Ŋwàʼlè ə̀ Mâk 11 - Ŋwàʼlè ə̀ Fèzhə̀ Mkâyn Mə̂ Fèm

Njisə̀s ə nji ə Njèlusalɛ̀m kə̂ Fɔ̀yn

¹ Njisə̀s ə kwì yî chùmtè èpàm sə vəynse, ə ndùə paʼsə̂ ə Njèlusalɛ̀m, ə ngwùŋ m̀tɔ̂ŋtə̀ mîəm, e tɔŋtə̂ nə Petfàs è Petanì, m̀ nyi ə ngwùŋ ə sèpfɨ̀yn sə Olìfsè. Njisə̀s ə tomə sèchùmtè èpàm sə vəynse sepɛ̀

² ə pìə sê ghənə nə, “Ghàyn nji ndu fà əfètə̂ tə̀ʼ ə ghàyn əshi. Ghàyn nə piə njiə ndûə kə nyi, ə fe va njàkâs kə ə faŋa ndɔ̀ʼɔ wùə tyəm kɔʼ ətu ətəyn. Ə ghàyn fe, ghà zhə̀nə̀ pə̂ è zə̂yn.

³ Ə ghàyn pîə zhə̀nə̀ ndò, ə pfɨfə pîndè sê ghàyn nə, ə pi ndè nə ghàyn zhə̀nə, ghàyn ə pìə nə, ‹Pɛ̂pɛ nə kyi èghɛ se nə̀yn è zə̂yn, nyi se kɛsə tiynsə̂ kə zôyn.›”

⁴ Ghənə ə ndò ndûə ə fe vâ njàkâs, è ve tyəm endom, mə ə faŋa echô mbàyn, ghənə ə zhə̀nə̀.

⁵ Kə ghənə pîə zhənə̀ zâ, ghɨ ghɛ ə ghe tè tyəm fu ə pfɨfə nə, “Ghàyn zhə̀nə̀ se gha ghe è njàkâs ətəyn ə?”

⁶ Ghənə pə̀ynsə̀ pìə kə kə̂ Njisə̀s fe pì sê ghənə. Ghɨ ətəynghe ə za, ghənə ə ndò è zə̂yn.

⁷ Chùmtè èpàm sə vəyn nə sɛ, sèpɛ̀ ə pə̀ è va njàkâs ə̀təyn sê Njisə̀s ə lafsə̂ è laf ə ghənə̂vè, Njisə̀s ə kɔʼɔ tsɨsə̂ ətu.

⁸ Ghɨ e tsɨəghe e sè chɔʼtə̂ èlaf ə ghənə̂vè mâʼà endom, è ve tyâŋà ətu, yîghe e kyimtə̂ ètuə mkàʼvè ə mfùʼ, mâʼà ndùə endom.

⁹ Ghɨ ghɛ ə tè ndùə əshi, è ghɛ ə tè pə epàm e ndûə, pɨa pîə nə, “Òsanà! Pɔsêzè nyì sê vɛ ə è pə̀ ezə ə Pɛ̂pɛze!

¹⁰ Pɔsêzè nyì sê fɔ̂yn ə pɨ̀a ghâsènì, Ndàfît, vɛ ə è pə̀! Òsanà nyì sê Zhə̀ fɛ ə fe nyi elùʼ vɛ ə ve ngaŋte kwəyn!”

¹¹ Njisə̀s ə nə̀ njiə ə Njèlusalɛ̀m ə ndùə ə Ndɛ Ètsə̀mə, ə naynə̂ ka nâʼà pi ghè pîza ə fɨnə fɨə kə ndò yî chùmtè èpàm sə vəynse njò sepɛ̀ ə ndùə ə Petanì, kûmə̀ nə shîŋə̀kè tè se nyi mə ke ə tsɛ̀.

Njisə̀s ə sòylè kâʼ fə sèfîkfè

¹² Tuʼve ə zo, ghənə kɛse pə̀ ə Petanì, chɨ̀ŋ e sè zafə Njisə̀s.

¹³ È və pìə e naynə̂ ndù ndò ə fe fekâʼ fə sefîkfè, fe tyəm nâʼà sə aghaf mə fə zɨə nâʼà achûŋ. È və ndùə esâs ə̀təyn se fe nə e nə̂ fe ndò twɔmvə, pîza ə fe kə tèsɛ̂, kûmə̀ nə ə tè va ashîŋə̀ kɛ twɔmve nə vɛ muə ətəyn.

¹⁴ È və sòylə̂ fekâʼ fə ətəynfe ə pìə nə, “Wùə tə fɨnə kwɨlə va tamfe mə è kɔ̀yn ə ghò ətu!” Chùmtè èpàm sə vəynse ə zɨə èghɛ nə zɛ ə è pì zâ.

Njisə̀s ə ndù ə Ndɛ Ètsə̀mə

¹⁵ Kə ghənə tè ndù fɨ ə Njèlusalɛ̀m, è və njiə apɨəyn ə Ndɛ Ètsə̀məke sè chûmə̀ fɨsə̂ ə̀ghɨ ghɛ ə tè nə̂ pə̂ʼlè fu. È və pə̀ŋsə̀ maʼà èfɨa vɛ ghɨ tè kwiynə kɛve etu ə̀təyn, ə pə̀ŋsə̀ mâʼà m̀kyə̂ mɛ ə ghɨə tè tsɨs ətəyn se pəʼlə̂ m̀kwɨ̀lə̂.

