yî ghə̀ ghɨ tsɨŋnə ndɛ ètsə̀məghe, zɨtə̂ èwus.

⁵⁵ Ghɨ kɔʼsə nə eshyə̀ ə ngaŋtəghe, è nɔ̂yn əghɨ̀ saʼake əkɨ̂m e kyiŋə èghɛ zɛ ə kaʼa zhwi Njisə̀s sə təyn, pîza ə tàʼa kotê ə zhîze.

⁵⁶ Ghɨ ətsɨəghe e wamtə̂ èkwaŋ ə Njisə̀s ətu, pîza wâmnè ə ghənə̂zè e kwəynə̂ va.

⁵⁷ Ndômnè əmɔ̀ʼɔghe ə fɨnə ndwìə wamə àkaŋ ə Njisə̀s ətu ə pìə nə,

⁵⁸ “Ghàs tè zɨ kə è pìə nə, ‘M nə̀ pɨ̂sə̀ Ndɛ Ètsə̀mə zɨ̂yn ə pɛ è gho nyî, ə m kɛse pɛ zə̂ndò ə mtuʼ mta, mə paʼà pɛ ègho.’”

⁵⁹ Pîza nyî, wâmnè əghənə zə tàʼa pa kwəynê.

⁶⁰ Wùə èkɔʼsə nə èshyə̀ èngaŋtə kwəynə ə ndwìə tyəmə̂ ə ghənə əfètəyn ə pfɨfə sê Njisə̀s nə, “Ò wàmnə̀ va ə? Ò kyi va ghɛze se pì kûmə̀ ə̀ghɛ ghɨ̀yn ə ghâmə̀ ghò ətəyn nyî ə̀?”

⁶¹ Njisə̀s ə kɨmə̂ kə mɔŋ. Wùə èkɔʼsə nə èshyə̀ èngaŋtə kwəynə ə fɨnə pfɨfə sê vəyn nə, “Ə̀ nyi ghô vɛ ə Zhə̀fè chɔʼ ndə̂m mə, ə Va Fèzhə̀ fɛ ghɨə ngɨmnə ə?”

⁶² Njisə̀s ə pə̀ynsə̀ ə pìə nə, “Ə̀ nyi ke nâʼà mi. Ghàyn tə fe Va Wùə, è ve tsɨs ekɔyntwɔ ə Pɛ̀-Atyaʼ-Akɨ̂mkè. Ghàyn tə fe Vəyn ə è Və tso pə̀ əfètə̂ sèmbàʼ ekwùtwəyn.”

⁶³ Wùə èkɔʼsə nə eshyə̀ èngaŋtə kwəynə vɛ ə kyîə pâsə̀ sèndzɨs sə vəynse se tyə̀yn èndwɔ̂ efɨəve ə pfɨfə nə, “Ghâsènì fɨnə kyiŋə se gha ghe è tsɛ̀ sə esaʼsə?

⁶⁴ Ghànə zɨ kə è soylè Zhə̀fè. Ghàyn kwàʼtə̀ nə ghe?” Ghənə ə pìə kə ə̀kɨ̂m nə, è kyi se kwu.

⁶⁵ Yîghə̀ ə zhə̀tə̀ tsɨlə̂ m̀tɛ̂ ə Njisə̀s ewìyn, kɨytə̂ ə̀shi vəynghe, pusə vəyn, pîə nə, “Tsàyn nə pus nde gho ə?” Sokə̀ʼse ə njìə vəyn sanə pusə.

Pità ə mɛ Njisə̀s

⁶⁶ Pità tè pa nyi ke ezhɔyn esaʼa nə saʼve. Vâyn èzhɔyn vîvè mə è fɨaʼà sê wùə èkɔʼsə nə èshyə̀ è ngɛsə ngaŋtə kwəynə, ə pə̀ fu.

⁶⁷ Kə è fe Pità e zɨtə̂ èwus, è və tɨmə naynə̂ vəyn ə pìə nə, “Ò tè nyì kepî ghâyn Njisə̀s vɛ ə è ndò pə̂yn ə Nazalɛ̀t.”

⁶⁸ Pîza, Pità ə kwiynsə̂ ə pìə nə, “M ke va ghɛ nə zɨ̂nə̀, zɨə kê pî va nə ò pîə nə ghe.” È və wàmnə̀ zâ ə ndò ə fɨə ndùə echo àpɨəyn. Fumə ashìŋə̀ ndomə̀ mbvɨ ə tɔŋə.

⁶⁹ Vayn èzhɔyn nə vɛ ə fɨnə fe Pità fu ə pìə kwəynsə̂ sê ghɨ ghɛ ə ghe tè tyəm fumə nə, “Ə̀ vɨ̀nə nyi wùə èmɔ̀ʼ ə è tè chùmtə kəpî Njisə̀s.”

⁷⁰ Pità ə fɨnə kwiynsə̂. Ə mòtə̀ kə sə fendiŋə̀ nyî, ghɨ ghɛ ghe tè tyəm fu ə fɨnə pîə sê Pità nə, “E nyi ke nâʼà səmɔʼ nə ò nyi wùə èmɔ̀ʼ vɛ ə è chùmtə̀ Njisə̀s, kûmə̀ nə ò ndò pə̂ Ngalìlî.”

⁷¹ Pità ə pìə nə, “M kaʼa m kayn nə m pîə səmɔʼ nə m keva wùə vɛ ə ghàyn pìə.”

⁷² Kè se ashìŋə̀, ndom ə̀mbvɨ ə tɔŋə, nə ə ndu shîŋə̀ te pɛ̀. Pità ə ke pɨ̀əytè kə Njisə̀s tè pì sê vəyn nə, “Ndom ə̀ mbvɨ nə̀ piə è tɔŋə shîŋə̀ tepɛ̀, mə ò mɛnê mi shîŋə̀ teta,” È və pɨ̂sə̀ è chîzè.