¹⁶ È tè nə̂ zâ pomə̂ va nə wùə fɨyn pɨaʼa àfɨa ə pəʼləke ə è tɔyne apɨəyn ə Ndɛ Ètsə̀məke,

¹⁷ ə nə̀ pî e zaʼlê ghənə ə ke pfɨf nə, “Piə ə nyàʼ ə Ŋwàʼlè ə̀ Fèzhə̀ nə, ‘Ghɨ tə tɔŋtə̂ ndɛ zɨ̂m nə ndɛ ètsə̀mə sê ghɨ mbighe əkɨ̂m ə?’ Pîza ghànə kɛse zə̂yn zôyn se elùʼ ə ghɨ e chɔŋɔve.”

¹⁸ Ghɨ kɔʼsə nə eshyə̀ engaŋtəghe yî tyə̀ynsè sə alàŋsè ə zɨə nyî, sè kyiŋə èndom se zhwiə Njisə̀s. Ghənə tè fànə vəyn kûmə̀ nə nɔ̂ynkè akɨ̂m tè nyi èkaynze kûmə̀ ə̀ghɛ ghɛ ə è tè zaʼlə.

¹⁹ Ə tè nyi ashìŋə̀ ezhwikwɨləke, ghənə ə fɨ fu ə tə̀ʼ.

Njisə̀s ə zaʼlê ghɛ kûmə̀ eghɛ zɛ ə pomə̂ e kàʼa ə ze nəyn

²⁰ Tuʼve ə pɨsə̂ zo, ghənə ə pìə ə kɛsə ndûə ndò ə fe fekâʼ fə fîks fɛ ə Njisə̀s tè liŋ zâ, mə fe ə zom nâʼà nyî, ghaŋte ə zomə.

²¹ Pità ə kɛsə̂ kwàʼtə̀ èghɛ zɛ ə ze tè kyâyn ə pìə sê Njisə̀s nə, “Fekə Tyə̀ynsè, kâʼ fɛ ə ò vâ liŋ zâ ə zom.”

²² Njisə̀s ə pə̀ynsə̀ ə pìə sê ghənə nə, “Ghàyn samse ke Fèzhə̀.

²³ M pîə sê ghàyn səmɔʼ nə, ə pì pîndè sê pfɨ̀yn èghaʼâ zɨ̀yn nə, ‘Mùʼə ə ndùə tânə̀ ə enjwì ə fengwaŋve,’ pîə za kwaʼtə̀ va ndô, pomə̂ nə ghɛ zɛ ə è pì nə kyânə̀, ə ze kyayn ke kə è pì.

²⁴ M pîə sê ghàyn nə, ə ghàyn tsə̂mə̀, pfɨfə nâʼà pîghè sê Zhə̀fè, pomə̂ nə ghàyn nə̀ kyîə, ə ghàyn nə̂ kyî.

²⁵ Ə ò tyəm nâʼà pî ashìŋə̀ àkè se tsə̀m, kyi eghɛ ghâyn wùə, gho lɛ̀sə̀ fo vəyn kə Pɨa vɛo vɛ ə è nyi ekwùtwəyn pɔŋ lɛ̂sè fo sèpi sɛse.

²⁶ Ə ò tàʼa lɛ̀sə fo wùə, Pɨ̀a vɛ̂ vɛ ə è nyi ekwùtwəyn tàʼa pɔŋɔ lɛ̀sə fo sepi sɛse.”

Ghɨ tè pfɨfə eluʼ vɛ ə tyaʼa ə Njisə̀skè ndò ətəyn

²⁷ Njisə̀s yî chùmtè èpàm sə vəynse ə fɨnə kɛsə̂ ndùə ə Njèlusalɛ̀m. Ə tè se nyi kə̂ è kwîə ghaynə apɨəyn ə Ndɛ Ètsə̀məke, ghɨ kɔʼsə nə èshyə̀ ə ndɛ̂ Fèzhə̀ eghaʼâghè, è tyə̀ynsè sə alàŋsè, è chəʼse ə pə̀ ə pfɨfə sê vəyn nə,

²⁸ “Ò nə̂ ə̀ghɛ ghɨ̂yn è tyaʼa, mə ke ndo ghayn? Ə̀ fo ndè tyaʼa nə ò nə̂ ə̀ghɛ nə ghɨ̂yn ətəyn ə?”

²⁹ Njisə̀s ə pîə sê ghənə nə, “M pfɨfə èghɛ sê ghàyn, mə ghàyn pə̀ynsè ə m ke tsâ wùə vɛ ə è fo tyaʼa nə mə nə̂ ə̀ghɛ nə ghɨ̂yn ətəyn se ghayn.

³⁰ Ghàyn tsàyn sê mi nə, ə tè fo Fezhə̀ ètyaʼa sê Njɔyn nə è və fo m̀mo sê ghɨ mə, ə fo əghɨ ə?”

³¹ Ghənə ə zhə̀tə̀ sə̂ shwinə̂ ə ghənə əfètəyn pîə nə, “Ə ghâsènì pì nə, ‘Ə fo Fezhə̀ tyaʼa sê vəyn ə è pfɨf nə, ‘Ghàyn se polə̂ se pomə̂ eghɛ zɛ ə è fe piə kûmə̀ ghè?’

³² Pîza, ə ghâsènì pì nə, ‘Ke ndo sê ghɨ ə̂’” Ghənə tè fànə əghɨ kûmə̀ nə ghɨghe əkɨ̂m tè kwàʼtə kə nə Njɔyn tè nyi ke nâʼà fɨ̀aʼtè èghaʼâ.

³³ Ghənə ə kwàʼtə̀ zâ, ə pìə kə sê Njisə̀s nə, “Ghàs ke va.” Njisə̀s ə ke pì sê ghənə nə, “Pî mi pɔŋɔ tsâ va luʼ vɛ ə m njî tyaʼa sə̂ nə̂ ə̀ghɛ nə ghɨnə ətəyn.”